નવી દિલ્હી, 04 ફેબ્રુઆરી : ટ્રેડર્સ ઓર્ગેનાઈઝેશન કોન્ફેડરેશન ઓફ ઓલ ઈન્ડિયા ટ્રેડર્સ (કૈટ) એ ટ્રેડર્સને સલાહ આપી છે કે, તેઓ તેમના બિઝનેસ સંબંધિત ટ્રાન્ઝેક્શન માટે પેટીએમ ને બદલે અન્ય એપ્સ પર શિફ્ટ થાય. પેટીએમ વોલેટ અને પેટીએમ પેમેન્ટ બેંકની કામગીરી પર રિઝર્વ બેંક ઓફ ઈન્ડિયાએ નિયંત્રણો લાદ્યા બાદ કૈટ એ આ સલાહ આપી છે.
કૈટ ના રાષ્ટ્રીય મહાસચિવ પ્રવીણ ખંડેલવાલે રવિવારે એક નિવેદનમાં જણાવ્યું હતું કે, રિઝર્વ બેંક દ્વારા પેટીએમ પર તાજેતરના પ્રતિબંધોને કારણે દેશભરના વેપારીઓએ તેમના નાણાંની સુરક્ષા માટે અન્ય પ્લેટફોર્મનો ઉપયોગ કરવો જોઈએ. તેમણે કહ્યું કે, દેશમાં મોટી સંખ્યામાં નાના વેપારીઓ, વિક્રેતાઓ, હોકર્સ અને મહિલાઓ પેટીએમ દ્વારા ટ્રાન્ઝેક્શન કરે છે. આના પર આરબીઆઈના પ્રતિબંધથી આ લોકોને આર્થિક અશાંતિ થઈ શકે છે. રિઝર્વ બેંક દ્વારા 29 ફેબ્રુઆરી પછી પેટીએમ પેમેન્ટ બેંકને અંકુશમાં લેવાનું એક મુખ્ય કારણ, યોગ્ય ઓળખ વિના બનાવવામાં આવેલા કરોડો ખાતા હતા. ખરેખર, આ ખાતાઓ હેઠળ કેવાયસી પ્રક્રિયા પૂર્ણ થઈ ન હતી. એટલું જ નહીં, કરોડો રૂપિયાના વ્યવહારો પણ ઓળખ વિના કરવામાં આવ્યા હતા, જેના કારણે મની લોન્ડરિંગની શક્યતા ઊભી થઈ છે.
વેપારીઓને તેમના નાણાંનું જોખમ ઘટાડવાની સલાહ આપતા, કૈટ જનરલ સેક્રેટરીએ કહ્યું કે, તેઓએ તેમના પૈસા પેટીએમ માંથી અન્ય પેમેન્ટ એપમાં શિફ્ટ કરવા જોઈએ. ખંડેલવાલે પેટીએમ વપરાશકર્તાઓને વેપારીઓના વ્યવહારોની સુરક્ષા તેમજ નાણાકીય સંપત્તિની સલામતીની ખાતરી કરવા માટે, યુપીઆઈ દ્વારા સીધો વ્યવહાર કરવાની સલાહ આપી હતી. ઘણી બેંકોની પેમેન્ટ એપનો પણ ઉપયોગ કરી શકાય છે.
નોંધનીય છે કે, સેન્ટ્રલ બેંકે મની લોન્ડરિંગની ચિંતાઓને કારણે વિજય શર્માની આગેવાની હેઠળના રાષ્ટ્રવ્યાપી લોકપ્રિય વોલેટ પેટીએમ અને તેની બેંકિંગ શાખા વચ્ચે કરોડો રૂપિયાના શંકાસ્પદ વ્યવહારો પર અંકુશ લગાવ્યો છે. વાસ્તવમાં, રિઝર્વ બેંકે પેટીએમ પેમેન્ટ બેંકને ડિપોઝિટ લેવા સહિતની મોટાભાગની પ્રવૃત્તિઓ બંધ કરવા અને 29 ફેબ્રુઆરી પછી નવા ગ્રાહકો ઉમેરવાનું બંધ કરવા સૂચના આપી છે.
