ناگپور، 4 ستمبر (ہ س)ناگپور ضلع کے بازارگاؤں میں بدھ کی صبح 12:34
بجے اکنامک ایکسپلوسیوز لمیٹڈ کے پی پی 15 پلانٹ میں خوفناک دھماکہ ہوا جس میں
سپروائزر میور گنویر عمر 25 سال جان سے ہاتھ دھو بیٹھے اور 16 مزدور زخمی ہوگئے۔
زخمیوں میں چار کی حالت نازک بتائی گئی ہے۔ ابتدائی اطلاعات کے مطابق دھماکے سے
قبل پلانٹ میں آگ بھڑک اٹھی تھی جس کی وجہ سے چند مزدور بروقت نکلنے میں کامیاب
ہوئے۔
شدید دھماکے کی گونج بازارگاؤں، ساونگا اور شیوا کے ساتھ ساتھ دس قریبی دیہات
تک سنائی دی جس پر لوگ سراسیمگی کے عالم میں گھروں سے باہر نکل آئے۔ زخمیوں میں کیلاش
ورما، منیش ورما، سنی کمار، ارون کمار، اتل مادوی، سوربھ ڈونگرے، تیجس بندھاٹے،
سورج گٹکے، اکھل بونے اور دھرم پال منوہر شامل ہیں۔ زخمیوں میں سے 14 کو ڈنڈے
اسپتال منتقل کیا گیا جبکہ دو کو راٹھی اسپتال دھنتولی داخل کرایا گیا۔ اس حادثے میں
کمپنی کی قیمتی مشینیں اور لاکھوں کا سامان بھی مکمل طور پر تباہ ہوگیا۔
حادثہ کے وقت رات گیارہ بجے کے بعد والی شفٹ جاری تھی اور مزدور مختلف یونٹوں
میں اپنے فرائض انجام دے رہے تھے۔ حادثے کی اطلاع ملتے ہی سابق وزیر داخلہ انیل دیشمکھ
جائے وقوع پر پہنچے اور حالات کا جائزہ لیا۔ انہوں نے اپنی فاؤنڈیشن کی ایمبولینس
کے ذریعے چھ زخمیوں کو فوری طور پر ناگپور منتقل کروایا۔
سیکورٹی وجوہات کے باعث کمپنی کے احاطے میں داخلے پر فی الحال پابندی عائد کردی
گئی ہے۔ سولر گروپ کمپنی نہ صرف ہندوستان کے دفاعی شعبے کو بلکہ 30 سے زیادہ ممالک
کو بھی اسلحہ اور دھماکہ خیز مواد فراہم کرتی ہے۔ تاہم ہر سال پیش آنے والے حادثات
نے مزدوروں کی سلامتی کے حوالے سے اس کمپنی کے انتظامات پر سنگین سوال کھڑے کردیئے
ہیں۔ تازہ ترین سانحہ نے حفاظتی نظام کی کمزوری کو ایک بار پھر اجاگر کردیا ہے۔
ہندوستھان
سماچار
——————–
ہندوستان سماچار / جاوید این اے
