ਕਾਠਮੰਡੂ, 31 ਦਸੰਬਰ (ਹਿ. ਸ.)। ਨੇਪਾਲ ਸਰਕਾਰ ਵੱਲੋਂ ਪਾਬੰਦੀ ਦੇ ਬਾਵਜੂਦ ਰਾਜਧਾਨੀ ਕਾਠਮੰਡੂ ਵਿੱਚ ਮਨੁੱਖੀ ਤਸਕਰੀ ਦੇ ਰੈਕੇਟ ਦਾ ਪਰਦਾਫਾਸ਼ ਹੋਇਆ ਹੈ। ਇਹ ਧੰਦਾ ਕੁਝ ਚੀਨੀ ਨਾਗਰਿਕ ਚਲਾ ਰਹੇ ਹਨ। ਨੇਪਾਲੀ ਨੌਜਵਾਨਾਂ ਨੂੰ ਰੂਸ ਭੇਜਣ ਦੇ ਨਾਮ ‘ਤੇ ਬਕਾਇਦਾ ਉਨ੍ਹਾਂ ਦੇ ਸਰੀਰਕ ਟੈਸਟ ਕਰਵਾਏ ਜਾ ਰਹੇ ਹਨ।
ਰਾਜਧਾਨੀ ਕਾਠਮੰਡੂ ਦੇ ਸਿਨਾਮੰਗਲ ਇਲਾਕੇ ਵਿੱਚ ਸਰੀਰਕ ਟੈਸਟ ਲਈ ਨੌਜਵਾਨਾਂ ਦੀ ਭਾਰੀ ਭੀੜ ਵੇਖੀ ਜਾ ਸਕਦੀ ਹੈ। ਕਰੀਬ ਪੰਜ ਹਜ਼ਾਰ ਨੌਜਵਾਨ ਆਪਣੀ ਵਾਰੀ ਦੀ ਉਡੀਕ ਕਰ ਰਹੇ ਹਨ। ਇੱਥੇ ‘ਸਿਨੋਪੇਕ ਇੰਜੀਨੀਅਰਿੰਗ ਗਰੁੱਪ ਰੂਸ’ ਲਿਖਿਆ ਬੈਨਰ ਲਟਕਿਆ ਹੋਇਆ ਹੈ, ਪਰ ਅੰਦਰ ਪ੍ਰੀਖਿਆ ਲੈਣ ਵਾਲੇ ਪੰਜ ਚੀਨੀ ਨਾਗਰਿਕ ਹਨ। ਮੁੱਖ ਗੇਟ ‘ਤੇ ਮੌਜੂਦ ਸੁਰੱਖਿਆ ਗਾਰਡ ਨੇ ਦੱਸਿਆ ਕਿ ਨੇਪਾਲੀ ਨੌਜਵਾਨਾਂ ਨੂੰ ਕਿਸੇ ਰੂਸੀ ਕੰਪਨੀ ਰਾਹੀਂ ਸੁਰੱਖਿਆ ਗਾਰਡ ਵਜੋਂ ਭਰਤੀ ਕੀਤਾ ਜਾ ਰਿਹਾ ਹੈ।
ਹੱਥਾਂ ਵਿਚ ਕੁਝ ਕਾਗਜ਼, ਵਿਦਿਅਕ ਯੋਗਤਾ ਸਰਟੀਫਿਕੇਟ ਅਤੇ ਸਿਹਤ ਸਰਟੀਫਿਕੇਟ ਲੈ ਕੇ ਕਤਾਰ ਵਿਚ ਖੜ੍ਹੇ ਨੌਜਵਾਨਾਂ ਦੀ ਉਮਰ 18 ਤੋਂ 30 ਸਾਲ ਦੇ ਵਿਚਕਾਰ ਦਿਖਾਈ ਦਿੱਤੀ। ਇਨ੍ਹਾਂ ਨੌਜਵਾਨਾਂ ਵਿੱਚੋਂ ਜ਼ਿਆਦਾਤਰ 25 ਸਾਲ ਤੋਂ ਘੱਟ ਉਮਰ ਦੇ ਸਨ। ਇਸ ਚੀਨੀ ਕੰਪਨੀ ਦੇ ਨੇਪਾਲੀ ਨੁਮਾਇੰਦੇ ਨੇ ਦੱਸਿਆ ਕਿ ਤਿੰਨ ਸੌ ਕਾਮਿਆਂ ਦੀ ਲੋੜ ਸੀ, ਜਿਸ ਲਈ ਦਸ ਹਜ਼ਾਰ ਲੋਕਾਂ ਨੇ ਫਾਰਮ ਭਰੇ। ਜਦੋਂ ਉਨ੍ਹਾਂ ਨੂੰ ਪੁੱਛਿਆ ਗਿਆ ਕਿ ਕੀ ਸਰਕਾਰ ਨੇ ਕਿਸੇ ਕੰਮ ਲਈ ਨੇਪਾਲ ਤੋਂ ਰੂਸ ਜਾਣ ਵਾਲੇ ਲੋਕਾਂ ‘ਤੇ ਪਾਬੰਦੀ ਲਗਾਈ ਹੈ ਤਾਂ ਉਨ੍ਹਾਂ ਦਾ ਜਵਾਬ ਸੀ ਕਿ ਚੀਨੀ ਕੰਪਨੀ ਨੇ ਨੇਪਾਲ ਸਰਕਾਰ ਤੋਂ ਇਜਾਜ਼ਤ ਲੈ ਲਈ ਹੈ।
