নলবাৰী, ০২ জানুৱাৰী (হি.স.): নৱবৰ্ষৰ প্ৰথম দিনটোৰ নিশা জয়ন্ত মল্ল বৰুৱাৰ দূৰ্গ নলবাৰীত শক্তিশালী স্থিতি লয় আঞ্চলিক দল অসম গণ পৰিষদে। যোৱা কালি বৃহস্পতিবাৰে নিশা নলবাৰী অগপৰ এক গুৰুত্বপূৰ্ণ বৈঠক অনুষ্ঠিত হয়। নলবাৰীত অগপই স্পষ্ট কৰিলে নিজৰ স্থিতি । সেইমতে নলবাৰী জিলাৰ তিনিটা সমষ্টিত নিৰ্বাচনত অৱতীৰ্ণ হোৱটো এক প্ৰকাৰ নিশ্চিত বুলি ব্যক্ত কৰিলে নলবাৰী জিলা অগপই । লগতে জানুৱাৰী মাহৰ শেষৰফালে নলবাৰীত অগপৰ বিশাল কৰ্মী সভাৰো আয়োজন কৰা হৈছে । অগপৰ ১৫০০০ হেজাৰ কৰ্মী মিলিত হৈ নলবাৰীৰ শক্তি প্ৰদৰ্শনৰ প্ৰস্তুতি চলাইছে ।
নৱবৰ্ষৰ পহিলা দিনটোতে নলবাৰীৰ হোটেল গেট ওৱেত নলবাৰী জিলা অগপৰ গুৰুত্বপূৰ্ণ বৈঠক। ২০২৬ বিধানসভা নিৰ্বাচন সমাগত । নিৰ্বাচনৰ প্ৰাকক্ষণত মন্ত্ৰী জয়ন্ত মল্ল বৰুৱাৰ দূৰ্গ নলবাৰীত শক্তিশালী ৰূপত দেখিবলৈ পোৱা গৈছে অসম গণ পৰিষদ নলবাৰী জিলা সমিতিখনক। অগপ নলবাৰী বিধানসভা সমষ্টিৰ সভাপতি সনাতন ৰাজবংশীৰ সঞ্চালনাত অনুষ্ঠিত সভাখনত অগপ জিলা সমিতিৰ সভাপতি আনন্দ ৰাজবংশী, অগপৰ কেন্দ্ৰীয় সাধাৰণ সম্পাদক আক্ৰাম হুছেইন, অগপৰ কেন্দ্ৰীয় সম্পাদক দিলীপ কুমাৰ দাস,কেশৱ চন্দ্ৰ ডেকা, জিলাৰ সাধাৰণ সম্পাদক কনকেশ্বৰ দাস, দিপুল তালুকদাৰকে প্ৰমুখ্য কৰি অগপৰ কাৰ্য-কৰ্তাসকল উপস্থিত থাকে।
ভাষণ প্ৰসংগত অগপৰ কেন্দ্ৰীয় সম্পাদক দিলীপ কুমাৰ দাসে উল্লেখ কৰে যে আঞ্চলিকতাবাদৰ দুৰ্গস্বৰূপ নলবাৰীত বিগত দুটাকৈ বিধানসভা নিৰ্বাচনত মিত্ৰজোটৰ অংশীদ্বাৰ হিচাপে বিজেপিক সহযোগ কৰি আহিছে। কিন্তু এইবেলি নলবাৰী জিলাৰ তিনিওটা সমষ্টিত অগপক অগ্ৰাধিকাৰ দিব লাগিব। আৰু বিজেপিয়ে জ্যেষ্ঠ ভাতৃত্বৰ দায়িত্ব পালন কৰিব লাগিব। আনহাতে ভাষণ প্ৰসংগত সভাৰ সভাপতি সনাতণ ৰাজবংশীয়ে অৱগত কৰে যে আগন্তুক নিৰ্বাচনত অগপই নলবাৰীত প্ৰতিদ্বন্দ্বিতা আগবঢ়াবলৈ সাজু হৈ আছে। লগতে সাজু হৈ আছে নলবাৰী সমষ্টিৰ ১৫০০০ দলীয় কৰ্ম-কৰ্তা।
ইফালে কেন্দ্ৰীয় সমিতিৰ সাধাৰণ সম্পাদক আক্ৰাম হুছেইনে উল্লেখ কৰে যে যেনেকৈ নহওক আগন্তুক নিৰ্বাচনত নলবাৰীত অগপক প্ৰাৰ্থীত্ব আগবঢ়াবলৈ সুযোগ দিবই লাগিব।
হিন্দুস্থান সমাচাৰ / কিশোৰ মিশ্ৰ
