নতুন দিল্লী, ১২ ছেপ্টেম্বৰ (হি স)। দেশৰ নৱ নিৰ্বাচিত উপ-ৰাষ্ট্ৰপতি হিচাপে শুকুৰবাৰে শপত গ্ৰহণ কৰে চি পি ৰাধাকৃষ্ণণে। তেওঁ দেশৰ ১৫ সংখ্যক উপ-ৰাষ্ট্ৰপতি হিচাপে পৰিগণিত হৈছে। শুকুৰবাৰে ৰাষ্ট্ৰপতি ভৱনত অনুষ্ঠিত এক অনুষ্ঠানত ৰাষ্ট্ৰপতি দ্ৰৌপদী মুৰ্মুৱে চি পি ৰাধাকৃষ্ণণক কাৰ্যভাৰ আৰু গোপনীয়তাৰ শপত গ্ৰহণ কৰোৱায়।
শপত গ্ৰহণ অনুষ্ঠানত প্ৰধানমন্ত্ৰী নৰেন্দ্ৰ মোডী, গৃহমন্ত্ৰী অমিত শ্বাহ, কেন্দ্ৰীয় মন্ত্ৰী জে পি নড্ডাকে ধৰি কেবিনেটৰ সদস্যসকল উপস্থিত থাকে। শপত গ্ৰহণ অনুষ্ঠানত অন্ধ্ৰ প্ৰদেশৰ মুখ্যমন্ত্ৰী চন্দ্ৰবাবু নাইডুৰ লগতে এন ডি এ সমষ্টিৰ দলসমূহৰ নেতাসকলো উপস্থিত থাকে। অনুষ্ঠানত প্ৰাক্তন উপ-ৰাষ্ট্ৰপতি জগদীপ ধনখৰো উপস্থিত থাকে।
উল্লেখযোগ্য যে যোৱা মঙলবাৰে অনুষ্ঠিত হোৱা উপ-ৰাষ্ট্ৰপতি নিৰ্বাচনত যুটীয়া বিৰোধী প্ৰাৰ্থী বি সুদৰ্শন ৰেড্ডীক পৰাস্ত কৰি চি পি ৰাধাকৃষ্ণণে জয়লাভ কৰে। নিৰ্বাচনত তেওঁ লাভ কৰে ৪৫২টা ভোট। ইয়াৰ বৃহস্পতিবাৰে তেওঁ মহাৰাষ্ট্ৰৰ ৰাজ্যপাল পদৰ পৰা পদত্যাগ কৰে।
हिन्दुस्थान समाचार / অৰৱিন্দ
