ਮੁੰਬਈ, 19 ਜਨਵਰੀ (ਹਿ. ਸ.)। ਸਾਊਥ ਸਿਨੇ ਇੰਡਸਟਰੀ ‘ਚ ਲੇਡੀ ਸੁਪਰਸਟਾਰ ਵਜੋਂ ਜਾਣੀ ਜਾਂਦੀ ਅਭਿਨੇਤਰੀ ਨਯਨਤਾਰਾ ਨੇ ਆਪਣੀ ਫਿਲਮ ‘ਅੰਨਪੂਰਣੀ’ ‘ਚ ਪ੍ਰਭੂ ਰਾਮਚੰਦਰ ਨੂੰ ਲੈ ਕੇ ਵਿਵਾਦਿਤ ਬਿਆਨ ਦਿੱਤਾ ਸੀ। ਨਿਰਮਾਤਾਵਾਂ ਦੇ ਖਿਲਾਫ ਇਸ ਆਧਾਰ ‘ਤੇ ਸ਼ਿਕਾਇਤ ਵੀ ਦਰਜ ਕਰਵਾਈ ਗਈ ਸੀ ਕਿ ਇਸ ਨਾਲ ਧਾਰਮਿਕ ਭਾਵਨਾਵਾਂ ਨੂੰ ਠੇਸ ਪਹੁੰਚੀ ਹੈ। ਵਧਦੇ ਵਿਵਾਦ ਕਾਰਨ ਨੈੱਟਫਲਿਕਸ ਨੇ ਫਿਲਮ ਨੂੰ ਹਟਾ ਦਿੱਤਾ ਹੈ। ਇਸ ਤੋਂ ਬਾਅਦ ਨਯਨਤਾਰਾ ਨੇ ਮੁਆਫੀ ਮੰਗ ਲਈ ਹੈ।
ਨਯਨਤਾਰਾ ਨੇ ਇੰਸਟਾਗ੍ਰਾਮ ‘ਤੇ ਮੁਆਫੀ ਮੰਗੀ। ਉਸ ਬਿਆਨ ਵਿੱਚ ਵੱਡੇ ਅੱਖਰਾਂ ਵਿੱਚ ਜੈ ਸ਼੍ਰੀ ਰਾਮ ਲਿਖਿਆ ਹੋਇਆ ਹੈ। ਮੇਰੀ ਫਿਲਮ ‘ਅੰਨਪੂਰਣੀ’ ਸਿਰਫ ਵਿੱਤੀ ਲਾਭ ਲਈ ਨਹੀਂ ਬਣਾਈ ਗਈ ਸੀ, ਅਸੀਂ ਇਸ ਫਿਲਮ ਰਾਹੀਂ ਇੱਕ ਸਕਾਰਾਤਮਕ ਸੰਦੇਸ਼ ਦੇਣਾ ਚਾਹੁੰਦੇ ਸੀ, ਪਰ ਅਣਜਾਣੇ ਵਿੱਚ ਕੁਝ ਲੋਕਾਂ ਦੀਆਂ ਭਾਵਨਾਵਾਂ ਨੂੰ ਠੇਸ ਪਹੁੰਚੀ ਹੈ। ਅਸੀਂ ਇਹ ਨਹੀਂ ਸੋਚਿਆ ਸੀ ਕਿ ਸੈਂਸਰ ਬੋਰਡ ਤੋਂ ਮਨਜ਼ੂਰੀ ਮਿਲਣ ਤੋਂ ਬਾਅਦ ਸਿਨੇਮਾਘਰਾਂ ‘ਚ ਰਿਲੀਜ਼ ਹੋਣ ਵਾਲੀ ਫਿਲਮ ਨੂੰ ਓਟੀਟੀ ਤੋਂ ਹਟਾ ਦਿੱਤਾ ਜਾਵੇਗਾ। ਨਾ ਤਾਂ ਮੇਰੀ ਟੀਮ ਅਤੇ ਨਾ ਹੀ ਮੇਰਾ ਇਰਾਦਾ ਲੋਕਾਂ ਦੀਆਂ ਭਾਵਨਾਵਾਂ ਨੂੰ ਠੇਸ ਪਹੁੰਚਾਉਣਾ ਸੀ। ਨਯਨਤਾਰਾ ਨੇ ਲਿਖਿਆ, ਮੇਰੇ ਦੋ ਦਹਾਕਿਆਂ ਦੇ ਲੰਬੇ ਫਿਲਮੀ ਕਰੀਅਰ ਵਿੱਚ ਮੇਰਾ ਉਦੇਸ਼ ਸਕਾਰਾਤਮਕਤਾ ਫੈਲਾਉਣਾ ਰਿਹਾ ਹੈ।
ਫਿਲਮ ‘ਅੰਨਪੂਰਣੀ’ 1 ਦਸੰਬਰ ਨੂੰ ਸਿਨੇਮਾਘਰਾਂ ‘ਚ ਅਤੇ ਫਿਰ 29 ਦਸੰਬਰ ਨੂੰ ਓਟੀਟੀ ਪਲੇਟਫਾਰਮ ਨੈੱਟਫਲਿਕਸ ‘ਤੇ ਰਿਲੀਜ਼ ਹੋਈ ਸੀ। ਫਿਲਮ ‘ਤੇ ਹਿੰਦੂਆਂ ਦੀਆਂ ਧਾਰਮਿਕ ਭਾਵਨਾਵਾਂ ਨੂੰ ਠੇਸ ਪਹੁੰਚਾਉਣ ਦਾ ਦੋਸ਼ ਲਗਾਇਆ ਗਿਆ ਸੀ, ਜਿਸ ਤੋਂ ਬਾਅਦ ਫਿਲਮ ਨੂੰ ਨੈੱਟਫਲਿਕਸ ਤੋਂ ਹਟਾ ਦਿੱਤਾ ਗਿਆ। ਇੰਨਾ ਹੀ ਨਹੀਂ ਫਿਲਮ ਦੇ ਨਿਰਮਾਤਾ ਅਤੇ ਨਯਨਤਾਰਾ ਖਿਲਾਫ ਵੀ ਸ਼ਿਕਾਇਤ ਦਰਜ ਕਰਵਾਈ ਗਈ ਸੀ।
ਹਿੰਦੂਸਥਾਨ ਸਮਾਚਾਰ/ਸੁਰਿੰਦਰ/ਸੰਜੀਵ
