ਮੈਡ੍ਰਿਡ, 07 ਮਾਰਚ । ਰੀਅਲ ਮੈਡ੍ਰਿਡ ਨੇ ਆਪਣੀ ਕਿਸਮਤ ਦੇ ਦਮ ‘ਤੇ ਬੁੱਧਵਾਰ ਨੂੰ ਆਰਬੀ ਲੀਪਜ਼ਿਗ ਨਾਲ ਘਰੇਲੂ ਮੈਦਾਨ ‘ਤੇ 1-1 ਨਾਲ ਵਿਵਾਦਪੂਰਨ ਡਰਾਅ ਖੇਡ ਕੇ ਯੂਈਐੱਫਏ ਚੈਂਪੀਅਨਜ਼ ਲੀਗ ਦੇ ਕੁਆਰਟਰ ਫਾਈਨਲ ‘ਚ ਪ੍ਰਵੇਸ਼ ਕੀਤਾ, ਮੈਡ੍ਰਿਡ ਨੇ ਆਖਰੀ 16 ਦੇ ਪਹਿਲੇ ਗੇੜ ‘ਚ 1-0 ਨਾਲ ਜਿੱਤ ਦਰਜ ਕੀਤੀ ਸੀ ਅਤੇ ਇਸ ਡਰਾਅ ਨਾਲ ਉਨ੍ਹਾਂ ਨੇ 2-1 ਦੇ ਕੁੱਲ ਸਕੋਰ ਨਾਲ ਆਖਰੀ 8 ਵਿੱਚ ਪ੍ਰਵੇਸ਼ ਕੀਤਾ।
ਮੈਚ ’ਚ ਲੀਪਜ਼ਿਗ ਨੇ ਬਿਹਤਰ ਸ਼ੁਰੂਆਤ ਕੀਤੀ। ਟੀਮ ਚੰਗੀ ਸ਼ੁਰੂਆਤ ਦਾ ਫਾਇਦਾ ਉਠਾਉਣ ਦੇ ਨੇੜੇ ਸੀ ਪਰ ਫਾਰਵਰਡ ਲੋਇਸ ਓਪੇਂਡਾ ਨੇ ਗੋਲ ਕਰਨ ਦੇ ਦੋ ਚੰਗੇ ਮੌਕੇ ਗੁਆ ਦਿੱਤੇ। ਇਸ ਤੋਂ ਬਾਅਦ ਲੀਪਜ਼ਿਗ ਦੇ ਮਿਡਫੀਲਡਰ ਜ਼ੇਵਰ ਸ਼ਲੇਗਰ ਨੂੰ ਵਿਨੀਸੀਅਸ ਨੂੰ ਬਾਹਰ ਕਰਨ ਲਈ ਪੀਲਾ ਕਾਰਡ ਦਿੱਤਾ ਗਿਆ। ਪਹਿਲਾ ਹਾਫ ਗੋਲ ਰਹਿਤ ਸਮਾਪਤ ਹੋਇਆ।
ਦੂਜਾ ਅੱਧ ਵਿਵਾਦ ਨਾਲ ਸ਼ੁਰੂ ਹੋਇਆ ਜਦੋਂ ਵਿਨੀਸੀਅਸ ਨੇ ਪਹਿਲਾਂ ਵਿਲੀ ਓਰਬਨ ’ਤੇ ਪਿੱਛੇ ਤੋਂ ਹਮਲਾ ਕੀਤਾ ਅਤੇ ਫਿਰ ਉਨ੍ਹਾਂ ਨੂੰ ਧੱਕਾ ਦਿੱਤਾ। ਰੈਫਰੀ ਮੈਡ੍ਰਿਡ ਦੇ ਖਿਡਾਰੀ ਨੂੰ ਹਮਲਾਵਰਤਾ ਲਈ ਲਾਲ ਕਾਰਡ ਦੇ ਕੇ ਆਸਾਨੀ ਨਾਲ ਬਾਹਰ ਭੇਜ ਸਕਦਾ ਸੀ, ਪਰ ਉਸਨੇ ਵਿਨੀਸੀਅਸ ਨੂੰ ਪੀਲਾ ਕਾਰਡ ਹੀ ਦਿਖਾਇਆ, ਜੋ ਲੀਪਜ਼ਿਗ ਲਈ ਘਾਤਕ ਸਾਬਤ ਹੋਇਆ, ਕਿਉਂਕਿ ਮੈਚ ਦੇ 65ਵੇਂ ਮਿੰਟ ‘ਚ ਬ੍ਰਾਜ਼ੀਲੀਅਨ ਖਿਡਾਰੀ ਵਿਨੀਸੀਅਸ ਨੇ ਗੋਲ ਕਰਕੇ ਆਪਣੀ ਟੀਮ ਨੂੰ 1-0 ਨਾਲ ਅੱਗੇ ਕਰ ਦਿੱਤਾ। ਹਾਲਾਂਕਿ, ਸਿਰਫ ਚਾਰ ਮਿੰਟ ਬਾਅਦ, ਓਰਬਨ ਨੇ ਹੈਡਰ ਨਾਲ ਗੋਲ ਕਰਕੇ ਲੀਪਜ਼ਿਗ ਨੂੰ 1-1 ਨਾਲ ਡਰਾਅ ’ਤੇ ਪਹੁੰਚਾ ਦਿੱਤਾ।
ਇਸ ਤੋਂ ਬਾਅਦ ਦੋਵੇਂ ਟੀਮਾਂ ਆਖ਼ਰੀ ਮਿੰਟ ਤੱਕ ਗੋਲ ਕਰਨ ਵਿੱਚ ਨਾਕਾਮ ਰਹੀਆਂ ਅਤੇ ਮੈਚ 1-1 ਦੀ ਬਰਾਬਰੀ ‘ਤੇ ਸਮਾਪਤ ਹੋ ਗਿਆ। ਕਿਉਂਕਿ ਪਹਿਲੇ ਗੇੜ ਵਿੱਚ ਮੈਡ੍ਰਿਡ ਨੇ ਲੀਪਜ਼ਿਗ ਨੂੰ 1-0 ਨਾਲ ਹਰਾਇਆ ਸੀ, ਇਸ ਲਈ ਉਨ੍ਹਾਂ ਦੇ ਕੁੱਲ 2-1 ਦੇ ਸਕੋਰ ਨਾਲ ਆਖਰੀ 8 ’ਚ ਜਗ੍ਹਾ ਬਣਾਈ।
