ਮੁੰਬਈ, 29 ਸਤੰਬਰ (ਹਿ. ਸ.)। ਮੁੰਬਈ ਸਮੇਤ ਪੂਰੇ ਮਹਾਰਾਸ਼ਟਰ ’ਚ ਸ਼ੁੱਕਰਵਾਰ ਸਵੇਰ ਤੱਕ ਭਗਵਾਨ ਗਣੇਸ਼ ਨੂੰ ਧੂਮ-ਧਾਮ ਨਾਲ ਵਿਦਾਈ ਦਿੱਤੀ ਗਈ। ਮੁੰਬਈ ਦੇ ਮਸ਼ਹੂਰ ਲਾਲਬਾਗ ਦੇ ਰਾਜਾ ਦੀ ਮੂਰਤੀ ਦਾ ਵਿਸਰਜਨ ਅੱਜ ਸਵੇਰੇ 9.10 ਵਜੇ ਪੂਰੀ ਸ਼ਰਧਾ ਭਾਵਨਾ ਨਾਲ ਕੀਤਾ ਗਿਆ। ਸ਼ਰਧਾਲੂ ਗਣੇਸ਼ ਜੀ ਨੂੰ ‘‘ਗਣਪਤੀ ਬੱਪਾ ਮੋਰਿਆ, ਅਗਲੇ ਬਰਸ ਤੂ ਜਲਦੀ ਆ’ ਆਦਿ ਨਾਅਰਿਆਂ ਨਾਲ ਵਿਦਾਈ ਦਿੰਦੇ ਨਜ਼ਰ ਆਏ। ਇਸ ਦੇ ਨਾਲ ਹੀ ਮੁੰਬਈ ’ਚ 83 ਹਜ਼ਾਰ ਛੋਟੀਆਂ-ਵੱਡੀਆਂ ਗਣੇਸ਼ ਮੂਰਤੀਆਂ ਦਾ ਵਿਸਰਜਨ ਪੂਰੇ ਉਤਸ਼ਾਹ ਨਾਲ ਕੀਤਾ ਗਿਆ। ਪੁਣੇ ਸ਼ਹਿਰ ’ਚ ਸ਼ਰਧਾਲੂ ਪੂਰੇ ਉਤਸ਼ਾਹ ਨਾਲ ਅਤੇ ਸੰਗੀਤਕ ਸਾਜ਼ ਵਜਾ ਕੇ ਭਗਵਾਨ ਗਣੇਸ਼ ਨੂੰ ਅਲਵਿਦਾ ਕਹਿ ਰਹੇ ਹਨ।
ਮੁੰਬਈ ’ਚ ਗਣੇਸ਼ ਵਿਸਰਜਨ ਵੀਰਵਾਰ ਸਵੇਰੇ ਹੀ ਸ਼ੁਰੂ ਹੋ ਗਿਆ ਸੀ। ਲਾਲਬਾਗ ਦੇ ਰਾਜਾ ਗਣਪਤੀ ਨੂੰ ਵੀਰਵਾਰ ਸਵੇਰੇ ਕਰੀਬ 10 ਵਜੇ ਮੰਡਪ ਤੋਂ ਵਿਸਰਜਨ ਸਥਾਨ ਵੱਲ ਰਵਾਨਾ ਕੀਤਾ ਗਿਆ ਸੀ, ਪਰ ਲਾਲਬਾਗ ਦੇ ਰਾਜਾ ਨੇ ਕੁਝ ਕਿਲੋਮੀਟਰ ਦਾ ਸਫ਼ਰ 23 ਘੰਟਿਆਂ ਵਿੱਚ ਪੂਰਾ ਕੀਤਾ। ਲਾਲਬਾਗ ਦੇ ਰਾਜੇ ਦਾ ਕਈ ਥਾਵਾਂ ’ਤੇ ਸਵਾਗਤ ਕੀਤਾ ਗਿਆ। ਇੰਝ ਲੱਗ ਰਿਹਾ ਸੀ ਜਿਵੇਂ ਪੂਰੀ ਮੁੰਬਈ ਭਗਵਾਨ ਗਣੇਸ਼ ਦੀ ਧੀਮੀ ਗਤੀ ਨਾਲ ਨੱਚ ਰਹੀ ਹੋਵੇ ਅਤੇ ਗਾ ਰਹੀ ਹੋਵੇ। ਲਾਲਬਾਗ ਦਾ ਰਾਜਾ ਸ਼ੁੱਕਰਵਾਰ ਸਵੇਰੇ 8 ਵਜੇ ਜਦੋਂ ਗਿਰਗਾਂਵ ਚੌਪਾਟੀ ’ਤੇ ਪਹੁੰਚਿਆ ਤਾਂ ਲੱਖਾਂ ਲੋਕਾਂ ਨੇ ਹੱਥ ਖੜ੍ਹੇ ਕਰਕੇ ਬੱਪਾ ਦੇ ਦਰਸ਼ਨ ਕੀਤੇ। ਸਵੇਰੇ 9.15 ਵਜੇ ਲਾਲਬਾਗ ਦਾ ਰਾਜਾ ਸਮੁੰਦਰ ਦੇ ਪਾਣੀ ਵਿੱਚ ਸਮਾ ਗਏ।
ਮੁੰਬਈ ਦੇ ਵਰਲੀ, ਗਿਰਗਾਮ ਚੌਪਾਟੀ, ਜੁਹੂ ਚੌਪਾਟੀ, ਮਾਰਵੇ ਚੌਪਾਟੀ ਸਮੇਤ ਹਰ ਥਾਂ ਘਾਟਾਂ ’ਤੇ ਗਣੇਸ਼ ਭਗਤਾਂ ਦਾ ਉਤਸ਼ਾਹ ਦੇਖਣ ਨੂੰ ਮਿਲਿਆ। ਸਾਰੇ ਗਣੇਸ਼ ਭਗਤ ਢੋਲ ਤਾਸ਼ਾ ਦੀ ਧੁਨ ’ਤੇ ਨੱਚਦੇ ਹੋਏ ਭਗਵਾਨ ਗਣੇਸ਼ ਨਾਲ ਵਿਸਰਜਨ ਸਥਾਨ ਵੱਲ ਵਧ ਰਹੇ ਸਨ। ਇਸ ਕਾਰਨ ਪੂਰਾ ਮੁੰਬਈ ਮਹਾਂਨਗਰ ਗਣੇਸ਼ ਜੀ ਦੇ ਰੰਗ ’ਚ ਰੰਗਿਆ ਗਿਆ। ਮੁੰਬਈ ’ਚ ਲਗਭਗ 20 ਹਜ਼ਾਰ ਪੁਲਿਸ ਕਰਮਚਾਰੀ ਸ਼ਹਿਰ ਦੇ ਹਰ ਕੋਨੇ ’ਚ ਤਾਇਨਾਤ ਸਨ, ਜਿਸ ਕਾਰਨ ਕਿਤੇ ਵੀ ਅਣਸੁਖਾਵੀਂ ਘਟਨਾ ਨਹੀਂ ਵਾਪਰ ਸਕੀ। ਮੁੰਬਈ ਦੇ ਨਾਲ-ਨਾਲ ਨਾਸਿਕ, ਪੁਣੇ, ਕੋਲਹਾਪੁਰ, ਛਤਰਪਤੀ ਸੰਭਾਜੀਨਗਰ ਆਦਿ ਜ਼ਿਲ੍ਹਿਆਂ ਵਿੱਚ ਭਗਵਾਨ ਗਣੇਸ਼ ਨੂੰ ਪੂਰੀ ਖੁਸ਼ੀ ਅਤੇ ਉਤਸ਼ਾਹ ਨਾਲ ਵਿਦਾਇਗੀ ਦਿੱਤੀ ਗਈ ਅਤੇ ਸ਼ਰਧਾਲੂਆਂ ਨੇ ਅਗਲੇ ਸਾਲ ਉਨ੍ਹਾਂ ਦੇ ਜਲਦੀ ਆਉਣ ਦੀ ਪ੍ਰਾਰਥਨਾ ਕੀਤੀ।
ਹਿੰਦੂਸਥਾਨ ਸਮਾਚਾਰ/ਸੁਰਿੰਦਰ/ਸੰਜੀਵ
