गान्तोक, 10 जुलाई (हि.स.)। अन्तरराष्ट्रिय स्तरको नृत्य प्रतियोगिता ‘क्ल्याश अफ् डान्सर्स 2.0’ को अडिशन राजधानी गान्तोकमा हुने भएको छ। राजधानीको मनन केन्द्रमा हुने अडिशनमा समर्पण लामा, नर्बु लामा, सुष्मिता तामाङ लगायत फ्लोरिना गोगोई जस्ता चर्चित सेलिब्रेटीहरूको पनि विशेष उपस्थिति रहनेछ। उक्त जानकारी एसकेएम पार्टीको सांस्कृति शाखाले आज राजधानीमा आयोजित एक पत्रकार सम्मेलनमा दिए।
एसकेएम संस्कृति शाखाका राज्य समन्वयक मनोज लामाले ‘क्ल्याश अफ् डान्सर्स 2.0’ को आगामी 28 र 29 जुलाईमा राजधानीको मनन केन्द्रमा अडिशन सम्पन्न हुने जानकारी गराए। उनले यो अडिशन मुख्यमन्त्री प्रेमसिंह तामाङको विशेष मार्गदर्शनमा सिक्किमका प्रतिभावान कलाकारहरूलाई ध्यानमा राखेर आयोजना भइरहेको जानकारी गराए। उनले यो अडिशन गान्तोकमा आयोजना भइरहे तापनि यसमा देश-विदेशका इच्छुक कसैले पनि भाग लिन सक्ने बताए। यद्यपि, सिक्किमका 10 देखि 15 जनालाई चयन गरेर अर्को चरणमा लैजाने निर्धारित रहेको उनले थप जानकारी गराएका छन्।
उनले पहिलो पटक राजधानीमा यति ठूलो प्रतियोगिताको अडिशन सम्पन्न भइरहेको छ भन्दै राज्यका कलाकारहरूलाई यस अवसरमा भरपूर फाइदा उठाउन आह्वन गरे। उनले यहॉं अडिशनमा चयनित कलाकारहरूले आफ्ना रहल प्रस्तुतिहरू काठमाडौंमा दिनुपर्ने अवगत गराए। उनले यस प्रतियोगिताको विशेषता भनेको यसका विजेताहरूको चयन भोटिङद्वारा नभएर पूर्ण रूपमा निर्णायकहरूद्वारा प्रतिभाको आधारमा गरिने बताए।
राज्य समन्वयक लामाले अडिशन समापनपछि दोस्रो दिन समर्पण लामा, नर्बु लामा, सुष्मिता तामाङ र फ्लोरिना गोगोईले आफ्नो विशेष प्रस्तुति दिनेछन् भनी बताए। उनले राज्यवासीहरूलाई यस सुनौलो अवसरको फाइदा उठाउन आह्वान गरे।
यसरी नै एसकेएम संस्कृति शाखाका उपाध्यक्ष प्रभारी टाशी छिरिङ भोटियाले सिक्किमका कलाकारहरूलाई प्रोत्साहित गरेकोमा धन्यवाद दिए। उनले सिक्किमै अडिशन गराउनु पर्छ र यहॉंका कलाकारहरूले मौका पाउनुपर्छ भन्ने सोचका कारण आज यस प्रतियोगिताको अडिशन राजधानीमा भइरहेको बताए। उनले रियालिटी शोहरूमा भोटिङद्वारा विजेताहरूको छनोट हुने हुनाले हामीहरू सबै थाकिसकेको छौं भने। यद्यपि, यस प्रतियोगिताको विजेता पूर्ण रूपमा प्रतिभाको आधारमा चयन गरिने उनले बताए।
यस अतिरिक्त, उनले आगामी अडिशनमा भाग लिने सिक्किमे कलाकारहरूको निम्ति प्रवेश नि:शुल्क गरिएको पनि घोषणा गरे। यस अतिरिक्त, स्थानीय कलाकारहरूलाई प्याकेट लञ्चको व्यवस्था पनि गरिने उनले बताए। उपाध्यक्ष प्रभारी भोटियाले अभिभावकहरूलाई उक्त दिन आफ्ना नानीहरू लिएर अडिशनका लागि उपस्थित भइदिन आह्वान गरे।
यस अघि एसकेएम संस्कृति शाखाकी सचिव कोमल गुरुङले अडिशन सबैका लागि खुल्ला रहेकाले कडा प्रतिस्पर्धा हुने बताइन्। उनले अडिशनको लागि बाहिर जानु पर्ने छैन भन्दै स्थानीय कलाकारहरूको लागि यो ठूलो अवसर रहेको बताइन्। उनले इच्छुक प्रतियोगिताहरूले एकल, युगल र समूह वर्गमा भाग लिन सक्ने पनि अवगत गराइन्।
यसैगरी, एसकेएम संस्कृति शाखाका उपाध्यक्ष डा. मनोज राईले सिक्किमका केवल 10 देखि 15 जना छनोट गरिने हुनाले प्रतिस्पर्धा कडा हुने बताए। उनले यो प्रतियोगिता अन्य रियालिटी शोहरूभन्दा छुट्टै किसिमको रहेकाले आफूहरू अघि आएको बताए। उनले कलाकारहरूको निम्ति यो एउटा वास्तविक मञ्च रहेको बताउॅंदै यहॉं प्रतिभाको आधारमा विजेताको चयन हुने बताए।
हिन्दुस्थान समाचार / बिशाल
