काठमांडू, २ ऑगस्ट (हिं.स.) – भारत आणि नेपाळ यांच्यातील करारानुसार भारत सरकारच्या आर्थिक सहकार्याने नेपाळमधील पेट्रोलियम पाईपलाईनच्या दुसऱ्या टप्प्याचा विस्तार सुरु करण्यात आला आहे.
बिहार राज्यातील मोतिहारी येथून नेपाळमधील अमलेखगंजपर्यंत यापूर्वी उभारण्यात आलेल्या पाईपलाईनचा विस्तार आता चितवन जिल्ह्यातील लोथरपर्यंत केला जात आहे. भारत सरकारकडून या पाईपलाईनद्वारे इंधनाच्या सुलभ पुरवठ्यासोबतच वाहतूक खर्चातही मोठी बचत होणार आहे. या विस्तारासोबतच तीन महिन्यांच्या साठवणूक क्षमतेसह एक आधुनिक पेट्रोलियम डिपो लोथरमध्ये उभारण्यात येणार आहे.
नेपाळ ऑईल कॉर्पोरेशन (एनओसी) ने लोथर येथे प्रकल्पाच्या प्रादेशिक कार्यालयाचे उद्घाटन करत पाईपलाईन विस्ताराची औपचारिक सुरुवात केली. राप्ती नगरपालिका-१ येथील सुमारे २३ बीघा आणि १२ कट्ठा क्षेत्रावर ग्रीनफिल्ड तत्त्वावर हा टर्मिनल उभारण्यात येणार आहे.
एनओसीनुसार, भारतातील इंडियन ऑईल कॉर्पोरेशनच्या (IOC) मोतिहारी डिपोमधून थेट लोथरपर्यंत इंधन पाठवले जाणार आहे. सध्या मोतिहारी ते अमलेखगंजपर्यंत पेट्रोल आणि डिझेल पुरवठा केला जात आहे. विस्ताराच्या दुसऱ्या टप्प्यात अमलेखगंज ते लोथर या ६२ किमी अंतरावर १०.७५ इंच व्यासाच्या पाईपलाईनचे काम शनिवारी सुरू करण्यात आले.
या प्रकल्पाचे प्रमुख अभियंता प्रदीप कुमार यादव यांनी सांगितले की, सर्व आवश्यक प्रक्रिया पूर्ण करून आजपासून प्रत्यक्ष कामास सुरुवात झाली आहे. हा प्रकल्प तीन वर्षांच्या आत पूर्ण करण्याचे उद्दिष्ट आहे. त्यांनी सांगितले की, ही पाईपलाईन पर्यावरणीय परिणाम कमी करेल, इंधन चोरी रोखेल आणि भेसळ टाळेल. स्थानिक समन्वयातून रोजगार व इतर संधी देखील निर्माण होतील, असे त्यांनी स्पष्ट केले.
सहायक प्रबंधक अनुपम पराजुली यांनी सांगितले की, ही पाईपलाईन दरतास २७३ किलोलीटर पेट्रोलियम पुरवठा करू शकेल. ही पाईपलाईन पूर्व–पश्चिम महामार्गाच्या समांतर चालणार असून दरवर्षी सुमारे २० लाख टन इंधन वाहतूक करण्याची क्षमता असेल.
या प्रकल्पात लोथरमध्ये १६० चौरस मीटर क्षेत्रावर एक पाईपलाईन स्टेशन देखील उभारले जात आहे. याशिवाय, पेट्रोलसाठी ११,००० किलोलीटर क्षमतेचे तीन उभे टँक, डिझेलसाठी १५,५०० किलोलीटर एकत्रित क्षमतेचे तीन टँक आणि केरोसीनसाठी ८०० किलोलीटर क्षमतेचे दोन टँक उभारण्याचे काम सुरू आहे.
—————
हिंदुस्थान समाचार / हर्षदा गावकर
