ନୂଆଦିଲ୍ଲୀ, 26 ଡିସେମ୍ବର 2025:
ଦିଲ୍ଲୀରେ ବଢ଼ୁଥିବା ବାୟୁ ପ୍ରଦୂଷଣ ଏବଂ ଯାତାୟାତ ଜାମ୍କୁ କମାଇବା ପାଇଁ ଦିଲ୍ଲୀ ସରକାର ଏକ ସମଗ୍ର ପରିବହନ ରୋଡମ୍ୟାପ ଘୋଷଣା କରିଛନ୍ତି। ମୁଖ୍ୟମନ୍ତ୍ରୀ ରେଖା ଗୁପ୍ତାଙ୍କ ନେତୃତ୍ୱରେ ସରକାର କହିଛନ୍ତି ଯେ ସହରରେ ଯାନ ସଂଖ୍ୟା କମାଇବା ବିନା ପ୍ରଦୂଷଣ ନିୟନ୍ତ୍ରଣ ସମ୍ଭବ ନୁହେଁ। ସେହିପରି ଶେୟାର୍ଡ ମୋବିଲିଟି, ଇଲେକ୍ଟ୍ରିକ୍ ଯାନ ଓ ଯାନ ଫିଟନେସ୍ ଉପରେ ଜୋର ଦିଆଯାଉଛି।
ପରିବହନ ନୀତି ସମ୍ପର୍କରେ କହିବା ସମୟରେ ମୁଖ୍ୟମନ୍ତ୍ରୀ କହିଥିଲେ ଯେ ଅଳ୍ପ ଯାନରେ ଅଧିକ ଲୋକ ଯାତ୍ରା କରିବା ହିଁ ସରକାରର ମୁଖ୍ୟ ଲକ୍ଷ୍ୟ। ଏହା ଦ୍ୱାରା ଟ୍ରାଫିକ୍ ଭିଡ଼ କମିବ, ଇଂଧନ ସଞ୍ଚୟ ହେବ ଓ ପ୍ରଦୂଷଣ ହ୍ରାସ ପାଇବ।
ଏହି ଲକ୍ଷ୍ୟ ପାଇଁ ଦିଲ୍ଲୀ ସରକାର ଓଲା, ଉବର ଭଳି ଟ୍ରାନ୍ସପୋର୍ଟ ନେଟୱର୍କ କମ୍ପାନୀଙ୍କ ସହ ଆଲୋଚନା କରୁଛି। ଶୀଘ୍ର ଏକ ବିଶେଷ ବୈଠକ ହେବ, ଯେଉଁଥିରେ ଶେୟାର୍ଡ ରାଇଡ୍ ସେବା ବଢ଼ାଇବା, ମହିଳା ଡ୍ରାଇଭରଙ୍କ ସଂଖ୍ୟା ବଢ଼ାଇବା ଏବଂ ପରିବେଶ-ମିତ୍ର ସେବା ପ୍ରଚାର ଉପରେ ଆଲୋଚନା ହେବ।
ମୁଖ୍ୟମନ୍ତ୍ରୀ କହିଛନ୍ତି ଯେ କୋଭିଡ୍ ପୂର୍ବରୁ ଦିଲ୍ଲୀରେ ଶେୟାର୍ଡ ଟ୍ୟାକ୍ସି ସେବା ଚାଲୁ ଥିଲା, କିନ୍ତୁ ପରେ ସେଗୁଡିକ ବନ୍ଦ ହୋଇଯାଇଥିଲା। ଏବେ ସେହି ସେବାକୁ ଆଉଥରେ ସଂଗଠିତ ଓ ସ୍ଥାୟୀ ଭାବେ ଆରମ୍ଭ କରାଯିବ। ଏହା ସହିତ ନିଜସ୍ୱ ଇଲେକ୍ଟ୍ରିକ୍ ଯାନକୁ ଟ୍ୟାକ୍ସି ସେବା ସହ ଯୋଡ଼ିବା ଉପରେ ମଧ୍ୟ ଚିନ୍ତା ଚାଲିଛି।
