কিয়েভ: ৰাছিয়া আৰু ইউক্ৰেইনৰ মাজত যোৱা দুবছৰ ধৰি চলি থকা যুদ্ধৰ মাজতে ইউক্ৰেইনে ৰাছিয়াত এতিয়ালৈকে সৰ্ববৃহৎ আক্ৰমণ চলাইছে। ইউক্ৰেইনে ৰাছিয়াৰ সীমান্তৰ ৰষ্টভ অঞ্চলত ৫৩খন ড্ৰ’ন আক্ৰমণ কৰে, যিটো ইউক্ৰেইনে এতিয়ালৈকে কৰা অন্যতম বৃহৎ বিমান আক্ৰমণ বুলি গণ্য কৰা হয়। একে সময়তে বৃহস্পতিবাৰে ৰাছিয়াই ইউক্ৰেইনৰ খাৰ্কিভ অঞ্চলত ড্ৰ’নেৰে আক্ৰমণ কৰে। এই আক্ৰমণত ৪ জন লোকৰ মৃত্যু হয়। অৱশ্যে ৰাছিয়াৰ সেনাই সকলো ড্ৰ’ন ভূপাতিত কৰা বুলি দাবী কৰিছে। ইয়াৰে ৪৪খন ড্ৰ’ন মৰোজ’স্কিত ভূপাতিত কৰা হয়।
ৰষ্টভৰ গৱৰ্ণৰে কয় যে এই আক্ৰমণত এটা পাৱাৰ চাবষ্টেচন ক্ষতিগ্ৰস্ত হৈছে। এই সন্দৰ্ভত ইউক্ৰেইনৰ বিষয়াসকলৰ কোনো মন্তব্য কৰা হোৱা নাই।
ৰাছিয়াৰ সংবাদ মাধ্যমে প্ৰকাশ কৰিছে যে মৰোজ’স্কিৰ ওচৰতে এটা সামৰিক বিমানবন্দৰ অৱস্থিত। অৱশ্যে তেওঁলোকৰ লক্ষ্য সামৰিক বিমানবন্দৰ আছিল নে নাই সেয়া স্পষ্ট হোৱা নাই। একে সময়তে ৰাছিয়াৰ প্ৰতিৰক্ষা মন্ত্ৰালয়ে প্ৰকাশ কৰিছে যে ৰাছিয়াৰ সীমান্তৱৰ্তী অঞ্চল কুৰ্স্ক, বেলগ’ৰড, ক্ৰাছনোডাৰ আৰু ওচৰৰ চাৰাটভত আন ৯খন ড্ৰ’ন নিষ্ক্ৰিয় কৰা হৈছে। ৰাছিয়াৰ বোমাৰু বিমানৰ এটা বিমানঘাটি ছাৰাটভ অঞ্চলত অৱস্থিত। বৃহস্পতিবাৰে ৰাছিয়াই ইউক্ৰেইনৰ খাৰ্কিভ অঞ্চলত ড্ৰ’নেৰে আক্ৰমণ কৰে। এই আক্ৰমণত ৪ জন লোকৰ মৃত্যু হয়। লগতে এই আক্ৰমণত ১২ জন লোক আহত হোৱাৰ খবৰ পোৱা গৈছে। জামিভস্কা থাৰ্মেল পাৱাৰ প্লেণ্টকো লক্ষ্য কৰি লোৱা হৈছিল। যাৰ বাবে খাৰকিভ অঞ্চলৰ প্ৰায় ৩,৫০,০০০ লোকৰ ঘৰ আন্ধাৰ হৈয়েই থাকিল। ইউক্ৰেইনৰ ছটা অঞ্চলত বিদ্যুৎ যোগানৰ সময়ত কিছু কৰ্তন কৰিবলগীয়া হৈছিল। এই আক্ৰমণত ১৫ খন ড্ৰোন ব্যৱহাৰ কৰা হয়। নাটোৰ মিত্ৰ দেশসমূহে বৃহস্পতিবাৰে ইউক্ৰেইনক ৰাছিয়াৰ বেলিষ্টিক মিছাইলৰ বিৰুদ্ধে প্ৰতিৰক্ষাৰ বাবে অধিক বায়ু প্ৰতিৰক্ষা ব্যৱস্থা প্ৰদান কৰাত সন্মত হয়।
চীন, উত্তৰ কোৰিয়া, ইৰাণৰ দৰে দেশসমূহে ৰাছিয়াক সমৰ্থন কৰাৰ পৰিপ্ৰেক্ষিতত এই কথা অধিক গুৰুত্বপূৰ্ণ হৈ পৰে বুলি কয় আমেৰিকাৰ বিদেশ মন্ত্ৰী এণ্টনি ব্লিংকেনে।
