मल्ली, 06 अप्रेल । सिक्किम क्रान्तिकारी मोर्चा पार्टीको विजयी भवः जनसभा नाम्ची जिल्लाको चारवटा निर्वाचन क्षेत्रका लागि आज मल्ली बजार खेलमैदानमा आयोजना भइरहेको छ। चुनाउ प्रचारका लागि आयोजित दोस्रो दिनको सभा नाम्ची सिङ्गीथाङ, नामथाङ रातेपानी, मल्ली र पोकलोक कामराङ निर्वाचन क्षेत्रका लागि रहेको छ।
सभामा पार्टी अध्यक्ष पीएसङ, लोकसभा उम्मेदवार इन्द्रहाङ सुब्बा, उम्मेदवारहरू कृष्ण कुमारी राई, सञ्जीत खरेल, एनबी प्रधान र भोजराज राई उपस्थित रहेका छन्।
उल्लेखनीय छ, आगामी 19 अप्रेलको दिन राज्यमा 32 विधानसभा आसन र एउटा लोकसभा आसनका लागि एकैसाथ चुनाउ भइरहेको छ। यसपल्टको चुनाउमा पाँच वर्षमा गरेको विकासको रिपोर्टलाई आधार बनाएर 32 मा 32 अथवा सलिड एसकेएम-को नारा लिएर एसकेएम जनतासमक्ष आएको छ।
पाँच वर्ष सत्तामा बसेको एसकेएम पार्टीका नेतृत्वहरूले चाहिँ धेरै धेरै वर्षसम्म सिक्किमको सत्तामा बसिरहने दावी गरिरहेका छन् र आफ्नो चुनाउ प्रचारलाई तीब्र पारिरहेका छन्। अर्कोतिर शुक्रवार पश्चिम सिक्किमको च्याखुङ खेल मैदानबाट आगामी पाँच वर्षभित्रमा नौवटा प्रमुख क्षेत्रमा काम गर्ने ग्यारेन्टीका साथ एसकेएमले आफ्नो चुनावी घोषणापत्र पनि जारी गरिसकेको छ।
11औं सिक्किम विधानसभा र 18औं लोकसभा चुनाउका लागि जारी गरेको घोषणा पत्रलाई सिक्किम क्रान्तिकारी मोर्चा पार्टीले मुख्यमन्त्री गोलेका 9 ग्यारेन्टीका रुपमा अघि राखेको छ। एसकेएम अध्यक्ष तामाङले हिजो नै गेजिङ जिल्लाको चारवटा निर्वाचन क्षेत्रका जनतालाई पनि सम्बोधन गरेका थिए आजको कार्यक्रममा मुख्यमन्त्रीको भाषणमा सबैको ध्यान अडिएको छ।
