ਧਨੁਸ਼ਕੋਡੀ (ਤਾਮਿਲਨਾਡੂ), 21 ਜਨਵਰੀ (ਹਿ.ਸ.)। ਪ੍ਰਧਾਨ ਮੰਤਰੀ ਨਰਿੰਦਰ ਮੋਦੀ ਤਾਮਿਲਨਾਡੂ ਦੇ ਆਪਣੇ ਦੋ ਦਿਨਾਂ ਦੌਰੇ ਦੇ ਆਖਰੀ ਦਿਨ ਅੱਜ (ਐਤਵਾਰ) ਇੱਥੇ ਕੋਦੰਡਾ ਰਾਮਾਸਵਾਮੀ ਮੰਦਰ ’ਚ ਦਰਸ਼ਨ ਪੂਜਾ ਕਰਨਗੇ। ਇਹ ਮੰਦਿਰ ਸ਼੍ਰੀ ਕੋਦੰਡਾ ਰਾਮਾਸਵਾਮੀ ਨੂੰ ਸਮਰਪਿਤ ਹੈ। ਕੋਦੰਦ ਰਾਮ ਨਾਮ ਦਾ ਅਰਥ ਧਨੁਰਧਾਰੀ ਭਗਵਾਨ ਰਾਮ ਹੈ। ਕਿਹਾ ਜਾਂਦਾ ਹੈ ਕਿ ਇੱਥੇ ਹੀ ਵਿਭੀਸ਼ਨ ਨੇ ਭਗਵਾਨ ਸ਼੍ਰੀ ਰਾਮ ਨਾਲ ਪਹਿਲੀ ਵਾਰ ਮੁਲਾਕਾਤ ਕੀਤੀ ਅਤੇ ਉਨ੍ਹਾਂ ਤੋਂ ਸ਼ਰਨ ਮੰਗੀ ਸੀ।
ਕੁਝ ਦੰਤ ਕਥਾਵਾਂ ਇਹ ਵੀ ਹਨ ਕਿ ਇਹ ਉਹ ਸਥਾਨ ਹੈ ਜਿੱਥੇ ਭਗਵਾਨ ਸ਼੍ਰੀ ਰਾਮ ਨੇ ਵਿਭੀਸ਼ਣ ਦੀ ਤਾਜਪੋਸ਼ੀ ਕੀਤੀ ਸੀ। ਪ੍ਰਧਾਨ ਮੰਤਰੀ ਧਨੁਸ਼ਕੋਡੀ ਦੇ ਨੇੜੇ ਅਰਿਚਲ ਮੁਨਾਈ ਵੀ ਜਾਣਗੇ। ਅਰਿਚਲ ਮੁਨਾਈ ਬਾਰੇ ਕਿਹਾ ਜਾਂਦਾ ਹੈ ਕਿ ਇੱਥੋਂ ਰਾਮ ਸੇਤੂ ਬਣਾਇਆ ਗਿਆ ਸੀ। ਭਾਜਪਾ ਨੇ ਪ੍ਰਧਾਨ ਮੰਤਰੀ ਮੋਦੀ ਦਾ ਅੱਜ ਦਾ ਪ੍ਰੋਗਰਾਮ ਆਪਣੇ ਐਕਸ ਹੈਂਡਲ ‘ਤੇ ਸਾਂਝਾ ਕੀਤਾ ਹੈ। ਭਾਜਪਾ ਮੁਤਾਬਕ ਪ੍ਰਧਾਨ ਮੰਤਰੀ ਮੋਦੀ ਸਵੇਰੇ ਅਰਿਚਲ ਮੁਨਾਈ ਜਾਣਗੇ। ਇੱਕ ਘੰਟੇ ਬਾਅਦ ਕੋਦੰਡਾ ਰਾਮਾਸਵਾਮੀ ਮੰਦਰ ਪਹੁੰਚਣਗੇ। ਪ੍ਰਧਾਨ ਮੰਤਰੀ ਮੋਦੀ ਨੇ ਕੱਲ੍ਹ ਤਾਮਿਲਨਾਡੂ ਦੇ ਪ੍ਰਮੁੱਖ ਮੰਦਰਾਂ ਦੇ ਦਰਸ਼ਨ ਅਤੇ ਪੂਜਾ ਕਰਨ ਦੀਆਂ ਤਸਵੀਰਾਂ ਐਕਸ ਹੈਂਡਲ ’ਤੇ ਸਾਂਝੀਆਂ ਕੀਤੀਆਂ ਹਨ।