ਰੂਸ ਵਿੱਚ ਨੌਕਰੀ ਕਰਨ ਦੇ ਚਾਹਵਾਨ ਨੌਜਵਾਨਾਂ ਨੇ ਦੱਸਿਆ ਕਿ ਇਸ ਰੂਸੀ ਕੰਪਨੀ ਵਿੱਚ ਤਨਖਾਹ 600 ਅਮਰੀਕੀ ਡਾਲਰ ਪ੍ਰਤੀ ਮਹੀਨਾ ਦੱਸੀ ਜਾ ਰਹੀ ਹੈ। ਨੌਜਵਾਨਾਂ ਨੇ ਇਹ ਵੀ ਖੁਲਾਸਾ ਕੀਤਾ ਕਿ ਨੌਕਰੀ ਲੈਣ ਲਈ ਉਨ੍ਹਾਂ ਨੂੰ ਕੰਪਨੀ ਨੂੰ 5 ਲੱਖ ਰੁਪਏ ਐਡਵਾਂਸ ਦੇਣੇ ਪੈਣਗੇ। ਉਨ੍ਹਾਂ ਦੀ ਚੋਣ ਤੋਂ ਤਿੰਨ ਮਹੀਨੇ ਬਾਅਦ ਹੀ ਉਨ੍ਹਾਂ ਨੂੰ ਰੂਸ ਭੇਜਿਆ ਜਾਵੇਗਾ। ਜਾਂਚ ਦੇ ਨਾਮ ‘ਤੇ ਨੌਜਵਾਨਾਂ ਨੂੰ ਰੇਤ ਨਾਲ ਭਰੀਆਂ ਬੋਰੀਆਂ ਚੁੱਕਣ ਲਈ ਕਿਹਾ ਜਾ ਰਿਹਾ ਹੈ। ਹੁਣ ਤੱਕ ਪੰਜ ਸੌ ਤੋਂ ਵੱਧ ਨੌਜਵਾਨ ਸਰੀਰਕ ਟੈਸਟ ਪਾਸ ਕਰਕੇ ਅੰਤਿਮ ਮੈਡੀਕਲ ਜਾਂਚ ਲਈ ਭੇਜ ਚੁੱਕੇ ਹਨ।
ਇਸ ਮਾਮਲੇ ਵਿੱਚ ਗ੍ਰਹਿ ਮੰਤਰਾਲੇ ਅਤੇ ਵਿਦੇਸ਼ ਮੰਤਰਾਲੇ ਦੇ ਬੁਲਾਰੇ ਨੇ ਕਿਹਾ ਕਿ ਕਿਸੇ ਵੀ ਕੰਪਨੀ ਨੂੰ ਰੂਸ ਵਿੱਚ ਕਾਮੇ ਭੇਜਣ ਦੀ ਇਜਾਜ਼ਤ ਨਹੀਂ ਦਿੱਤੀ ਗਈ ਹੈ। ਵਿਦੇਸ਼ ਮੰਤਰੀ ਦੇ ਬੁਲਾਰੇ ਅੰਮ੍ਰਿਤ ਰਾਏ ਨੇ ਕਿਹਾ ਕਿ ਜੇਕਰ ਅਜਿਹਾ ਗੈਰ-ਕਾਨੂੰਨੀ ਢੰਗ ਨਾਲ ਕੀਤਾ ਜਾ ਰਿਹਾ ਹੈ ਤਾਂ ਇਹ ਮਨੁੱਖੀ ਤਸਕਰੀ ਦੀ ਸ਼੍ਰੇਣੀ ਵਿੱਚ ਆਵੇਗਾ। ਉਨ੍ਹਾਂ ਕਿਹਾ ਕਿ ਇਸ ਮਾਮਲੇ ਦੀ ਗ੍ਰਹਿ ਮੰਤਰਾਲੇ ਨਾਲ ਤਾਲਮੇਲ ਕਰਕੇ ਜਾਂਚ ਕੀਤੀ ਜਾਵੇਗੀ। ਗ੍ਰਹਿ ਮੰਤਰਾਲੇ ਦੇ ਇੱਕ ਉੱਚ ਅਧਿਕਾਰੀ ਨੇ ਕਿਹਾ ਕਿ ਇਹ ਨੇਪਾਲ ਵਿੱਚ ਚੀਨੀ ਨਾਗਰਿਕਾਂ ਦੁਆਰਾ ਚਲਾਏ ਜਾ ਰਹੇ ਕਈ ਧੋਖਾਧੜੀ ਦੇ ਕਾਰੋਬਾਰਾਂ ਵਿੱਚੋਂ ਇੱਕ ਹੋਵੇਗਾ। ਇਸ ਦੀ ਡੂੰਘਾਈ ਨਾਲ ਜਾਂਚ ਕੀਤੀ ਜਾਵੇਗੀ।
ਹਿੰਦੂਸਥਾਨ ਸਮਾਚਾਰ/ਸੁਰਿੰਦਰ/ਸੰਜੀਵ
