नवी दिल्ली, 02 डिसेंबर (हिं.स.) : वित्त मंत्रालयाने शुक्रवारी जारी केलेल्या आकडेवारीनुसार गेल्या वर्षीच्या तुलनेत यंदाच्या नोव्हेंबर महिन्यातील वस्तू व सेवा कर (जीएसटी) संकलनात 15 टक्के वाढ झालीय. यंदा नोव्हेंबरमध्ये 1.68 लाख कोटींचे जीएसटी संकलन झालेय. नोव्हेंबर 2023 मध्ये जीएसटी संकलनाच्या बाबतीत महाराष्ट्र हे टॉप 3 राज्यांमध्ये अव्वल आहे. गेल्या वर्षीच्या तुलनेत महाराष्ट्रात जीएसटी संकलन 17 टक्के वाढून 21,611 कोटी रुपये झाले आहे. या यादीत 10,238 कोटींच्या कलेक्शनसह कर्नाटक दुसऱ्या स्थानावर आहे. गुजरात 9,333 कोटींच्या कलेक्शनसह तिसऱ्या क्रमांकावर आहे.
नोव्हेंबर 2023 हा महिना सरकारसाठी उत्तम महिना ठरला आहे. सलग नवव्या महिन्यात मासिक जीएसटी संकलन 1.5 लाख कोटी रुपयांच्या वर पोहोचले आहे. वित्त मंत्रालयाच्या म्हणण्यानुसार, नोव्हेंबर 2022 च्या तुलनेत नोव्हेंबर 2023 मध्ये जीएसटी संकलनात 15 टक्क्यांनी वाढ झाली आहे. आर्थिक वर्ष 2023-24 मध्ये ही सहावी वेळ आहे जेव्हा GST संकलन 1.60 लाख कोटी रुपयांपेक्षा जास्त झाले आहे. जीएसटी संकलनात या वाढीमागील कारण म्हणजे सणासुदीचा काळ. नोव्हेंबर महिन्यात दिवाळी, धनत्रयोदशी, छठ या सणांमुळे जीएसटी संकलनात मोठी वाढ आली आहे. नोव्हेंबर 2023 मध्ये एकूण जीएसटी संकलन 1,67,929 कोटी रुपये होते. मात्र ऑक्टोबर 2023 च्या तुलनेत नोव्हेंबरमध्ये जीएसटी संकलनात घट झाली आहे. ऑक्टोबर महिन्यात जीएसटी संकलन 1.72 लाख कोटी रुपये होते. सप्टेंबर महिन्यात 162712 कोटी रुपये, ऑगस्ट महिन्यात 159068 कोटी रुपये, जुलै महिन्यात 165105 कोटी रुपये, जून महिन्यात 161497 कोटी रुपये, मे महिन्यात 187035 कोटी रुपये आणि एप्रिल महिन्यात 187035 कोटी रुपये जीसटी संकलन झाले आहे.
वित्त मंत्रालयाने सांगितले की, नोव्हेंबर 2023 मध्ये जीएसटी संकलन 1,67,929 कोटी रुपये होते. यामध्ये केंद्रीय जीएसटी (सीजीएसटी) 30,420 कोटी रुपये, राज्य जीएसटी (एसजीएसटी) 38,226 कोटी रुपये, एकात्मिक जीएसटी (आयजीएसटी) 87,009 कोटी रुपये (वस्तूंच्या आयातीवर गोळा केलेल्या 39,198 कोटी रुपयांसह) आणि उपकर 12,274 कोटी रुपये होता. उपकरामध्ये वस्तूंच्या आयातीतून मिळालेल्या 1,036 कोटी रुपयांचा समावेश आहे.आर्थिक वर्ष 2023-24 मध्ये म्हणजेच गेल्या 8 महिन्यांत आतापर्यंत एकूण 13.32 लाख कोटी रुपयांचे जीएसटी संकलन झाले आहे. तर गेल्या आर्थिक वर्ष 2022-23 मध्ये एकूण जीएसटी संकलन 18.10 लाख कोटी रुपये होते.
हिंदुस्थान समाचार