ਇਸ ਤੋਂ ਪਹਿਲਾਂ ਕੱਲ੍ਹ (20 ਜਨਵਰੀ) ਪ੍ਰਧਾਨ ਮੰਤਰੀ ਨਰਿੰਦਰ ਮੋਦੀ ਨੇ ਰਾਮੇਸ਼ਵਰ ਵਿੱਚ ‘ਅਗਨੀ ਤੀਰਥ’ ਤਟ ’ਤੇ ਇਸ਼ਨਾਨ ਕਰਨ ਤੋਂ ਬਾਅਦ ਭਗਵਾਨ ਰਾਮਨਾਥਸਵਾਮੀ ਮੰਦਰ ਵਿੱਚ ਪੂਜਾ ਕੀਤੀ ਸੀ। ਇਹ ਤਾਮਿਲਨਾਡੂ ਦਾ ਇੱਕ ਪ੍ਰਾਚੀਨ ਸ਼ਿਵ ਮੰਦਰ ਹੈ। ਪ੍ਰਧਾਨ ਮੰਤਰੀ ਨੇ ਮੰਦਰ ਕੰਪਲੈਕਸ ਦੇ ਅੰਦਰ 22 ਤੀਰਥਾਂ ’ਚ ਡੁਬਕੀ ਲਗਾਈ। ਇਹ 22 ਤੀਰਥ ਸਥਾਨ ਕੁਦਰਤੀ ਝਰਨੇ ਤੋਂ ਹਨ। ਇਨ੍ਹਾਂ ਵਿੱਚੋਂ ਹਰ ਇੱਕ ਨੂੰ ਤਾਮਿਲ ਵਿੱਚ ‘ਨਾਜ਼ੀ ਕਿਨਾਰੂ’ (ਖੂਹ) ਵਜੋਂ ਜਾਣਿਆ ਜਾਂਦਾ ਹੈ।
ਪੁਜਾਰੀਆਂ ਨੇ ਇੱਥੇ ਪ੍ਰਧਾਨ ਮੰਤਰੀ ਮੋਦੀ ਦਾ ਰਵਾਇਤੀ ਢੰਗ ਨਾਲ ਸਵਾਗਤ ਕੀਤਾ। ਪ੍ਰਧਾਨ ਮੰਤਰੀ ਨੇ ਮੰਦਰ ‘ਚ ਆਯੋਜਿਤ ਭਜਨ ਪ੍ਰੋਗਰਾਮ ‘ਚ ਵੀ ਸ਼ਿਰਕਤ ਕੀਤੀ। ਤਾਮਿਲਨਾਡੂ ਦੇ ਰਾਮਨਾਥਪੁਰਮ ਜ਼ਿਲੇ ਦੇ ਰਾਮੇਸ਼ਵਰਮ ਟਾਪੂ ‘ਤੇ ਸਥਿਤ ਸ਼ਿਵ ਮੰਦਰ ਦਾ ਸਬੰਧ ਵੀ ਰਾਮਾਇਣ ਨਾਲ ਹੈ। ਕਿਹਾ ਜਾਂਦਾ ਹੈ ਕਿ ਭਗਵਾਨ ਰਾਮ ਨੇ ਇੱਥੇ ਸ਼ਿਵਲਿੰਗ ਦੀ ਸਥਾਪਨਾ ਕੀਤੀ ਸੀ। ਭਗਵਾਨ ਰਾਮ ਅਤੇ ਦੇਵੀ ਸੀਤਾ ਨੇ ਇੱਥੇ ਪੂਜਾ ਕੀਤੀ ਸੀ। ਮੋਦੀ ਇੱਥੇ ਤਿਰੂਚਿਰਾਪੱਲੀ ਜ਼ਿਲੇ ਦੇ ਸ਼੍ਰੀ ਰੰਗਨਾਥਸਵਾਮੀ ਮੰਦਰ ‘ਚ ਪੂਜਾ ਕਰਨ ਤੋਂ ਬਾਅਦ ਹਵਾਈ ਫੌਜ ਦੇ ਹੈਲੀਕਾਪਟਰ ‘ਚ ਪਹੁੰਚੇ ਸਨ।
ਹਿੰਦੂਸਥਾਨ ਸਮਾਚਾਰ/ਸੁਰਿੰਦਰ/ਸੰਜੀਵ
