দৰং, ০৩ ছেপ্টেম্বৰ (হি.স.)। সমগ্ৰ শিক্ষা মিচনৰ কৰ্মচাৰী মানৱ শৰ্মাৰ আকস্মিক ৰহস্যজনক মৃত্যু। গেৰিমাৰী প্ৰফুল্ল নগৰ নিবাসী মানৱ শৰ্মাৰ মঙ্গলবাৰে আকস্মিক মৃত্যুত অঞ্চল জুৰি তীব্ৰ প্ৰতিক্ৰিয়াৰ সৃষ্টি হয়।
মানৱ শৰ্মা দৰং জিলা সমগ্ৰ শিক্ষা মিচনৰ কৰ্মচাৰী হিচাপে কাৰ্যনিৰ্বাহ কৰি আছিল। যোৱা ৩০ আগষ্টৰ গধুলি চুবুৰীয়া এগৰাকী লোকৰ মৃত্যু হোৱাত মৃতকৰ শেষকৃত্য সম্পন্ন কৰিবলৈ বৰমপুৰলৈ নিজৰ চাৰিচকীয়া বাহন খন লৈ চুবুৰীয়া তিনি গৰাকী ব্যক্তিৰ সৈতে যায়। শেষকৃত্য সম্পন্ন হোৱাৰ পিছত তেওঁলোক মঙলদৈ প্ৰফুল্ল নগৰৰ বাসগৃহলৈ ওভতে।
উল্লেখ যোগ্য যে মানৱ শৰ্মাই উক্ত দিনা অত্যাধিক মদ্যপান কৰিছিল বুলি বু বো বা বা ওলাইছে। গভীৰ নিচাত থকা শৰ্মাক ওভতাৰে পৰা লগৰীয়া কেইজনে দাঙি নি নিজ গৃহত শুৱাই থয়, পুৱা পত্নীয়ে টোপনিৰ জগাব বিচাৰে যদিও অচেতন অৱস্থাত থকাত লগে লগে মঙলদৈ পলি ক্লিনিকলৈ লৈ যায়। শৰ্মাক চিকিৎসকে লগে লগে গুৱাহাটীলৈ লৈ যাবলৈ পৰামৰ্শ দিয়ে।
পৰিয়ালৰ লোকে মানৱ শৰ্মাক গুৱাহাটীৰ এখন ব্যক্তিগত চিকিৎসালয়ত ভৰ্তি কৰে যদিও চিকিৎসালয়ত চিকিৎসাধীন অৱস্থাত মঙ্গলবাৰে দিনৰ প্ৰায় ১১ বজাত মৃত্যু হয়। মানৱ শৰ্মাৰ মৃত্যু সহজ ভাৱে ল’ব পৰা নাই পৰিয়ালৰ লোকে। পৰিয়ালৰ লোকে এয়া পৰিকল্পিত হত্যা বুলি সন্দেহ প্ৰকাশ কৰিছে।
ইতিমধ্যে মৃত মানৱ শৰ্মাৰ পত্নীয়ে সোমবাৰে স্বামীৰ লগত পোটা পুখুৰিলৈ যোৱা সহযাত্ৰী তিনি গৰাকীৰ ওপৰত মঙলদৈ সদৰ থানাত এজাহাৰ দাখিল কৰিছে। আৰক্ষীয়েও ইতিমধ্যে তিনিও জনকে সোধাপোচাৰ বাবে থানালৈ তলব কৰিছে। আৰক্ষীৰ তদন্ততৰ পিছতহে ওলাব মৃত্যুৰ আচল ৰহস্য।
হিন্দুস্থান সমাচাৰ / প্ৰকাশ ডেকা
