लखनऊ, ०९ अक्टोबर (हि.स.)। बहुजन समाज पार्टी (बसपा) की राष्ट्रिय अध्यक्ष तथा उत्तर प्रदेशकी पूर्व मुख्यमन्त्री मायावतीले समाजवादी पार्टी (सपा)माथि प्रहार गर्दै भनिन् कि जब उनीहरू सत्तामा रहन्छन्, तब हाम्रा सन्त, महापुरुष र पीडीए उनीहरूलाई याद आउँदैन। सत्ताबाट बाहिरिएपछि भने उनीहरू तिनै नाममा संगोष्ठी र कार्यक्रम गर्न थाल्छन्।
बिहिवारका दिन बसपा संस्थापक कांशीरामको पुण्यतिथीको अवसरमा लखनऊमा आयोजित ठूलो जनसभालाई सम्बोधन गर्दै मायावतीले उक्त टिप्पणी गरेकी हुन्। यसअघि उनले कांशीरामको प्रतिमामा पुष्प अर्पण गरी श्रद्धाञ्जली दिइन्।
बसपा प्रमुखले भनिन्, “कांशीरामजीको पुण्यतिथीमा संगोष्ठी गर्ने घोषणा गर्ने यी समाजवादीहरूको दोहोरो चरित्रबाट जनता सचेत रहनुपर्छ। जब सपा सत्तामा रहन्छ, न त कांशीराम सम्झिन्छ, न त बाबा साहेब भीमराव अम्बेडकर। तर जब उनीहरूको सत्ता गुम्छ, तब पीडीए र हाम्रा सन्त–गुरुहरूको नाममा कार्यक्रम गर्न थाल्छन्।”
मायावतीले आरोप लगाइन्, सपाले कांशीरामको जीवित अवस्थामा नै उनका आन्दोलनलाई कमजोर पार्ने लगातार कोसिस गरेको थियो। बसपा सरकारमा कासगंजलाई जिल्ला मुख्यालय बनाएर ‘कांशीराम नगर’ नाम दिइएको नयाँ जिल्लाको नाम सपा सरकारले जातिवादी मानसिकता र राजनीतिक द्वेषका कारण परिवर्तन गरेको उनले स्मरण गराइन्। उनले थपिन्, “कांशीरामका नाममा बनेका विश्वविद्यालय, कलेज, अस्पताल र अन्य संस्थाहरूको नाम पनि सपा शासनमा परिवर्तन गरिएको थियो। यही हो तिनको दलित विरोधी चाल, चरित्र र अनुहार।”
मायावतीले सपा र कांग्रेस दुबैलाई निशाना बनाउँदै भनिन्, “यी दलहरूले कहिलेकाहीँ संकीर्ण राजनीति र भोटका स्वार्थका लागि मात्र कांशीरामजीको नाम लिन्छन्। यो पूर्ण रूपमा दिखावा र छलावा हो। यस्तो जातिवादी सोच भएका दलहरूबाट जनता सचेत रहनुपर्छ।”
त्यसैगरी, उनले हालको भाजपा सरकारप्रति आभार प्रकट गर्दै भनिन्, “भाजपाले महापुरुषहरूको स्मारकको संरक्षण र मर्मतमा खर्च गरेको छ। र्याली स्थलको मर्मत पनि सरकारले गराएको छ, जसका लागि हामी उत्तर प्रदेश सरकारप्रति धन्यवाद दिन्छौं।”
र्यालीमा आएको भीडप्रति खुशी व्यक्त गर्दै मायावतीले भनिन्, “यो भीडले रेकर्ड तोडिदिएको छ। ठूलो संख्यामा कार्यकर्ता लखनऊ पुगेका छन्। र्यालीमा पंजाब, हरियाणा, महाराष्ट्र र उत्तराखण्डबाट आएका समर्थक पनि सहभागी छन्। यी सबै स्वयं आए, कसैलाई भाडामा ल्याइएको होइन।”
उनले भनिन्, “बसपाको पुनः सत्ता प्राप्ति नै अनुसूचित जाति, अनुसूचित जनजाति, पछौटे वर्ग र न्यून आय भएका जनताको हितको एक मात्र बाटो हो।”
————-
हिन्दुस्थान समाचार / भवानी थामी
