नयाँ दिल्ली, १७ दिसम्बर (हि.स.)। नेशनल हेराल्ड धनशोधन मुद्दामा प्रवर्तन निर्देशनालय (ईडी) ले दायर गरेको चार्जशीटमाथि दिल्लीको अदालतले संज्ञान लिन अस्वीकार गरेपछि बुधबार विपक्षी सांसदहरूले संसद भवन परिसरको मकर द्वार नजिक विरोध प्रदर्शन गरे। कांग्रेससहित विपक्षी दलका सांसदहरूले यसलाई केन्द्रिय एजेन्सीहरूको कथित दुरुपयोगको विषय भन्दै सरकारसँग जवाफ मागे र प्रधानमन्त्री नरेन्द्र मोदीसँग माफी माग्दै राजीनामाको माग गरे।
यस क्रममा सांसदहरूको हातमा ‘सत्यमेव जयते’ लेखिएको ठूलो ब्यानर थियो र उनीहरूले “प्रधानमन्त्री माफी माग” तथा “प्रधानमन्त्री राजीनामा देऊ” भन्ने नाराहरू लगाए। प्रदर्शनमा कांग्रेस महासचिव के.सी. वेणुगोपाल, शशि थरूर, राजीव रञ्जन, पप्पु यादवसहित धेरै सांसदहरू सहभागी थिए।
कांग्रेस महासचिव के.सी. वेणुगोपालले अदालतको फैसलाले सत्य बाहिर आएको बताए र अब कांग्रेस कार्यकर्ताहरूले यस विषयलाई अझ तीव्र बनाउने बताए।
कांग्रेस सांसद मणिकम ट्यागोरले संसद भवन परिसरमा पत्रकारहरूसँग कुरा गर्दै अदालतले ईडीको दुरुपयोगबारे स्पष्ट जवाफ दिएको बताए। पछिल्ला १० वर्षदेखि सरकारले नेशनल हेराल्ड मुद्दालाई लिएर झुटो प्रचार गरेको र अब दिल्ली अदालतको फैसलाले सत्य उजागर भएको बताए।
शिवसेना (यूबीटी) समूहकी सांसद प्रियंका चतुर्वेदीले पत्रकारहरूसँग कुरा गर्दै ईडी पूरै सरकारको एजेन्डाअनुसार काम गरिरहेको देखिएको बताइन्। नेशनल हेराल्ड मुद्दामा न त कुनै तथ्यात्मक आधार छ न त कुनै सत्यता नै छ, त्यसैले अदालतहरूले यसमाथि प्रश्न उठाएको उनको भनाइ थियो।
—————
हिन्दुस्थान समाचार / भवानी थामी
