ছানা (য়েমেন), ১৩ জানুৱাৰী (হি.স.)। আমেৰিকাৰ সেনাই শুকুৰবাৰে গভীৰ নিশা ইৰাণ সমৰ্থিত হুতী বিদ্ৰোহীৰ বিৰুদ্ধে পুনৰ বিমান আক্ৰমণ চলায় । হুতী নিয়ন্ত্ৰিত য়েমেনত আমেৰিকাৰ সেনাই ৰকেট আৰু মিছাইল নিক্ষেপ কৰে। ইয়াৰ এদিন আগতে আমেৰিকা আৰু ব্ৰিটিছ সৈন্যই ইৰাণ সমৰ্থিত এই গোটটোৰ ওপৰত বৃহৎ পৰিসৰৰ আক্ৰমণ চলাইছিল। কিছুদিনৰ পৰা হুতী বিদ্ৰোহীয়ে লোহিত সাগৰত বাণিজ্যিক জাহাজৰ যাতায়তত বিধি পথালি দি আহিছে।
দ্য ৱাশ্বিংটন পোষ্টৰ প্ৰতিবেদন অনুসৰি আমেৰিকাৰ বিষয়াসকলে শেহতীয়াকৈ এই আক্ৰমণত হুতীৰ ৰাডাৰ ছাইটক লক্ষ্য কৰি লোৱা বুলি প্ৰকাশ কৰিছে। এই স্থানক সামুদ্ৰিক যাতায়তৰ বাবে ভাবুকি বুলি বিবেচিত হৈছে। য়েমেনৰ ৰাজধানী ছানাতো বিস্ফোৰণৰ শব্দ শুনা গৈছে। আক্ৰমণৰ পূৰ্বে নৌসেনাই জাহাজসমূহক লোহিত সাগৰৰ য়েমেনৰ আশে-পাশে থকা অঞ্চলসমূহ এৰাই চলিবলৈ সকীয়াই দিছিল। শেহতীয়া আক্ৰমণৰ কেইঘণ্টামান পূৰ্বে আমেৰিকাৰ ৰাষ্ট্ৰপতি জো বাইডেনে সকীয়াই দিছিল যে হুতীয়ে আৰু আক্ৰমণৰ সন্মুখীন হ’ব পাৰে। ৰাষ্ট্ৰপতিগৰাকীয়ে কয় যে হুতীসকলক উপযুক্ত উত্তৰ দিয়া হ’ব।
দ্য ৱাশ্বিংটন পোষ্টৰ তথ্য অনুসৰি শেহতীয়া আক্ৰমণৰ পূৰ্বে আমেৰিকা আৰু ব্ৰিটিছ সৈন্যই ২৮টা ভিন্ন স্থানত বোমা বৰ্ষণ কৰি ৬০টাতকৈও অধিক হুতীৰ স্থান ধ্বংস কৰে। শুকুৰবাৰে পেন্টাগনৰ যৌথ মুখ্য কৰ্মচাৰীৰ সঞ্চালক লেফটেনেণ্ট জেনেৰেল ডগলাছ এ. ছিমছে কয় যে আমেৰিকা আৰু ব্ৰিটিছ যুদ্ধ বিমানে ৩০ৰ পৰা ৬০ মিনিটৰ ভিতৰতে আক্ৰমণ কৰে। এই আক্ৰমণত টমাহক ক্ষেপণাস্ত্ৰও ব্যৱহাৰ কৰা হৈছিল। ছিমছে কয় যে কিমানজন হুতী বিদ্ৰোহী নিহত হৈছে সেয়া স্পষ্ট হোৱা নাই।
হিন্দুস্থান সমাচাৰ/মুকুন্দ/মনোজ
