গোলাঘাট, ০৯ নৱেম্বৰ (হি স)। গোলাঘাট জিলাৰ মৰঙিত বনৰীয়া হাতীৰ উপদ্ৰৱত ত্ৰাহি মধুসূদন সোঁৱৰিছে বৃহত্তৰ মৰঙিবাসী ৰাইজে ৷ দিনে – নিশাই চলিব ধৰিছে হাতীৰ উপদ্ৰৱ ৷
গোলাঘাট বন সংমণ্ডলৰ অধীনৰ বকিয়াল খণ্ড বন কাৰ্যালয়ৰ অন্তৰ্গত কুৰিখনৰো অধিক গাঁৱত বন্যহস্তীৰ বাবেই যোৱা প্ৰায় এটা মাহ ধৰি এক ওলাব নোৱৰা পৰিৱেশৰ সৃষ্টি হৈছে ৷ নামবৰ-দৈগ্ৰোং বন্যপ্ৰাণী অভয়াৰণ্যৰ পৰা ওলাই অহা হাতীৰ বৃহৎ জাক এটাই বৃহত্তৰ মৰঙিৰ মিৰিপথাৰ, ধলাগুৰি, ধলাকছাৰী, তেলীয়াগাঁও, শ’লমাৰি, ২ নং কৈৱৰ্ত্ত, ৩ নং কৈৱৰ্ত্ত, পাতকটীয়া, ধলাখাত, মিঠাআম চাপৰি, পানীকৰা, হালধিবাৰী, আখৈফুটিয়া, সাৰৰ গাওঁ আদি গাঁৱৰ খেতিপথাৰ তহিলং কৰাৰ লগতে হাতীৰ আক্ৰমণত কেবাজনো লোক আহতো হৈছে ৷ ৮০-৯০ টা হাতীৰ জাকটো নিশা হ’লেই চাৰিওফালে সিঁচৰতি হৈ পৰাৰ বাবে যিকোনো ঠাইতে হাতীৰ মুখামুখি হোৱাৰ সম্ভাৱনা থকাৰ বাবে মানুহৰ স্বাভাৱিক জীৱনযাত্ৰাতো প্ৰভাৱ পৰিছে ৷ হাতীৰ বাবেই মৰঙিৰ অধিকাংশ খেতিপথাৰ ছন পৰি থাকিল আৰু য’ত অলপমানো একাংশ কৃষকে আধিয়াৰ খেতি কৰা হ’ল, সেয়া এতিয়া হাতীৰ খাদ্যত পৰিণত হোৱাত কৃষকে মূৰেকপালে হাত দিবলগীয়া হৈছে৷
বন্যহস্তীৰ উপদ্ৰৱত ত্ৰাহি মধুসুদন সোঁৱৰা মৰঙিবাসী ৰাইজ ক্ষোভিত হৈ পৰিছে চৰকাৰৰ বিৰুদ্ধে ৷ বকিয়াল খণ্ড বন কাৰ্যালয়ৰ বনৰক্ষীসকলে হাতীৰ জাকটো জনাঞ্চল আৰু খেতিপথাৰৰ পৰা বনাঞ্চললৈ ঘূৰাই পঠাবলৈ কোনো ব্যৱস্থাই গ্ৰহণ কৰা নাই বুলি অভিযোগ তুলিছে গাঁৱৰ কৃষক ৰাইজে ৷ যি বন বিভাগে পূৰ্বে বনৰক্ষীৰ অভাৱৰ কথা কৈ আহিছিল, সেই বন বিভাগত নতুনকৈ বহুতো লোক নিয়োজিত হোৱাৰ পাছতো একো পৰিবৰ্তন নহ’ল৷ চৰকাৰেও সময়ে সময়ে হাতী-মানুহৰ সংঘাতৰ সমাধান সূত্ৰৰ কথা কৈ থাকে যদিও কাৰ্যক্ষেত্ৰত তাৰ প্ৰতিফলন দেখিবলৈ পোৱা নাই ৷ সংশ্লিষ্ট বিভাগ আৰু চৰকাৰৰ, বিধায়ক বিশ্বজিত ফুকনৰ এই উদাসীনতাৰ বাবে অঞ্চলটোৰ ক্ষোভিত কৃষক ৰাইজে ৰাজপথত নামি চৰকাৰৰ বিৰুদ্ধে বৃহৎ প্ৰতিবাদী কাৰ্যসুচী গ্ৰহণ কৰিব বুলিও সকিয়াই দিয়ে ৷
হিন্দুস্থান সমাচাৰ/প্ৰকাশ/মনোজ
