ୱାଶିଂଟନ, 19 ଅଗଷ୍ଟ (ହି.ସ.)- ରୁଷ-ୟୁକ୍ରେନ୍
ଯୁଦ୍ଧକୁ ସମାପ୍ତ କରିବା ପାଇଁ ସୋମବାର ଦିନ ଆମେରିକୀୟ ରାଷ୍ଟ୍ରପତି ଡୋନାଲ୍ଡ୍ ଟ୍ରମ୍ପ
ଯୁକ୍ରେନ୍ ରାଷ୍ଟ୍ରପତି ଭ୍ଲାଦିମିର ଜେଲେନସ୍କି ଓ ୟୁରୋପିୟ ୟୁନିୟନର ନେତାମାନଙ୍କ ସହିତ
ହ୍ୱାଇଟ୍ ହାଉସରେ ଗୁରୁତ୍ୱପୂର୍ଣ୍ଣ ବୈଠକ କରିଥିଲେ। ଏହି ସମୟରେ ଟ୍ରମ୍ପ ରୁଷ ରାଷ୍ଟ୍ରପତି
ଭ୍ଲାଦିମିର ପୁଟିନଙ୍କ ସହିତ ଫୋନରେ ଦୀର୍ଘ ସମୟ ଧରି ଆଲୋଚନା କରି ଦାବି କରିଛନ୍ତି ଯେ ରୁଷ ଓ
ଯୁକ୍ରେନ୍ ମଧ୍ୟରେ ଶାନ୍ତି ଆଲୋଚନା ହେବ, ଯାହା ପାଇଁ ସମୟ ଓ ସ୍ଥାନ
ଶୀଘ୍ର ନିର୍ଣ୍ଣୟ ହେବ।
ଏହି ବିଶେଷ ବୈଠକ ଉପରେ ସାରା
ପୃଥିବୀର ନଜର ରହିଥିଲା କାରଣ ତିନି ବର୍ଷ ଧରି ରୁଷ ଓ ଯୁକ୍ରେନ୍ ମଧ୍ୟରେ ଯୁଦ୍ଧ ଜାରି ରହିଛି।
ଆମେରିକୀୟ ରାଷ୍ଟ୍ରପତି ଡୋନାଲ୍ଡ୍ ଟ୍ରମ୍ପ ସୋମବାର ଦିନ ଯୁକ୍ରେନ୍ ରାଷ୍ଟ୍ରପତି ଜେଲେନସ୍କି ଓ
ୟୁରୋପୀୟ ଦେଶମାନଙ୍କର ଶୀର୍ଷ ନେତାମାନଙ୍କ ସହିତ ହୋଇଥିବା ବୈଠକ ପରେ ଦାବି କରିଛନ୍ତି ଯେ
ପୁଟିନ୍ ଓ ଜେଲେନସ୍କି ମଧ୍ୟରେ ବୈଠକ ଯୋଜନା ହେଉଛି। ହ୍ୱାଇଟ୍ ହାଉସରେ ହୋଇଥିବା ଏହି
ବହୁପକ୍ଷୀୟ ବୈଠକ ପରେ ଟ୍ରମ୍ପ ତାଙ୍କ ସୋସିଆଲ୍ ମିଡିଆ ପ୍ଲାଟଫର୍ମ ଟ୍ରୁଥ୍
ସୋସିଆଲ୍ ରେ ଲେଖିଛନ୍ତି, ସ୍ୱତନ୍ତ୍ର ଅତିଥିମାନଙ୍କ
ସହିତ ବୈଠକ ବହୁତ ଭଲ ହେଲା। ରାଷ୍ଟ୍ରପତି ପୁଟିନ୍ ସହିତ ମଧ୍ୟ କଥାହେଲା, ଯାହା ମାଧ୍ୟମରେ ଜେଲେନସ୍କି ଓ ରୁଷୀୟ ନେତାମାନଙ୍କ ମଧ୍ୟରେ ବୈଠକର ଆୟୋଜନ ଆରମ୍ଭ କରାଯିବ।
ଉପରାଷ୍ଟ୍ରପତି ଜେ.ଡି. ୱେନ୍ସ, ବିଦେଶମନ୍ତ୍ରୀ ମାର୍କୋ
ରୁବିଓ ଓ ବିଶେଷ ଦୂତ ସ୍ଟିଭ୍ ବିଟ୍କଫ୍ ଏହି ଗୁରୁତ୍ୱପୂର୍ଣ୍ଣ ବୈଠକର ଯୋଜନା ପାଇଁ ରୁଷ ଓ
ଯୁକ୍ରେନ୍ ସହିତ ସମନ୍ୱୟ କରିବେ।
—————
ହିନ୍ଦୁସ୍ଥାନ ସମାଚାର / ସ୍ୱାଗତିକା