ମହିଳାଙ୍କ ସୁରକ୍ଷା ଓ ରୋଜଗାରକୁ ଗୁରୁତ୍ୱ ଦେଇ ମୁଖ୍ୟମନ୍ତ୍ରୀ କହିଛନ୍ତି ଯେ ଟ୍ୟାକ୍ସି ସେବାରେ ଅଧିକ ମହିଳା ଡ୍ରାଇଭର ନିଯୁକ୍ତ କରାଯିବେ। ଏହା ଦ୍ୱାରା ମହିଳା ଯାତ୍ରୀଙ୍କୁ ସୁରକ୍ଷିତ ଯାତ୍ରା ମିଳିବା ସହିତ ରୋଜଗାରର ଅବସର ମଧ୍ୟ ବୃଦ୍ଧି ପାଇବ।
ପ୍ରଦୂଷଣ ନିୟନ୍ତ୍ରଣ ପାଇଁ ଦିଲ୍ଲୀ ସରକାର ସ୍ୱୟଂଚାଳିତ ଯାନ ଫିଟନେସ୍ ଟେଷ୍ଟିଂ ସେଣ୍ଟରଗୁଡ଼ିକୁ ବିସ୍ତାର କରୁଛି। ଝୁଲଝୁଲିରେ ଥିବା କେନ୍ଦ୍ର ପୂର୍ବରୁ କାର୍ଯ୍ୟରତ ଅଛି, ଯେଉଁଠାରେ ପ୍ରତିବର୍ଷ ପ୍ରାୟ 70,000 ଯାନର ପରୀକ୍ଷା ହେଉଛି। ବୁରାଡ଼ୀ କେନ୍ଦ୍ରକୁ ଅପଗ୍ରେଡ୍ କରାଯାଉଛି ଓ ନନ୍ଦନଗରୀ ଏବଂ ତେଖଣ୍ଡରେ ଦୁଇଟି ନୂଆ କେନ୍ଦ୍ର ନିର୍ମାଣାଧୀନ ଅଛି, ଯାହା ଆସନ୍ତା ବର୍ଷ ମାର୍ଚ୍ଚରେ କାର୍ଯ୍ୟକ୍ଷମ ହେବ। ଏହି ସମସ୍ତ କେନ୍ଦ୍ର ମିଶି ପ୍ରତିବର୍ଷ ପ୍ରାୟ 2.5 ରୁ 3 ଲକ୍ଷ ଯାନର ଫିଟନେସ୍ ପରୀକ୍ଷା କରିପାରିବେ।
ତଦୁପରି, ଦିଲ୍ଲୀ ଟ୍ରାନ୍ସପୋର୍ଟ କର୍ପୋରେସନ (DTC) ଡିପୋଗୁଡ଼ିକରେ ଆଉ 5ଟି ଅଟୋମେଟେଡ୍ ଫିଟନେସ୍ ସେଣ୍ଟର ସ୍ଥାପନକୁ ଅନୁମୋଦନ ମିଳିଛି। ଏହି କେନ୍ଦ୍ରଗୁଡ଼ିକ ବାୱାନା, ଘାଜିପୁର, ସାୱଦା ଘେଭ୍ରା, GTK ଡିପୋ ଏବଂ ଦିଛାଉ କଲାନରେ ସ୍ଥାପିତ ହେବ।
ମୁଖ୍ୟମନ୍ତ୍ରୀ କହିଛନ୍ତି ଯେ ବିଭିନ୍ନ ଗବେଷଣାରୁ ସାବିତ୍ର ହୋଇଛି ଯେ ଦିଲ୍ଲୀର ବାୟୁ ପ୍ରଦୂଷଣର ପ୍ରଧାନ କାରଣ ହେଉଛି ଯାନରୁ ନିଷ୍କାସିତ ଧୂଆଁ। ଏହି କାରଣରୁ ସରକାର ସାର୍ବଜନୀନ ପରିବହନ ବ୍ୟବସ୍ଥାକୁ ଶକ୍ତ କରୁଛି। ମେଟ୍ରୋ, ବସ ଏବଂ ଇଲେକ୍ଟ୍ରିକ୍ ଯାନ ହେଉଛି ଦିଲ୍ଲୀର ଦୀର୍ଘକାଳୀନ ପରିବହନ ନୀତିର ମୁଖ୍ୟ ଆଧାର।
