ইছলামাবাদ, ২৪ অক্টোবৰ (হি.স.)। পাকিস্তান, আৰব আৰু অন্যান্য মুছলমান দেশ আৰু আন্তঃৰাষ্ট্ৰীয় সংস্থাসমূহৰ এক বহল মিত্ৰজোঁটে দখল কৰা পশ্চিম পাৰৰ ওপৰত ইজৰাইলে শেহতীয়াকৈ নিজৰ তথাকথিত “সাৰ্বভৌমত্ব” জাপি দিয়াৰ বিধানসভাৰ প্ৰচেষ্টাক তীব্ৰ গৰিহণা দিছে।
বৃহস্পতিবাৰে পাকিস্তানৰ বৈদেশিক মন্ত্ৰালয়ে জাৰি কৰা এক যৌথ বিবৃতিত জৰ্ডান, ইণ্ডোনেছিয়া, ইছলামিক ৰিপাব্লিক অৱ পাকিস্তান, তুৰস্ক, জিবুতি, চৌদি আৰব, ওমান, গাম্বিয়া, পেলেষ্টাইন, কাটাৰ, কুৱেইট, লিবিয়া, মালয়েছিয়া, ইজিপ্ত, নাইজেৰিয়া, লীগ অৱ আৰব ষ্টেটছ, আৰু অৰ্গেনাইজেচন অৱ ইছলামিক ক’অপাৰেশ্যনে দখল কৰা পেলেষ্টাইন ভূখণ্ডসমূহ সংযুক্ত কৰা বিষয়ক ইজৰাইলৰ সংসদ, নেচেটে দুখন খচৰাত অনুমোদন জনোৱাক গৰিহণা দিয়ে ।
বিবৃতিটোত এই আইনগত ব্যৱস্থাসমূহক “আন্তঃৰাষ্ট্ৰীয় আইন” আৰু ৰাষ্ট্ৰসংঘৰ নিৰাপত্তা পৰিষদৰ ২৩৩৪ নং প্ৰস্তাৱৰ প্ৰকাশ্য উলংঘা বুলি অভিহিত কৰা হৈছে। প্ৰস্তাৱটোৱে পূব জেৰুজালেমকে ধৰি দখল কৰা পেলেষ্টাইনৰ ভূখণ্ডৰ জনগাঁথনি আৰু মৰ্যাদা সলনি কৰাৰ লক্ষ্যৰে ইজৰাইলীৰ সকলো পদক্ষেপ নাকচ কৰিছে। বিবৃতিটোত উল্লেখ কৰা হৈছে যে দখল কৰা পেলেষ্টাইন ভূখণ্ডৰ কোনো অংশৰ ওপৰত ইজৰাইলৰ কোনো সাৰ্বভৌমত্ব নাই।
ইফালে, গাজাকে ধৰি দখল কৰা পেলেষ্টাইনৰ ভূখণ্ডৰ জনসাধাৰণৰ বাবে অত্যাৱশ্যকীয় সামগ্ৰী আৰু মানৱীয় সাহায্য সামগ্ৰীৰ সুবিধা নিশ্চিত কৰাৰ বাবে ইজৰাইলৰ দায়িত্ব প্ৰতিষ্ঠা কৰা আন্তঃৰাষ্ট্ৰীয় ন্যায়ালয়ৰ ৰায়ক বুধবাৰে দেশকেইখনে আদৰণি জনায়। আইচিজেৰ ৰায়দানত যুদ্ধৰ পদ্ধতি হিচাপে “অনাহাৰ” ব্যৱহাৰৰ বিৰুদ্ধে আপত্তি পুনৰবাৰ প্ৰকাশ কৰি ইজৰাইলক গাজালৈ সাহায্য প্ৰদানত বাধা দিয়াৰ বাবে সমালোচনা কৰে।
বিবৃতিটোত পেলেষ্টাইনী জনসাধাৰণৰ আত্মনিয়ন্ত্ৰণৰ অধিকাৰ আৰু স্বাধীন ৰাষ্ট্ৰৰ ওপৰতো গুৰুত্ব আৰোপ কৰা হৈছে আৰু উল্লেখ কৰা হৈছে যে পূব জেৰুজালেমৰ ওপৰত ইজৰাইলৰ ভূখণ্ডৰ দাবী ৰাষ্ট্ৰসংঘৰ নিৰাপত্তা পৰিষদে “অগ্ৰাহ্য়” বুলি ঘোষণা কৰিছে।
যৌথ ঘোষণাত ইজৰাইলক নিজৰ অবৈধ আৰু একপক্ষীয় কাৰ্যকলাপ অব্যাহত ৰখাৰ পৰা সকীয়াই দিয়া হৈছে। ইজৰাইলক নিজৰ অবৈধ কাৰ্য্য বন্ধ কৰিবলৈ বাধ্য কৰি আন্তঃৰাষ্ট্ৰীয় সমাজক নিজৰ নৈতিক আৰু আইনী দায়িত্ব পালন কৰিবলৈ আহ্বান জনায়। ইয়াত জোৰ দি কোৱা হৈছে যে ১৯৬৭ চনৰ সীমান্তৰ ভিতৰত এখন সাৰ্বভৌম আৰু স্বাধীন পেলেষ্টাইন ৰাষ্ট্ৰই অঞ্চলটোত ন্যায়সংগত আৰু স্থায়ী শান্তি অৰ্জনৰ একমাত্ৰ পথ। এই পেলেষ্টাইন ৰাষ্ট্ৰখনৰ ৰাজধানী হিচাপে পূব জেৰুজালেম হ’ব লাগে।
हिन्दुस्थान समाचार / মনোজ কুমাৰ শইকীয়া
