ट्विटरवर दिली काँग्रेस पक्ष सोडल्याची माहिती
मुंबई, 08 फेब्रुवारी : काँग्रेसचे ज्येष्ठे नेते बाबा सिद्दिकी यांनी पक्ष सदस्यत्वाचा राजीनामा दिला आहे. सिद्द्की यांनी ट्विटकरत आपल्या राजीनाम्याची माहिती दिली आहे. काही दिवसांपूर्वी मिलींद देवरा यांनी पक्षत्याग करत शिवसेनेत प्रवेश केला होता. त्यानंतर तब्बल 48 वर्षे काँग्रेसमध्ये असलेल्या सिद्दीकी यांनी राजीनामा दिला आहे. दरम्यान सिद्दीकी अजित पवारांच्या राष्ट्रवादीत जाणार असल्याची चर्चा राजकीय वर्तुळात आहे.
काँग्रेसचे ज्येष्ठ नेते बाबा सिद्दीकी यांनी नगरसेवक म्हणून आपल्या राजकीय कारकिर्दीला सुरुवात केली होती. ते 1992 मध्ये पहिल्यांदा मुंबई महापालिकेत निवडून गेले. तसेच 1997 मध्येही ते पालिकेची निवडणूक जिंकले होते. त्यानंतर 1999 मध्ये मुबईतील वांद्रे पश्चिम विधानसभा मतदारसंघातून 1999 मध्ये पहिल्यांदा विधानसभेत निवडून गेले. त्यानंतर 2004 आणि 2009 मध्ये त्यांनी विजय मिळवला. तसेच 2004 ते 2008 या कालावधीत ते राज्यमंत्री राहिले. आमदार होण्यापूर्वी ते दोन टर्म नगरसेवक होते. प्रदीर्घ राजकीय अनुभव असलेल्या सिद्दीकी यांनी काँग्रेससोबतच प्रवास थांबवत असल्याबद्दलची माहिती सोशल मिडीयावर दिली.
आपल्या संदेशात सिद्दीकी म्हणाले की, ‘मी तरुणपणी भारतीय राष्ट्रीय काँग्रेस पक्षात सहभागी झालो होतो. तब्बल 48 वर्षांचा दीर्घ आणि महत्त्वाचा हा प्रवास होता. मात्र आज मी तातडीने काँग्रेस पक्षाच्या प्राथमिक सदस्यत्वाचा राजीनामा देण्याचा निर्णय घेतला आहे. मला खूप काही व्यक्त करायला आवडले असते, पण काही गोष्टींबाबत मौन बाळगणेच चांगले असल्याचे म्हटले जाते. माझ्या प्रवासात सहभागी झालेल्या सर्वांचे मी आभार मानतो असे सिद्दीकी यांनी पोस्टमध्ये नमूद केले आहे. बाबा सिद्दीकी यांचा मुलगा झीशान सिद्दीकी विद्यमान आमदार आहे. झीशान अजित पवार गटात जाणार असल्याची चर्चा रंगली होती. पण झीशान यांनी नाकारले होते. परंतु, अजित पवारांशी आपले सलोख्याचे संबंध आहेत. आपल्या कठीण काळात त्यांनी साथ दिल्याचे झीशान सिद्दीकी यांनी म्हटले होते त्यामुळे येत्या काळात झिशान आणि बाबा सिद्दीक राष्ट्रवादी काँग्रेसमध्ये जातील अशी राजकीय वर्तुळात चर्चा आहे.
