मुंबई, २१ डिसेंबर (हिं.स.) : सईशा प्रोडक्शन्स, मुंबई आणि बोरिवली सांस्कृतिक केंद्र यांच्या संयुक्त विद्यमाने पहिल्यांदाच बोरिवलीत छत्रपती शिवाजी महाराज आणि शिवचरित्र या विषयांना संपूर्णतः वाहिलेल्या तीन दिवसीय भव्य अशा उपक्रमाचे आयोजन करण्यात आले आहे. ३५० व्या शिवराज्याभिषेकाचा वर्षसोहळा हे याचे निमित्त आहे.
सदर उपक्रमाची तीन दिवसीय रूपरेषा खालीलप्रमाणे –
1. शिवसंस्कार काव्यदालन – संपूर्ण शिवचरित्र, आपली संस्कृती, आपले गडदुर्ग, शिवकाळातील परिचित-अपरिचित योद्धे आणि अशा सर्वच विषयांवर आधारित १०० चित्रकाव्यांचे भव्य प्रदर्शन दि. २२ ते २४ डिसेंबर या कालावधीत ज्ञानसागर अँफी थिएटर येथे भरविण्यात येणार आहे. दि. २२ डिसेंबर संध्याकाळी ५ ते ९ आणि दि. २३ व २४ डिसेंबर सकाळी १० ते रात्री ९ वाजेपर्यंत. (हे काव्यदालन विनामूल्य असेल.)
2. शिवचरित्रातून प्रेरणा – भारतीय सैन्यातील मराठा लाईट इन्फेन्ट्रीचे ट्रेनिंग ऑफिसर कॅप्टन पी. विक्रम यांचे शिवचरित्रातून प्रेरणा आणि मराठा रेजिमेंन्टचे कर्तृत्व यावर स्फूर्तिदायी व्याख्यान दुसऱ्या दिवशी म्हणजेच शनिवार, दि. २३ डिसेंबर रोजी सायं. ५.३० वाजता. (प्रवेश विनामूल्य).
3. संगीत शिवस्वराज्यगाथा या संपूर्ण शिवशाहीवर आधारित ४२ नवगीतांमधून साकारलेल्या धगधगत्या संगीतमय शिवचरित्राचे सादरीकरण रविवार, दि. २४ डिसेंबर रोजी सायं. ६.३० वाजता होईल. गायक श्रीरंग भावे, नचिकेत देसाई, केतकी भावे जोशी हे असतील, तर ओघवत्या शैलीतील शिवचरित्र कथन पद्मश्री राव यांचे असेल. शिवकाव्यांचे सादरीकरण हे स्वतः अनिल नलावडे करतील. या गीतांना भव्य एलईडी स्क्रीनवर जुन्या ऐतिहासिक चलचित्रांची साथसोबत असेल. (प्रवेशशुल्क: रु. १५०/- तिकिटांसाठी खाली दिलेल्या नंबरवर संपर्क करावा).
अशा या शिवचरित्रातील आचार, विचार, संस्कारांनी प्रेरित तीन दिवसीय भव्य उपक्रमास आपण सर्वांनीच आपल्या कुटुंबियांसहित, मित्रपरिवारांसहित भेट द्यावी. तसेच शाळा, महाविद्यालये आणि परिसरातील तरुण पिढीने याचा जरूर तो लाभ घ्यावा. अधिक माहितीसाठी ९८२१५५४१३० या क्रमांकावर संपर्क साधावा, असे आवाहन सईशा प्रोडक्शन्स, मुंबई आणि बोरिवली सांस्कृतिक केंद्र करीत आहेत.
हिंदुस्थान समाचार