ଦିଲ୍ଲୀ ମେଟ୍ରୋର ଫେଜ–5A ର କିଛି ରୁଟକୁ କେନ୍ଦ୍ର ସରକାରଙ୍କ ନୀତିଗତ ମଞ୍ଜୁରି ମିଳିଛି, ଯାହା ମେଟ୍ରୋ ନେଟୱର୍କକୁ ଆହୁରି ବିସ୍ତାର କରିବ ଏବଂ ବ୍ୟକ୍ତିଗତ ଯାନ ଉପରେ ନିର୍ଭରତା କମାଇବ।
ମୁଖ୍ୟମନ୍ତ୍ରୀ କହିଛନ୍ତି ଯେ ମେଟ୍ରୋ ବିସ୍ତାର ଯାତାୟାତ ଭିଡ଼ କମାଇବା ସହିତ ପ୍ରଦୂଷଣ ନିୟନ୍ତ୍ରଣରେ ଗୁରୁତ୍ୱପୂର୍ଣ୍ଣ ଭୂମିକା ନେବ।
“ଶକ୍ତିଶାଳୀ ସାର୍ବଜନୀନ ପରିବହନ ବ୍ୟବସ୍ଥା ହିଁ ରାସ୍ତାରେ ଯାନ ସଂଖ୍ୟା କମାଇବାର ସର୍ବୋତ୍ତମ ଉପାୟ,” ବୋଲି ସେ କହିଛନ୍ତି।
ଶେଷରେ ମୁଖ୍ୟମନ୍ତ୍ରୀ କହିଛନ୍ତି ଯେ ପ୍ରଦୂଷଣ ନିୟନ୍ତ୍ରଣ ପାଇଁ କେବଳ ଅଲ୍ପକାଳୀନ ପଦକ୍ଷେପ ପର୍ଯ୍ୟାପ୍ତ ନୁହେଁ, ଦୀର୍ଘକାଳୀନ ଓ ସମନ୍ୱିତ ନୀତି ଆବଶ୍ୟକ। ପରିବହନ ସୁଧାର ସହିତ ଧୂଳି ନିୟନ୍ତ୍ରଣ, ନିର୍ମାଣ ସ୍ଥଳର କଡ଼ା ନିରୀକ୍ଷଣ, ଯାନ୍ତ୍ରିକ ରୋଡ୍ ସଫାଇ, ଖୋଲାଘରେ କଚରା ଜଳାଇବାରେ ପାବନ୍ଧି ଓ ପ୍ରଦୂଷିତ ଅଞ୍ଚଳରେ ମିଷ୍ଟ ସ୍ପ୍ରେ ଓ ଆଣ୍ଟି-ସ୍ମଗ୍ ଗନ୍ ବ୍ୟବହାର ଭଳି ପଦକ୍ଷେପ ନିଆଯାଉଛି।
ସେ ଆହୁରି କହିଛନ୍ତି ଯେ ସମସ୍ତ ସମ୍ପୃକ୍ତ ବିଭାଗ ଏକତ୍ରିତ ଭାବେ କାମ କରୁଛନ୍ତି ଯାହାଦ୍ୱାରା ପ୍ରଦୂଷଣ ନିୟନ୍ତ୍ରଣ ଉପାୟଗୁଡ଼ିକ ସଫଳ ଭାବେ ରୂପାୟଣ ହୋଇପାରିବ। ଦିଲ୍ଲୀବାସୀଙ୍କୁ ସ୍ୱଚ୍ଛ ବାୟୁ, ସୁବିଧାଜନକ ଯାତାୟାତ ଏବଂ ସୁସ୍ଥ ନଗରୀୟ ପରିବେଶ ଯୋଗାଇବା ହିଁ ସରକାରର ପ୍ରମୁଖ ଲକ୍ଷ୍ୟ।
