ਲੰਡਨ, 27 ਨਵੰਬਰ (ਹਿ.ਸ.)। ਆਇਰਲੈਂਡ ਦੇ ਲੇਖਕ ਪਾਲ ਲਿੰਚ ਨੂੰ ਇੱਥੇ ਓਲਡ ਬਿਲਿੰਗਗੇਟ ਵਿਖੇ ਬੁਕਰ ਪੁਰਸਕਾਰ-2023 ਨਾਲ ਸਨਮਾਨਿਤ ਕੀਤਾ ਗਿਆ। ਉਨ੍ਹਾਂ ਨੂੰ ਇਹ ਪੁਰਸਕਾਰ ‘ਪ੍ਰਾਫੇਟ ਸਾਂਗ’ ਨਾਵਲ ਲਈ ਦਿੱਤਾ ਗਿਆ। 46 ਸਾਲਾ ਲਿੰਚ ਨੇ ਲੰਡਨ ਸਥਿਤ ਭਾਰਤੀ ਮੂਲ ਦੀ ਲੇਖਿਕਾ ਚੇਤਨਾ ਮਾਰੂ ਦੇ ਪਹਿਲੇ ਨਾਵਲ ‘ਵੈਸਟਰਨ ਲੇਨ’ ਨੂੰ ਹਰਾ ਕੇ ਇਹ ਐਵਾਰਡ ਜਿੱਤਿਆ।
ਲੰਡਨ ਤੋਂ ਛਪਣ ਵਾਲੇ ਅਖਬਾਰ ‘ਦਿ ਟਾਈਮਜ਼’ ਮੁਤਾਬਕ ਲਿੰਚ ਨੇ ਪ੍ਰਾਫੇਟ ਸਾਂਗ ‘ਚ ਤਾਨਾਸ਼ਾਹੀ ਦੀ ਲਪੇਟ ਵਾਲੇ ਆਇਰਲੈਂਡ ਦੀ ਤਸਵੀਰ ਪੇਸ਼ ਕੀਤੀ ਹੈ। ਨਾਵਲ ਇੱਕ ਅਜਿਹੇ ਪਰਿਵਾਰ ਦੀ ਕਹਾਣੀ ‘ਤੇ ਕੇਂਦਰਿਤ ਹੈ ਜੋ ਲੋਕਤੰਤਰੀ ਨਿਯਮਾਂ ਦੇ ਅੰਤ ਦੀ ਤ੍ਰਾਸਦੀ ਨਾਲ ਜੂਝਦਾ ਹੈ। 50 ਹਜ਼ਾਰ ਪੌਂਡ ਦੀ ਇਨਾਮੀ ਰਾਸ਼ੀ ਵਾਲੇ ਇਸ ਵੱਕਾਰੀ ਪੁਰਸਕਾਰ ਨੂੰ ਜਿੱਤਣ ਤੋਂ ਬਾਅਦ, ਲਿੰਚ ਨੇ ਕਿਹਾ, “ਮੈਂ ਆਧੁਨਿਕ ਅਰਾਜਕਤਾ ਨੂੰ ਦੇਖਣ ਦੀ ਕੋਸ਼ਿਸ਼ ਕੀਤੀ। ਮੈਂ ਪੱਛਮੀ ਲੋਕਤੰਤਰ ਵਿੱਚ ਅਸ਼ਾਂਤੀ ਨੂੰ ਵੇਖਣ ਦੀ ਕੋਸ਼ਿਸ਼ ਕੀਤੀ। “ਸੀਰੀਆ ਦੀ ਸਮੱਸਿਆ, ਸ਼ਰਨਾਰਥੀ ਸੰਕਟ ਦੇ ਪੈਮਾਨੇ ਅਤੇ ਪੱਛਮ ਦੀ ਉਦਾਸੀਨਤਾ ਨੂੰ ਵੀ ਮਹਿਸੂਸ ਕੀਤਾ।”
ਲਿੰਚ ਇਹ ਪੁਰਸਕਾਰ ਜਿੱਤਣ ਵਾਲੀ ਪੰਜਵੇਂ ਆਇਰਿਸ਼ ਲੇਖਕ ਹਨ। ਇਸ ਤੋਂ ਪਹਿਲਾਂ ਆਇਰਲੈਂਡ ਦੇ ਆਇਰਿਸ ਮਰਡੋਕ, ਜੌਨ ਬੈਨਵਿਲ, ਰੌਡੀ ਡੋਇਲ ਅਤੇ ਐਨੀ ਐਨਰਾਈਟ ਇਹ ਐਵਾਰਡ ਜਿੱਤ ਚੁੱਕੇ ਹਨ। ‘ਦਿ ਟਾਈਮਜ਼’ ਮੁਤਾਬਕ ਓਲਡ ਬਿਲਿੰਗਗੇਟ ‘ਚ ਆਯੋਜਿਤ ਸਮਾਰੋਹ ‘ਚ ਸ਼੍ਰੀਲੰਕਾਈ ਲੇਖਕ ਸ਼ੇਹਾਨ ਕਰੁਣਾਥਿਲਕਾ ਨੇ ਉਨ੍ਹਾਂ ਨੂੰ ਇਹ ਪੁਰਸਕਾਰ ਦਿੱਤਾ। ਪਿਛਲੇ ਸਾਲ ਕਰੁਣਾਥਿਲਕਾ ਨੂੰ ਉਨ੍ਹਾਂ ਦੇ ਨਾਵਲ ‘ਦ ਸੇਵਨ ਮੂਨਸ ਆਫ ਮਾਲੀ ਅਲਮੇਡਾ’ ਲਈ ਬੁਕਰ ਪੁਰਸਕਾਰ ਦਿੱਤਾ ਗਿਆ ਸੀ।
ਇਸ ਸਾਲ ਬੁਕਰ ਪੁਰਸਕਾਰ ਲਈ ਛੇ ਲੇਖਕ ਦਾਅਵੇਦਾਰ ਸਨ। ਇਨ੍ਹਾਂ ਵਿੱਚ ਕੀਨੀਆ ਵਿੱਚ ਜਨਮੀ ਚੇਤਨਾ ਮਾਰੂ ਵੀ ਸ਼ਾਮਲ ਹੈ। ਮਾਰੂ ਦਾ ਨਾਵਲ ਵੈਸਟਰਨ ਲੇਨ ਬ੍ਰਿਟਿਸ਼ ਗੁਜਰਾਤੀ ਪਰਿਵੇਸ਼ ‘ਤੇ ਆਧਾਰਿਤ ਹੈ। ਬੁਕਰ ਪੁਰਸਕਾਰ ਚੋਣ ਕਮੇਟੀ ਨੇ ਬ੍ਰਿਟਿਸ਼ ਨਾਵਲ ਵਿੱਚ ਗੁੰਝਲਦਾਰ ਮਨੁੱਖੀ ਭਾਵਨਾਵਾਂ ਦੇ ਰੂਪਕ ਵਜੋਂ ਸਕੁਐਸ਼ ਦੀ ਖੇਡ ਦੀ ਵਰਤੋਂ ਕਰਨ ਲਈ ਵੈਸਟਰਨ ਲੇਨ ਦੀ ਪ੍ਰਸ਼ੰਸਾ ਕੀਤੀ।
ਹਿੰਦੂਸਥਾਨ ਸਮਾਚਾਰ/ਸੁਰਿੰਦਰ/ਸੰਜੀਵ
