ਪਾਲਨਪੁਰ, 04 ਅਕਤੂਬਰ । ਬਨਾਸਕਾਂਠਾ ਜ਼ਿਲ੍ਹੇ ਦੀ ਦਾਂਤਾ ਤਹਿਸੀਲ ਵਿੱਚ ਸਥਿਤ ਸ਼ਕਤੀਪੀਠ ਅੰਬਾਜੀ ’ਚ ਪ੍ਰਸਾਦ ਵਿਵਾਦ ਮਾਮਲੇ ਵਿੱਚ ਵੱਡੀ ਕਾਰਵਾਈ ਕੀਤੀ ਗਈ ਹੈ। ਅੰਬਾਜੀ ਵਿੱਚ ਪ੍ਰਸਾਦ ਬਣਾਉਣ ਵਾਲੀ ਫਰਮ ਮੋਹਿਨੀ ਕੈਟਰਰਜ਼ ਦਾ ਠੇਕਾ 30 ਸਤੰਬਰ ਨੂੰ ਖਤਮ ਹੋ ਗਿਆ ਹੈ, ਇਸ ਲਈ ਫਰਮ ਦਾ ਠੇਕਾ ਰੀਨਿਊ ਨਹੀਂ ਕੀਤਾ ਗਿਆ ਹੈ। ਬਾਅਦ ਵਿੱਚ ਜਾਂਚ ਤੋਂ ਬਾਅਦ ਇਹ ਕੰਮ ਕਿਸੇ ਹੋਰ ਫਰਮ ਨੂੰ ਸੌਂਪ ਦਿੱਤਾ ਜਾਵੇਗਾ। ਉਦੋਂ ਤੱਕ ਮੰਦਰ ਦਾ ਸਟਾਫ ਅਤੇ ਰਸੋਈਏ ਹੀ ਪ੍ਰਸ਼ਾਦ ਤਿਆਰ ਕਰਨਗੇ।
ਮੰਦਰ ਟਰੱਸਟ ਦੇ ਪ੍ਰਧਾਨ ਅਤੇ ਬਨਾਸਕਾਂਠਾ ਜ਼ਿਲ੍ਹੇ ਦੇ ਕਲਕਟਰ ਵਰੁਣ ਵਰਣਵਾਲ ਨੇ ਦੱਸਿਆ ਕਿ ਇਸ ਸਾਲ 23 ਤੋਂ 29 ਸਤੰਬਰ ਤੱਕ ਅੰਬਾਜੀ ਵਿੱਚ ਹੋਣ ਵਾਲੇ ਭਾਦਰਵੀ ਪੂਨਮ ਮੇਲੇ ਲਈ ਮੰਦਰ ਵਿੱਚ ਬਣਾਏ ਜਾ ਰਹੇ ਪ੍ਰਸ਼ਾਦ ਲਈ ਘਿਓ ਦੀ ਪਰਖ ਕੀਤੀ ਗਈ ਸੀ। ਇਸ ਦੇ ਲਈ 28 ਅਗਸਤ ਨੂੰ ਘਿਓ ਦਾ ਸੈਂਪਲ ਲਿਆ ਗਿਆ ਸੀ। ਸੈਂਪਲ ਦੀ ਰਿਪੋਰਟ 15 ਸਤੰਬਰ ਨੂੰ ਆਈ ਸੀ, ਜਿਸ ਵਿੱਚ ਉਸਨੂੰ ਫੇਲ੍ਹ ਕਰਾਰ ਦਿੱਤਾ ਗਿਆ। ਇਸ ਤੋਂ ਬਾਅਦ ਮੰਦਰ ਪ੍ਰਸ਼ਾਸਨ ਨੇ ਕਾਰਵਾਈ ਕਰਦੇ ਹੋਏ ਘਿਓ ਦੇ 180 ਡੱਬੇ ਜ਼ਬਤ ਕਰ ਲਏ। ਨਾਲ ਹੀ, ਭਾਦਰਵੀ ਪੂਨਮ ਮੇਲੇ ਤੋਂ ਪਹਿਲਾਂ, ਮੰਦਰ ਵਿੱਚ ਵਰਤੋਂ ਲਈ ਬਨਾਸ ਡੇਅਰੀ ਤੋਂ ਸ਼ੁੱਧ ਘਿਓ ਲਿਆਂਦਾ ਗਿਆ ਅਤੇ ਪ੍ਰਸ਼ਾਦ ਵਿੱਚ ਵਰਤਿਆ ਗਿਆ।
