तेहरान, 02 जानेवारी (हिं.स.)।इराणची ढासळलेली अर्थव्यवस्था यामुळे सुरू झालेले विरोध आंदोलन आता ग्रामीण भागातही पसरले आहे. या आंदोलनादरम्यान झालेल्या हिंसाचारात किमान ७ जणांचा मृत्यू झाला आहे. यापैकी पाच जणांचा मृत्यू गुरुवारी, तर एका व्यक्तीचा मृत्यू बुधवारी झाला होता. या चकमकींमध्ये इराणच्या अर्धसैनिक दलातील (पॅरामिलिटरी फोर्सेस) एका जवानाचाही मृत्यू झाला असून १३ हून अधिक जण जखमी झाले आहेत.
हिंसक आंदोलनादरम्यान झालेल्या मृत्यूंनंतर आंदोलक अधिकच नियंत्रणाबाहेर होत असल्याचे चित्र आहे. तेहरानमधून सुरू झालेले हे आंदोलन आता इराणमधील ५० पेक्षा अधिक शहरांपर्यंत पोहोचले आहे. वाढती महागाई हा या आंदोलनाचा मुख्य मुद्दा असून, सुरक्षादलांच्या कारवाईनंतर आंदोलनाला आणखी तीव्र स्वरूप आले आहे.
सर्वाधिक हिंसक चकमकी तेहरानच्या दक्षिण-पश्चिमेला सुमारे ३०० किलोमीटर अंतरावर असलेल्या अजना शहरात झाल्या आहेत. हे शहर इराणच्या लोरेस्तान प्रांतात येते. याचप्रमाणे लोर्देगान शहरातही सुरक्षादल आणि सशस्त्र आंदोलकांमध्ये तीव्र संघर्ष झाला आहे. अहवालांनुसार आंदोलकांनी राज्यपालांच्या कार्यालयाला आग लावली आहे. काही शहरांमध्ये इराण रिव्होल्युशनरी गार्डच्या इमारतींवर आंदोलकांनी ताबा मिळवला असल्याचेही वृत्त आहे. तसेच न्यायालयांच्या इमारतींमध्येही आंदोलकांनी ठिय्या आंदोलन सुरू केले आहे.
इराणच्या सरकारी माध्यमांनी ६ जणांना अटक करण्यात आल्याचे सांगितले असले, तरी या अटकांची कारणे स्पष्ट करण्यात आलेली नाहीत. आंतरराष्ट्रीय माध्यमांच्या माहितीनुसार, वेगवेगळ्या शहरांमध्ये एकूण २० जणांना अटक करण्यात आली आहे. इराणमधील या आंदोलनांची सुरुवात राजधानी तेहरानमधून झाली होती. सर्वप्रथम तेहरानमधील व्यापाऱ्यांनी व्यवसायाची स्थिती बिघडत चालल्याच्या निषेधार्थ मोर्चा काढला. त्यानंतर या आंदोलनात तेहरान विद्यापीठातील विद्यार्थीही सहभागी झाले. पुढे हा असंतोष इतर शहरांमध्ये पसरला आणि सध्या संपूर्ण इराणमध्ये आंदोलक रस्त्यावर उतरले आहेत.
—————
हिंदुस्थान समाचार / Priyanka Bansode
