কুৱেটা, ২৩ ডিচেম্বৰ (হি.স.)। স্বাধীনতাৰ দাবীৰে অনুৰণন ঘটোৱা পাকিস্তানৰ অশান্ত বেলুচিস্তান প্ৰদেশখন এই বছৰো হিংসাত্মক পৰিস্থিতিত আৱৰি ৰাখিছে। ২০২৫ চনত বেলুচিস্তানত সংঘটিত আক্ৰমণ, বোমা বিস্ফোৰণ, সশস্ত্ৰ কাণ্ডত কমেও ২৪৮ জন সাধাৰণ নাগৰিক আৰু ২০৫ জন পাকিস্তানী নিৰাপত্তাৰক্ষী নিহত হোৱাৰ ফলত বেলুচিস্তানৰ অন্যতম হিংসাত্মক বছৰ।
দ্য বেলুচিস্তান পোষ্টৰ মতে, চৰকাৰী তথ্য অনুসৰি ২০২৫ চনটো বেলুচিস্তানত আইন-শৃংখলাৰ বাবে আন এক কঠিন আৰু ৰক্তাক্ত বছৰ বুলি প্ৰমাণিত হ’ল। নিৰাপত্তাৰক্ষী বিষয়াসকলে জনোৱা মতে, বছৰটোত বেলুচিস্তানত মুঠ ৪৩২টা কাণ্ডৰ ৰেকৰ্ড কৰা হৈছে, যাৰ ফলত সমগ্ৰ প্ৰদেশখনতে ভয়ৰ পৰিৱেশৰ সৃষ্টি হৈছে। চৰকাৰী তথ্য অনুসৰি এই হিংসাত্মক ঘটনাত ২৪৮ জন সাধাৰণ নাগৰিক আৰু ২০৫ জন নিৰাপত্তাৰক্ষীয়ে প্ৰাণ হেৰুৱাইছে। এই ঘটনাবোৰে দৈনন্দিন জীৱনত ভয়াৱহভাৱে ব্যাঘাত জন্মাইছিল আৰু বেলুচিস্তানৰ সামগ্ৰিক নিৰাপত্তা পৰিস্থিতিৰ ওপৰত গুৰুতৰ প্ৰশ্ন উত্থাপন কৰিছিল।
প্ৰতিবেদন অনুসৰি এই বছৰ কুৱেটা, মাষ্টুং, খুজদাৰ, তুৰ্বাট, আৰু নোকুণ্ডিত ছটা আত্মঘাতী বোমা বিস্ফোৰণ সংঘটিত হৈছে। ১১ মাৰ্চত বালুচ স্বাধীনতা সমৰ্থক সংগঠনে বোলান অঞ্চলত জাফ্ফৰ এক্সপ্ৰেছত আক্ৰমণ চলায়। ইয়াৰ পূৰ্বে ১৮ ফেব্ৰুৱাৰীত বৰখানত ৭ জন লোকৰ মৃত্যু হৈছিল। ১৫ মে’ত খুজদাৰত এখন বাছত আক্ৰমণ চলাই ৬ জন লোকৰ মৃত্যু হৈছিল। ৩০ ছেপ্টেম্বৰত কুৱেটাৰ ফ্ৰন্টিয়াৰ কৰ্পছৰ মুখ্য কাৰ্যালয়ত আত্মঘাতী বোমা বিস্ফোৰণত ১২ জন লোকৰ মৃত্যু হৈছিল।
আনহাতে, বেলুচিস্তানৰ বিষয়াসকলে কয় যে বছৰটোৰ ভিতৰতে বৃহৎ পৰিসৰৰ সন্ত্ৰাসবাদ বিৰোধী অভিযান অব্যাহত আছিল। ২০২৫ চনত সমগ্ৰ বেলুচিস্তানত ৭৮ হাজাৰতকৈ অধিক চোৰাংচোৱা ভিত্তিক অভিযান চলাই বেলুচ গোটৰ ৭০৭ জন সদস্যৰ মৃত্যু হৈছিল। নিৰাপত্তা বিষয়াসকলে কয় যে সশস্ত্ৰ গোট আৰু তেওঁলোকৰ সদস্যসকলৰ বিৰুদ্ধে অভিযান অবিৰতভাৱে চলি আছে যদিও তেওঁলোকে বেলুচিস্তানত এক উল্লেখযোগ্য নিৰাপত্তাজনিত ভাবুকিও স্বীকাৰ কৰিছে।
বিষয়াসকলে ২০২৫ চনক বেলুচিস্তানৰ শান্তি আৰু স্থিতিশীলতাৰ বাবে হতাশাজনক বছৰ বুলি অভিহিত কৰিছে। সমালোচকসকলে যুক্তি আগবঢ়ায় যে বৃহৎ সংখ্যক কাণ্ডৰ ৰিপৰ্ট নোহোৱাকৈয়ে থাকে, আনহাতে নিৰাপত্তাৰক্ষীৰ মাজত হতাহতিৰ ৰিপৰ্টও কম বুলি কোৱা হয়।
हिन्दुस्थान समाचार / অৰৱিন্দ