ਭਾਦਰਵੀ ਪੂਨਮ ਮੇਲੇ ਦੌਰਾਨ 45 ਲੱਖ ਤੋਂ ਵੱਧ ਸ਼ਰਧਾਲੂਆਂ ਨੇ ਮਾਤਾ ਜੀ ਦੇ ਦਰਸ਼ਨ ਕੀਤੇ ਅਤੇ ਪ੍ਰਸ਼ਾਦ ਖਰੀਦਿਆ ਸੀ। ਮੰਦਰ ‘ਚ ਮਿਲਾਵਟੀ ਘਿਓ ਤੋਂ ਬਣਿਆ ਪ੍ਰਸਾਦ ਵਿਕਣ ਦੇ ਸ਼ੱਕ ਤੋਂ ਬਾਅਦ ਵਿਵਾਦ ਹੋਰ ਵਧ ਗਿਆ। ਇਸ ਸਬੰਧੀ ਟੈਂਪਲ ਟਰੱਸਟ ਦੇ ਪ੍ਰਧਾਨ ਵਰਣਵਾਲ ਨੇ ਦੱਸਿਆ ਕਿ ਅੰਬਾਜੀ ਵਿੱਚ ਪ੍ਰਸ਼ਾਦ ਬਣਾਉਣ ਵਾਲੀ ਫਰਮ ਮੋਹਿਨੀ ਕੈਟਰਰਜ਼ ਦਾ ਠੇਕਾ 30 ਸਤੰਬਰ ਨੂੰ ਖਤਮ ਹੋ ਗਿਆ ਹੈ, ਜਿਸ ਤੋਂ ਬਾਅਦ ਫਰਮ ਦਾ ਠੇਕਾ ਰੀਨਿਊ ਨਹੀਂ ਕੀਤਾ ਗਿਆ। ਜਦੋਂ ਤੱਕ ਕੰਮ ਨਵੀਂ ਏਜੰਸੀ ਨੂੰ ਸੌਂਪਿਆ ਜਾਂਦਾ ਹੈ, ਉਦੋਂ ਤੱਕ ਮੋਹਨਥਾਲ ਲਈ ਪ੍ਰਸ਼ਾਦ ਮੰਦਰ ਦੇ ਸਟਾਫ ਅਤੇ ਰਸੋਈਏ ਦੁਆਰਾ ਤਿਆਰ ਕੀਤਾ ਜਾਵੇਗਾ।
ਦੂਜੇ ਪਾਸੇ ਮੋਹਿਨੀ ਕੈਟਰਰਜ਼ ਦਾ ਕਹਿਣਾ ਹੈ ਕਿ ਮੇਲੇ ਤੋਂ ਪਹਿਲਾਂ ਅਹਿਮਦਾਬਾਦ ਦੇ ਮਾਧੂਪੁਰਾ ਨੀਲਕੰਠ ਟੇਡਰਜ਼ ਤੋਂ ਈ-ਵੇਅ ਬਿੱਲ ਰਾਹੀਂ 15-15 ਕਿਲੋ ਘਿਓ ਦੇ 300 ਡੱਬੇ ਮੰਗਵਾਏ ਗਏ ਸਨ। ਇਸ ਵਿੱਚੋਂ 120 ਡੱਬੇ ਘਿਓ ਦੀ ਪਹਿਲਾਂ ਹੀ ਵਰਤੋਂ ਹੋ ਚੁੱਕੀ ਸੀ। ਪ੍ਰਸ਼ਾਸਨ ਦੀ ਟੀਮ ਨੇ ਮੰਗਲਵਾਰ ਦੇਰ ਰਾਤ ਇੱਥੇ ਛਾਪਾ ਮਾਰ ਕੇ ਘਿਓ ਦੇ 3 ਟੀਨ ਜ਼ਬਤ ਕੀਤੇ। ਨੀਲਕੰਡ ਟਰੇਡਰਜ਼ ਦਾ ਮਾਲਕ ਫਰਾਰ ਦੱਸਿਆ ਜਾ ਰਿਹਾ ਹੈ। ਅੰਬਾਜੀ ਵਿੱਚ ਪ੍ਰਸਾਦ ਬਣਾਉਣ ਵਾਲੀ ਫਰਮ ਮੋਹਿਨੀ ਕੈਟਰਰਜ਼ ਦੇ ਮਾਲਕ ਖ਼ਿਲਾਫ਼ ਅੰਬਾਜੀ ਥਾਣੇ ਵਿੱਚ ਐਫਆਈਆਰ ਦਰਜ ਕੀਤੀ ਗਈ ਹੈ।
