ನವದೆಹಲಿ, 04 ನವೆಂಬರ್ (ಹಿ.ಸ.) :
ಆ್ಯಂಕರ್ : ಭಾರತದಿಂದ ಪೌಷ್ಟಿಕಾಂಶ ಸಮೃದ್ಧ ಅಕ್ಕಿಯ ರಫ್ತು ಕ್ಷೇತ್ರದಲ್ಲಿ ಐತಿಹಾಸಿಕ ಹೆಜ್ಜೆ ಇಡಲಾಗಿದೆ. ಮೊದಲ ಬಾರಿಗೆ, ಛತ್ತೀಸ್ಗಢದಿಂದ 12 ಮೆಟ್ರಿಕ್ ಟನ್ ಫೋರ್ಟಿಫೈಡ್ ರೈಸ್ ಕರ್ನಲ್ ಅನ್ನು ಕೋಸ್ಟರಿಕಾಗೆ ರಫ್ತು ಮಾಡಲಾಗಿದೆ.
ಕೇಂದ್ರ ವಾಣಿಜ್ಯ ಮತ್ತು ಕೈಗಾರಿಕಾ ಸಚಿವಾಲಯದ ಪ್ರಕಾರ, ಈ ರಫ್ತು ಪ್ರಧಾನಮಂತ್ರಿ ನರೇಂದ್ರ ಮೋದಿಯವರ “ಅಪೌಷ್ಟಿಕತೆ ಮುಕ್ತ ಭಾರತ” ಅಭಿಯಾನದ ಭಾಗವಾಗಿದೆ. ದೇಶಾದ್ಯಂತ ಭಾರತೀಯ ಆಹಾರ ನಿಗಮ ಬಲವರ್ಧಿತ ಅಕ್ಕಿಯನ್ನು ವಿತರಿಸುತ್ತಿರುವ ವೇಳೆ, ಈ ಅಂತಾರಾಷ್ಟ್ರೀಯ ರಫ್ತು ಭಾರತದ ಪೌಷ್ಟಿಕ ಮಿಷನ್ ಅನ್ನು ಜಾಗತಿಕ ವೇದಿಕೆಗೆ ಕೊಂಡೊಯ್ಯುತ್ತದೆ.
ಈ ಸಾಧನೆಯ ಕುರಿತು ಪ್ರತಿಕ್ರಿಯಿಸಿದ APEDA ಅಧ್ಯಕ್ಷ ಅಭಿಷೇಕ್ ದೇವ್, “ಬಲವರ್ಧಿತ ಅಕ್ಕಿಯ ರಫ್ತು ಭಾರತದ ಕೃಷಿ ಸಾಮರ್ಥ್ಯವನ್ನು ಮಾತ್ರವಲ್ಲ, ಅಪೌಷ್ಟಿಕತೆಯನ್ನು ಎದುರಿಸುವ ದೇಶದ ಬದ್ಧತೆಯನ್ನೂ ಪ್ರತಿಬಿಂಬಿಸುತ್ತದೆ” ಎಂದು ಹೇಳಿದರು. ಅವರು ಮುಂದುವರೆದು, ರಫ್ತುದಾರರು ಹೊಸ ಮಾರುಕಟ್ಟೆಗಳಿಗೆ ವ್ಯಾಪ್ತಿಯನ್ನು ವಿಸ್ತರಿಸಲು APEDA ಸಂಪೂರ್ಣ ಬೆಂಬಲ ನೀಡುತ್ತದೆ ಎಂದರು.
ಛತ್ತೀಸ್ಗಢ ಅಕ್ಕಿ ರಫ್ತುದಾರರ ಸಂಘದ ಅಧ್ಯಕ್ಷ ಮುಖೇಶ್ ಜೈನ್, ಈ ಯಶಸ್ಸು ಮುಂದಿನ ದಿನಗಳಲ್ಲಿ ಇತರ ದೇಶಗಳಿಗೆ FRK ರಫ್ತು ಮಾಡಲು ದಾರಿ ತೆರೆದಿದೆ ಎಂದು ಹೇಳಿದರು. ಅವರು APEDA ನೀಡಿದ ಸಹಕಾರಕ್ಕೆ ಕೃತಜ್ಞತೆ ವ್ಯಕ್ತಪಡಿಸಿದರು.
ಬಲವರ್ಧಿತ ಅಕ್ಕಿ ಕಾಳುಗಳು ಅಕ್ಕಿ ಹಿಟ್ಟಿನಲ್ಲಿ ಕಬ್ಬಿಣ, ಫೋಲಿಕ್ ಆಮ್ಲ ಮತ್ತು ವಿಟಮಿನ್ B12 ನಂತಹ ಪೋಷಕಾಂಶಗಳನ್ನು ಸೇರಿಸುವ ಮೂಲಕ ತಯಾರಾಗುತ್ತವೆ. ಸಾಮಾನ್ಯ ಅಕ್ಕಿಯೊಂದಿಗೆ ಬೆರೆಸಿದಾಗ, ಇದರ ಪೌಷ್ಟಿಕ ಮೌಲ್ಯವು ಹೆಚ್ಚುತ್ತದೆ, ಇದು ಅಪೌಷ್ಟಿಕತೆಯ ವಿರುದ್ಧದ ಹೋರಾಟದಲ್ಲಿ ಪ್ರಮುಖ ಪಾತ್ರವಹಿಸುತ್ತದೆ
ಹಿಂದೂಸ್ತಾನ್ ಸಮಾಚಾರ್ / Rakesh Mahadevappa
