মুম্বাই, ০৮ ফেব্ৰুৱাৰী: ভাৰতীয় ৰিজাৰ্ভ বেংকে অহা ২০২৪-২৫ বিত্তীয় বৰ্ষৰ বাবে দেশৰ মুঠ ঘৰুৱা উৎপাদন (জিডিপি) বৃদ্ধিৰ হাৰ ৭ শতাংশ হ’ব বুলি অনুমান কৰিছে। কিন্তু চলিত বিত্তীয় বৰ্ষ ২০২৩-২৪ত অৰ্থনৈতিক বিকাশৰ হাৰ ৭.৩ শতাংশ বুলি অনুমান কৰা হৈছে।
বৃহস্পতিবাৰে ইয়াত দ্বিমাহেকীয়া মুদ্ৰানীতি সমিতিৰ তিনিদিনীয়া পৰ্যালোচনা বৈঠকৰ ফলাফল ঘোষণা কৰি ৰিজাৰ্ভ বেংকৰ গৱৰ্ণৰ শক্তিকান্ত দাসে কয় যে গ্ৰাম্য চাহিদা বাঢ়িছে, চহৰৰ ব্যৱহাৰ শক্তিশালী হৈয়েই আছে। একে সময়তে মূলধনী ব্যয় বৃদ্ধিৰ বাবে বিনিয়োগ চক্ৰটোৱে গতি লাভ কৰিছে। তেওঁ কয় যে ব্যক্তিগত বিনিয়োগতো উন্নতিৰ লক্ষণ দেখা গৈছে।
শক্তিকান্ত দাসে আগন্তুক ২০২৪-২৫ বিত্তীয় বৰ্ষৰ জিডিপি বৃদ্ধিৰ হাৰ সাত শতাংশ হ’ব বুলি অনুমান কৰিছে। আৰ বি আইৰ গভৰ্ণৰগৰাকীয়ে কয় যে এপ্ৰিল-জুন আৰু জুলাই-ছেপ্টেম্বৰ ত্ৰৈমাসিকত অৰ্থনৈতিক বিকাশৰ হাৰ ক্ৰমে ৭.২ শতাংশ আৰু ৬.৮ শতাংশ হ’ব, আনহাতে অক্টোবৰ-ডিছেম্বৰ আৰু জানুৱাৰী-মাৰ্চ ত্ৰৈমাসিকত ই ৭ শতাংশ হ’ব বুলি অনুমান কৰা হৈছে।
ঘৰুৱা অৰ্থনৈতিক কাৰ্যকলাপ শক্তিশালী হৈ আছে বুলিও কয় আৰ বি আইৰ গভৰ্ণৰগৰাকীয়ে। দাসে কয় যে ৰাষ্ট্ৰীয় পৰিসংখ্যা কাৰ্যালয়ৰ হিচাপ অনুসৰি ২০২৩-২৪ বিত্তীয় বৰ্ষত বৃদ্ধিৰ হাৰ ৭.৩ শতাংশ। তেওঁ কয় যে ২০২৩-২৪ বিত্তীয় বৰ্ষৰ গতিবেগ অহা ২০২৪-২৫ বিত্তীয় বৰ্ষতো অব্যাহত থকাৰ সম্ভাৱনা আছে।
উল্লেখযোগ্য যে চলিত বিত্তীয় বৰ্ষ ২০২৩-২৪ৰ বাবে ভাৰতৰ বাস্তৱিক জিডিপি বৃদ্ধিৰ হাৰ ৭.৩ শতাংশ বুলি অনুমান কৰা হৈছে। একে সময়তে আৰ বি আইয়ে শেষবাৰৰ বাবে বৃদ্ধিৰ হাৰৰ অনুমান ৬.৫ শতাংশৰ পৰা সাত শতাংশলৈ বৃদ্ধি কৰিছিল, আনহাতে বিশ্ব ৰেটিং সংস্থাসমূহে চলিত বিত্তীয় বৰ্ষ ২০২৩-২৪ত ভাৰতৰ অৰ্থনৈতিক বৃদ্ধিৰ হাৰ ৬.৫ শতাংশৰ পৰা ৬.৯ শতাংশৰ ভিতৰত হ’ব বুলি অনুমান কৰিছে।
