ਮੁੰਬਈ, 18 ਜਨਵਰੀ (ਹਿ. ਸ.)। ਭੋਜਪੁਰੀ ਕਲਾ ਜਗਤ ਦੀ ਮਸ਼ਹੂਰ ਅਦਾਕਾਰਾ ਅਕਸ਼ਰਾ ਸਿੰਘ ਬਾਰੇ ਵੱਡੀ ਜਾਣਕਾਰੀ ਸਾਹਮਣੇ ਆਈ ਹੈ। ਬਿਹਾਰ ਦੇ ਔਰੰਗਾਬਾਦ ‘ਚ ਇਕ ਪ੍ਰੋਗਰਾਮ ‘ਚ ਗਈ ਅਕਸ਼ਰਾ ‘ਤੇ ਲੋਕਾਂ ਨੇ ਪਥਰਾਅ ਕਰਕੇ ਹਮਲਾ ਕਰ ਦਿੱਤਾ। ਇਸ ਹਮਲੇ ‘ਚ ਅਕਸ਼ਰਾ ਵਾਲ-ਵਾਲ ਬਚ ਗਈ। ਹਾਲਾਂਕਿ ਉਨ੍ਹਾਂ ਦੀ ਸੁਰੱਖਿਆ ਕਰ ਰਿਹਾ ਇਕ ਪੁਲਿਸ ਮੁਲਾਜ਼ਮ ਜ਼ਖਮੀ ਹੋ ਗਿਆ।
ਅਕਸ਼ਰਾ 17 ਜਨਵਰੀ ਨੂੰ ਔਰੰਗਾਬਾਦ ਦੇ ਦਾਊਦ ਨਗਰ ‘ਚ ਇਕ ਸ਼ੋਅਰੂਮ ਦਾ ਉਦਘਾਟਨ ਕਰਨ ਗਈ ਸੀ। ਪ੍ਰੋਗਰਾਮ ‘ਚ ਦੇਰੀ ਨਾਲ ਪਹੁੰਚਣ ‘ਤੇ ਅਕਸ਼ਰਾ ਦੇ ਪ੍ਰਸ਼ੰਸਕ ਕਾਫੀ ਗੁੱਸੇ ‘ਚ ਸਨ। ਇੰਨਾ ਹੀ ਨਹੀਂ ਉਸ ਨਾਲ ਸੈਲਫੀ ਲੈਣ ਲਈ ਭਾਰੀ ਭੀੜ ਇਕੱਠੀ ਹੋ ਗਈ। ਇਸ ਭੀੜ ‘ਚ ਗੁੱਸੇ ‘ਚ ਆਏ ਪ੍ਰਸ਼ੰਸਕਾਂ ਨੇ ਇਕ-ਦੂਜੇ ਨੂੰ ਧੱਕਾ ਦਿੱਤਾ ਅਤੇ ਪਥਰਾਅ ਸ਼ੁਰੂ ਕਰ ਦਿੱਤਾ।
ਦਰਅਸਲ, ਅਕਸ਼ਰਾ ਦੀ ਫਲਾਈਟ ਲੇਟ ਪਹੁੰਚੀ ਅਤੇ ਉਹ ਵੀ ਮੌਕੇ ‘ਤੇ ਪਹੁੰਚਣ ‘ਚ ਲੇਟ ਹੋ ਗਈ, ਜਿਸ ਕਾਰਨ ਪ੍ਰਸ਼ੰਸਕਾਂ ‘ਚ ਪਹਿਲਾਂ ਹੀ ਨਾਰਾਜ਼ਗੀ ਸੀ। ਇਸ ਦੌਰਾਨ ਪ੍ਰਸ਼ੰਸਕ ਉਸ ਨਾਲ ਸੈਲਫੀ ਅਤੇ ਫੋਟੋਆਂ ਖਿੱਚਣ ਲਈ ਵੱਡੀ ਗਿਣਤੀ ‘ਚ ਇਕੱਠੇ ਹੋਏ। ਭੀੜ ਬੇਕਾਬੂ ਹੋਣ ਕਾਰਨ ਇੰਨੀ ਵੱਡੀ ਭੀੜ ਨੂੰ ਕਾਬੂ ਕਰਨਾ ਮੁਸ਼ਕਲ ਹੋ ਗਿਆ। ਪ੍ਰਸ਼ੰਸਕਾਂ ਨੇ ਰੌਲਾ ਪਾਉਣਾ ਸ਼ੁਰੂ ਕਰ ਦਿੱਤਾ। ਇਸ ਧੱਕਾ-ਮੁੱਕੀ ਕਾਰਨ ਕੁਝ ਪ੍ਰਸ਼ੰਸਕ ਜ਼ਖਮੀ ਹੋ ਗਏ। ਇੰਨਾ ਹੀ ਨਹੀਂ ਜ਼ਖਮੀ ਪ੍ਰਸ਼ੰਸਕਾਂ ਨੇ ਗੁੱਸੇ ‘ਚ ਅਕਸ਼ਰਾ ‘ਤੇ ਹਮਲਾ ਕਰ ਦਿੱਤਾ। ਉਨ੍ਹਾਂ ਨੇ ਉਸ ‘ਤੇ ਪੱਥਰ ਸੁੱਟਣੇ ਸ਼ੁਰੂ ਕਰ ਦਿੱਤੇ ਪਰ ਮੌਕੇ ‘ਤੇ ਮੌਜੂਦ ਪੁਲਿਸ ਨੇ ਅਕਸ਼ਰਾ ਦੀ ਸੁਰੱਖਿਆ ਕੀਤੀ ਅਤੇ ਸੱਟ ਨਹੀਂ ਲੱਗਣ ਦਿੱਤੀ।
ਇਸ ਦੌਰਾਨ ਹਮਲੇ ਵਿੱਚ ਇੱਕ ਪੁਲਿਸ ਮੁਲਾਜ਼ਮ ਜ਼ਖ਼ਮੀ ਹੋ ਗਿਆ ਅਤੇ ਉਸਦਾ ਸਰਕਾਰੀ ਉਪ ਮੰਡਲ ਹਸਪਤਾਲ ਦਾਊਦ ਨਗਰ ਵਿੱਚ ਇਲਾਜ ਚੱਲ ਰਿਹਾ ਹੈ। ਦੱਸਿਆ ਜਾਂਦਾ ਹੈ ਕਿ ਇਸ ਘਟਨਾ ਤੋਂ ਬਾਅਦ ਅਕਸ਼ਰਾ ਸੁਰੱਖਿਅਤ ਦਾਊਦ ਨਗਰ ਤੋਂ ਨਿਕਲ ਗਈ ਸੀ।
ਹਿੰਦੂਸਥਾਨ ਸਮਾਚਾਰ/ਸੁਰਿੰਦਰ/ਸੰਜੀਵ
