सर्व अपघातग्रस्त नाशिक जिल्ह्यातील रहिवासी
छ. संभाजीनगर 15 ऑक्टोबर : छत्रपती संभाजी नगरच्या समृद्धी महामार्गावर झालेल्या अपघातात जीव गमावणारे सर्व भाविक नाशिक जिल्ह्यातील रहिवासी होता. हे सर्वजण बुलढाणा जिल्ह्यातील बाबा सैलानी यांच्या मजारचे दर्शन घेऊन घर परत निघाले होते. यामध्ये 12 जणांचा घटनास्थळी मृत्यू झाला असून उर्वरित प्रवाशांवर रुग्णालयात उपचार सुरू आहेत.
यासंदर्भात वरिष्ठ पोलिस अधिकाऱ्यांकडून प्राप्त माहितीनुसार नाशिक जिल्ह्यातील भाविक मिनी ट्रॅव्हल्सने बुलढाणा जिल्ह्यातील बाबा सैलानीच्या मजारचे दर्शन करण्यासाठी गेले होते. दर्शन आटोपून परत येताना छत्रपती संभाजीनगर जिल्ह्यातील वैजापूर तालुक्यामधल्या जांबरगाव टोल प्लाजा येथे या भाविकांचा वाहनाने एका ट्रकला पाठीमागून धडक दिली. मध्यरात्री 1.30 वाजेच्या सुमाराला घडलेला हा अपघात इतका भीषण होता की, यात 12 जणांचा घटनास्थळीच मृत्यू झाला. तर उर्वरित इतर प्रवासी जखमी झालेत. या अपघाताची माहिती मिळताच वैजापूरसह आजूबाजूच्या गावातील नागरिकांनी घटनास्थळी धाव घेतली. अपघातग्रस्तांना तात्काळ मदत करण्यात आली. सर्व जखमींना रुग्णवाहिकेतून शासकीय रुग्णालयात दाखल करण्यात आले. तसेच, घटनास्थळी समृद्धी महामार्गावरील बचाव पथक, वैजापूर पोलीस देखील दाखल झाले.
अपघाताच्या वैळी ट्रॅव्हल्समध्ये 30 प्रवासी होते. त्यापैकी तनुश्री लखन सोळसे ( वय 5 वर्षे, रा. समतानगर,नाशिक) संगीता विलास आठवले (वय 40 वर्षे,वणसगाव, निफाड,नाशिक) अंजाबाई रमेश जगताप (वय 38 वर्षे, रा. राजूनगर नाशिक) रतन जमधडे (वय 45 वर्षे, संत कबीर नगर नाशिक) काजल लखन सोळसे (वय 32 वर्षे, गवळाणी नाशिक) रजनी गौतम तपासे (वय 32 वर्षे, गवळाणी नाशिक) हौसाबाई आनंदा शिरसाट (वय 30 वर्ष, उजगाव निफाड, नाशिक) झुंबर काशिनाथ गांगुर्डे (वय 50 वर्षे, रा. राजूनगर नाशिक) अमोल झुंबर गांगुर्डे (वय 18 वर्षे) सारिका झुंबर गांगुर्डे (वय 40 वर्षे) मिलिंद पगारे (वय 50 वर्षे, कोकणगाव ओझर, निफाड, नाशिक) दीपक प्रभाकर केकाणे (वय 47 वर्षे, रा. बसमत पिपळगाव नाशिक) अशा 12 प्रवाशांचे या दुर्घटनेत मृत्यू झाला आहे. दरम्यान या अपघाताबद्दल पंतप्रधान नरेंद्र मोदी यांनी शोक व्यक्त केलाय.
