નવી દિલ્હી, 14 નવેમ્બર (હિ.સ.) રાષ્ટ્રીય રાજધાની દિલ્હીના પ્રગતિ મેદાનમાં આજથી 14 દિવસીય આંતરરાષ્ટ્રીય વેપાર મેળો શરૂ થશે. આ મેળામાં, ભારત અને સંયુક્ત આરબ અમીરાત (યુએઇ), ઈરાન અને થાઈલેન્ડ જેવા દેશોમાંથી 3,500 એકમો પ્રદર્શનમાં ભાગ લેશે અને તેમના ઉત્પાદનોનું પ્રદર્શન કરશે. ઈન્ડિયન ટ્રેડ પ્રમોશન ઓર્ગેનાઈઝેશન (આઈટીપીઑ) એ જણાવ્યું છે કે, તમામ રાજ્યો અને કેન્દ્રશાસિત પ્રદેશો ઈન્ડિયા ઈન્ટરનેશનલ ટ્રેડ ફેર-2023 (આઈઆઈટીએફ) ની 42મી આવૃત્તિમાં ‘વસુધૈવ કુટુંબકમ – ‘વ્યાપાર દ્વારા સંયુક્ત’ થીમ સાથે ભાગ લેશે. ઉલ્લેખનીય છે કે પ્રગતિ મેદાન વાણિજ્ય મંત્રાલયના એકમ આઈટીપીઑ ના વહીવટી નિયંત્રણ હેઠળ છે.
આઈટીપીઑ ના નિવેદન અનુસાર, ભારત અને વિદેશ બંનેમાંથી લગભગ 3,500 એકમો તેમના માલસામાનનું પ્રદર્શન કરશે. આ ઇવેન્ટ માટે ભાગીદાર રાજ્યો બિહાર અને કેરળ છે. દિલ્હી, જમ્મુ અને કાશ્મીર, ઝારખંડ, મહારાષ્ટ્ર અને ઉત્તર પ્રદેશ ‘ફોકસ’ રાજ્યો છે. આ આંતરરાષ્ટ્રીય ઈવેન્ટમાં અફઘાનિસ્તાન, બાંગ્લાદેશ, ઓમાન, ઈજીપ્ત, નેપાળ, થાઈલેન્ડ, તુર્કી, વિયેતનામ, ટ્યુનિશિયા, કિર્ગિસ્તાન, લેબનોન, ઈરાન અને સંયુક્ત આરબ અમીરાત સહિત 13 દેશોના પ્રતિનિધિઓ ભાગ લઈ રહ્યા છે.
કેન્દ્ર સરકારના મંત્રાલયો, જાહેર ક્ષેત્રના એકમો, આવકવેરા વિભાગ, ડીજીટીએસ (કસ્ટમ્સ એન્ડ એક્સાઈઝ), આયુષ મંત્રાલય, સિક્યોરિટી પ્રિન્ટિંગ એન્ડ મિન્ટિંગ કોર્પોરેશન ઓફ ઈન્ડિયા, આરબીઆઈ, એલઆઈસી અને એસબીઆઈ પણ મેળામાં ભાગ લઈ રહ્યા છે. મેળાનો સમય સવારે 10.00 થી સાંજના 7.30 સુધીનો છે.
આંતરરાષ્ટ્રીય વેપાર મેળાનું ઉદ્ઘાટન કેન્દ્રીય વાણિજ્ય અને ઉદ્યોગ રાજ્ય મંત્રી અનુપ્રિયા પટેલ અને સોમ પ્રકાશ બપોરે 3:30 કલાકે કરશે. પ્રથમ પાંચ દિવસ, નવેમ્બર 14-19, કામકાજના દિવસો હશે. આ સમયગાળા દરમિયાન માત્ર બી-ટુ-બી પ્રવૃત્તિઓ હશે. 19 થી 27 નવેમ્બર સુધી મેળામાં સામાન્ય લોકોને પ્રવેશ આપવામાં આવશે. ઉદઘાટન સમારોહ ભારત મંડપમના ઓડિટોરિયમ-2માં યોજાશે. તેની તૈયારીઓ પૂર્ણ થઈ ગઈ છે. બંને કેન્દ્રીય મંત્રીઓ ઈન્ડિયા ટ્રેડ પ્રમોશન ઓર્ગેનાઈઝેશનના ચેરમેન અને મેનેજિંગ ડિરેક્ટર પ્રદીપ સિંહ ખરૌલાની હાજરીમાં મેળાનું ઉદ્ઘાટન કરશે.
હિન્દુસ્થાન સમાચાર/મુકુંદ / ડો. હિતેશ
