ছান্টিয়াগো (চিলি), ০৭ ফেব্ৰুৱাৰী। চিলি গণৰাজ্যৰ প্ৰাক্তন ৰাষ্ট্ৰপতি চেবাষ্টিয়ান পিনেৰা (৭৪)ৰ মঙলবাৰে হেলিকপ্টাৰ দুৰ্ঘটনাত মৃত্যু হয়। ৰাষ্ট্ৰপতি গেব্ৰিয়েল বৰিকে পিনেৰাৰ মৃত্যুৰ তিনিদিনীয়া ৰাষ্ট্ৰীয় শোক ঘোষণা কৰিছে। আমেৰিকাৰ আগশাৰীৰ বাতৰি কাকত দ্য নিউয়ৰ্ক টাইমছৰ প্ৰতিবেদন অনুসৰি সামৰিক একনায়কত্ববাদৰ অন্ত পৰাৰ পিছত পিনেৰা চিলিৰ প্ৰথম ৰক্ষণশীল নেতা হিচাপে পৰিগণিত হয়। তেওঁ দেশৰ গণতন্ত্ৰ শক্তিশালী কৰাত সহায় কৰিছিল।
খবৰ অনুসৰি চাৰিজন লোক কঢ়িয়াই অনা হেলিকপ্টাৰখন দক্ষিণ চিলিৰ লছ ৰিঅ’ছ অঞ্চলৰ ৰেংকো হ্ৰদত বিয়লি প্ৰায় ৩:৩০ বজাত দুৰ্ঘটনাগ্ৰস্ত হয়। তিনিজন লোক ৰক্ষা পৰে আৰু সাঁতুৰি পাৰলৈ যায়। চিলিৰ নৌসেনাই উদ্ধাৰ কৰিছে প্ৰয়াত প্ৰাক্তন ৰাষ্ট্ৰপতি পিনেৰাৰ মৃতদেহ। কোনে বিমানখনৰ উৰুৱাইছিল সেয়া স্পষ্ট হোৱা নাই। অৱশ্যে পিনেৰাই স্বয়ং হেলিকপ্টাৰ চলাবলৈ জানিছিল।
দ্য নিউয়ৰ্ক টাইমছৰ মতে পিনেৰা আছিল এজন কোটিপতি ব্যৱসায়ী আৰু বিনিয়োগকাৰী। ২০১০ চনৰ পৰা ২০১৪ চনলৈ আৰু ২০১৮ চনৰ পৰা ২০২২ চনলৈকে তেওঁ চিলিৰ ৰাষ্ট্ৰপতি হিচাপে দুটা কাৰ্যকাল কাৰ্যনিৰ্বাহ কৰিছিল। ৰক্ষণশীল নেতা পিনেৰাই ব্যৱসায় সমৰ্থক নীতি প্ৰৱৰ্তন কৰে। ইয়াৰ ফলত বিকাশৰ প্ৰসাৰ ঘটিছিল। ইয়াৰ পিছতো তেওঁৰ বিৰুদ্ধে দৰিদ্ৰ লোকক অৱহেলা কৰাৰ অভিযোগো উত্থাপন হৈছিল। ইয়াৰ বাবেই তেওঁ ৰাইজৰ প্ৰবল বিৰোধিতাৰো সন্মুখীন হ’বলগীয়া হৈছিল। পিনেৰাই পত্নী চেচিলিয়া মৰেল আৰু চাৰিটা সন্তানক এৰি থৈ যায়। তেওঁ ১৯৭৩ চনত মৰেলৰ সৈতে বিবাহপাশত আবদ্ধ হৈছিল।
মঙলবাৰে চিলিৰ ৰাষ্ট্ৰপতি গেব্ৰিয়েল বৰিকে দেশবাসীক টেলিভিছনযোগে দিয়া ভাষণত কয় যে ৰাষ্ট্ৰপতি পিনেৰাই নিজৰ দৃষ্টিভংগীৰে দেশৰ মংগলৰ বাবে ব্যাপক অৱদান আগবঢ়াইছিল। তেওঁ আৰম্ভণিৰে পৰাই এজন গণতন্ত্ৰবাদী আছিল। তেওঁৰ ভাষণত তেওঁ চিলিত তিনিদিনীয়া ৰাষ্ট্ৰীয় শোক ঘোষণা কৰে।
প্ৰতিবেদন অনুসৰি একনায়কত্ববাদৰ সময়ত ১৯৮০ চনৰ আৰম্ভণিতে চিলিত ক্ৰেডিট কাৰ্ড প্ৰৱৰ্তন কৰি পিনেৰাই ব্যৱসায়ৰ জগতখনত প্ৰৱেশ কৰিছিল। পিছলৈ তেওঁ ৰিয়েল এষ্টেট, বেংকিং, শক্তি আৰু খনিকে ধৰি কেইবাটাও কোম্পানীত বিনিয়োগ কৰিছিল। টেলিভিছন সম্প্ৰচাৰকৰ লগতে বিমান সংস্থা আৰু পেছাদাৰী ফুটবল ক্লাবতো তেওঁৰ মুখ্য শ্বেয়াৰ আছিল। তাৰ পিছত তেওঁ নিজৰ ধন-সম্পত্তিৰ সহায় লৈ ৰাজনীতিত প্ৰৱেশ কৰে। প্ৰথমে চিনেটৰ হিচাপে আৰু পিছলৈ ৰাষ্ট্ৰপতি হিচাপে কাৰ্যনিৰ্বাহ কৰে।
পিনেৰাই চিলিক শেহতীয়া বছৰবোৰৰ কিছুমান কঠিন মুহূৰ্তৰ মাজেৰে আগবঢ়াই লৈ গৈছিল। ২০১০ চনত ৰাষ্ট্ৰপতি হিচাপে নিৰ্বাচিত হোৱাৰ কেইসপ্তাহমানৰ পিছত চিলিত এক প্ৰবল ভূমিকম্প আৰু ছুনামীৰ সৃষ্টি হয়। এই ঘটনাত ৫২৫ জন লোকে প্ৰাণ হেৰুৱায় আৰু ১৫ লাখ লোক স্থানচ্যুত হয়। মাটিৰ তলত প্ৰায় আধা মাইল নিলগত আবদ্ধ হৈ থকা ৩৩ জন খনিকৰক বচাবলৈ পিনেৰাই সকলো পদক্ষেপ গ্ৰহণ কৰিছিল। তেওঁৰ চৰকাৰে ৬৮ দিনীয়া সাহায্য আৰু উদ্ধাৰ অভিযানৰ অন্তত তেওঁলোকক নিৰাপদে উদ্ধাৰ কৰিবলৈ সক্ষম হয়। পিনেৰাই সকলোৰে সৈতে সাৱটি ধৰি এই উদ্ধাৰ অভিযানৰ আনন্দ উদযাপন কৰিছিল।
