ਕੰਪਾਲਾ, 06 ਅਪ੍ਰੈਲ । ਯੂਗਾਂਡਾ ਨੇ ਫੀਫਾ ਦੀ ਤਾਜ਼ਾ ਦਰਜਾਬੰਦੀ ਵਿੱਚ ਕੌਂਸਲ ਆਫ ਈਸਟ ਐਂਡ ਸੈਂਟਰਲ ਅਫਰੀਕਾ ਫੁਟਬਾਲ ਐਸੋਸੀਏਸ਼ਨ (ਸੀਈਸੀਏਐਫਏ) ਜ਼ੋਨ ਵਿੱਚ ਚੋਟੀ ਦਾ ਸਥਾਨ ਬਰਕਰਾਰ ਰੱਖਿਆ ਹੈ। ਰੈਂਕਿੰਗ ‘ਚ ਯੂਗਾਂਡਾ 124.15 ਅੰਕਾਂ ਨਾਲ 92ਵੇਂ, ਅਫਰੀਕਾ ‘ਚ 19ਵੇਂ ਸਥਾਨ ‘ਤੇ ਹੈ। ਅਰਜਨਟੀਨਾ 1,858 ਅੰਕਾਂ ਨਾਲ ਅਜੇ ਵੀ ਸਿਖਰ ‘ਤੇ ਹੈ, ਜਦਕਿ ਅਫਰੀਕਾ ਦੀ ਸਭ ਤੋਂ ਉੱਚੀ ਰੈਂਕਿੰਗ ਵਾਲੀ ਟੀਮ ਮੋਰੋਕੋ 1,661.42 ਅੰਕਾਂ ਨਾਲ ਇਕ ਸਥਾਨ ਖਿਸਕ ਕੇ 13ਵੇਂ ਸਥਾਨ ‘ਤੇ ਪਹੁੰਚ ਗਈ ਹੈ।
ਪਿਛਲੇ ਮਹੀਨੇ ਮਾਰਾਕੇਸ਼, ਮੋਰੋਕੋ ਵਿੱਚ ਖੇਡੇ ਗਏ ਅੰਤਰਰਾਸ਼ਟਰੀ ਦੋਸਤਾਨਾ ਮੈਚਾਂ ਵਿੱਚ ਰਾਸ਼ਟਰੀ ਟੀਮ ਨੂੰ ਕੋਮੋਰੋਸ ਤੋਂ 4-0 ਦੀ ਹਾਰ ਅਤੇ ਘਾਨਾ ਦੇ ਖਿਲਾਫ 2-2 ਨਾਲ ਡਰਾਅ ਦਾ ਸਾਹਮਣਾ ਕਰਨ ਤੋਂ ਬਾਅਦ ਯੂਗਾਂਡਾ ਨਾ ਤਾਂ ਉੱਪਰ ਵੱਲ ਨੂੰ ਵਧਿਆ ਅਤੇ ਨਾ ਹੀ ਡਿੱਗਿਆ।
ਸੀਈਸੀਏਐਫਏ ਜੋਨ ’ਚ ਕੀਨੀਆ ਦੂਜੇ ਸਥਾਨ ‘ਤੇ ਹੈ, ਜਦਕਿ ਫੀਫਾ ਰੈਂਕਿੰਗ ’ਚ ਚਾਰ ਸਥਾਨ ਚੜ੍ਹਕੇ 1,191.24 ਅੰਕਾਂ ਨਾਲ 107ਵੇਂ ਸਥਾਨ ‘ਤੇ ਪਹੁੰਚ ਗਿਆ ਹੈ। ਕੀਨੀਆ ਨੇ ਪਿਛਲੇ ਮਹੀਨੇ ਮਾਲਾਵੀ ਵਿੱਚ ਹੋਏ ਚਾਰ ਦੇਸ਼ਾਂ ਦੇ ਟੂਰਨਾਮੈਂਟ ਵਿੱਚ ਮਾਲਾਵੀ ਅਤੇ ਜ਼ਿੰਬਾਬਵੇ ਨੂੰ ਹਰਾਉਣ ਤੋਂ ਬਾਅਦ ਆਪਣੀ ਰੈਂਕਿੰਗ ਵਿੱਚ ਸੁਧਾਰ ਕੀਤਾ ਹੈ।
ਤਨਜ਼ਾਨੀਆ ਅਤੇ ਸੂਡਾਨ ਸੀਈਸੀਏਐਫਏ ਜ਼ੋਨ ਵਿੱਚ ਕ੍ਰਮਵਾਰ ਤੀਜੇ ਅਤੇ ਚੌਥੇ ਸਥਾਨ ‘ਤੇ ਹਨ ਅਤੇ ਫੀਫਾ ਰੈਂਕਿੰਗ ਵਿੱਚ ਕ੍ਰਮਵਾਰ 119ਵੇਂ ਅਤੇ 127ਵੇਂ ਸਥਾਨ ‘ਤੇ ਸਥਿਰ ਹਨ।
ਸੀਈਸੀਏਐਫਏ ਜ਼ੋਨ ਦੇ 12 ਮੈਂਬਰ ਹਨ, ਜਿਨ੍ਹਾਂ ਵਿੱਚ ਯੂਗਾਂਡਾ, ਕੀਨੀਆ, ਤਨਜ਼ਾਨੀਆ, ਸੂਡਾਨ, ਰਵਾਂਡਾ, ਬੁਰੂੰਡੀ, ਇਥੋਪੀਆ, ਦੱਖਣੀ ਸੂਡਾਨ, ਜਿਬੂਤੀ, ਸੋਮਾਲੀਆ, ਇਰੀਟਰੀਆ ਅਤੇ ਸੀਏਐਫ ਐਸੋਸੀਏਟ ਮੈਂਬਰ ਜ਼ਾਂਜ਼ੀਬਾਰ ਸ਼ਾਮਲ ਹਨ।
