मेलबर्न, 8 ऑगस्ट (हिं.स.)। माजी ऑस्ट्रेलियन मुख्य प्रशिक्षक टिम नील्सन यांची ऑस्ट्रेलिया अंडर-19 संघाच्या नव्या प्रशिक्षकपदी नियुक्ती करण्यात आली आहे. ते भारत अंडर-19 संघाविरुद्ध होणाऱ्या घरच्या मालिकेतून आपल्या नव्या भूमिकेची सुरुवात करतील. येणाऱ्या अंडर-19 विश्वचषकाच्या तयारीसाठी ही मालिका अत्यंत महत्त्वाची मानली जात आहे.
भारताविरुद्ध मालिकेसाठी ऑस्ट्रेलिया अंडर-19 संघ जाहीर –
क्रिकेट ऑस्ट्रेलियाने भारताविरुद्धच्या मालिकेसाठी 15 सदस्यीय ऑस्ट्रेलिया अंडर-19 संघाची घोषणा केली आहे. ही मालिका सप्टेंबरमध्ये ब्रिस्बेन आणि मॅके येथे खेळली जाईल. यात तीन 50 षटकांचे सामने आणि दोन चार-दिवसीय युवा कसोटी सामने असतील.
• वनडे सामने : 21, 24 आणि 26 सप्टेंबर – ब्रिस्बेनच्या इयान हीली ओव्हल मैदानावर
• पहिली युवा कसोटी : 30 सप्टेंबरपासून ब्रिस्बेनमध्ये
• दुसरी युवा कसोटी : 7 ऑक्टोबरपासून मॅके येथे
ऑलराउंडर ऑलिव्हर पीक संघाबाहेर –
संघात ऑलिव्हर पीक यांचा समावेश केलेला नाही, कारण त्याच काळात ते ऑस्ट्रेलिया ए संघासोबत भारत दौऱ्यावर असतील. पीक यांनी गेल्या वर्षी भारतात झालेल्या युवा कसोटीत शतक ठोकले होते आणि अलीकडेच ऑस्ट्रेलिया ए कडून श्रीलंका ए विरुद्ध 92 धावांची खेळी करत निवडकर्त्यांचे लक्ष वेधले होते. ते पुढील वर्षी होणाऱ्या अंडर-19 विश्वचषकासाठी पात्र असले तरी त्यांच्या व्यस्त घरगुती हंगामामुळे आणि मेलबर्न रेनेगेड्सकडून मिळालेल्या बीबीएल करारामुळे त्यांचा संघातील सहभाग अनिश्चित आहे.
टिम नील्सनचे पुन्हा प्रशिक्षकपदावर पुनरागमन –
57 वर्षीय टिम नील्सन यांनी 2007 ते 2011 दरम्यान ऑस्ट्रेलिया वरिष्ठ संघाचे प्रशिक्षकपद भूषवले होते. त्याआधी ते जॉन बुकॅनन यांचे सहाय्यक प्रशिक्षक होते. त्यांनी क्रिकेट ऑस्ट्रेलियाच्या सेंटर ऑफ एक्सलन्समध्येही प्रशिक्षण दिले आहे. 2024 मध्ये ते पाकिस्तान टेस्ट संघाचे हाय परफॉर्मन्स प्रशिक्षक म्हणूनही कार्यरत होते. आता ते पुन्हा एकदा क्रिकेट ऑस्ट्रेलियाच्या डेव्हलपमेंट भूमिकेत परतले असून लॉकलन स्टीव्हन्स यांच्या राजीनाम्यानंतर त्यांनी ही जबाबदारी स्वीकारली आहे.
क्रिकेट ऑस्ट्रेलियाच्या हेड ऑफ नॅशनल डेव्हलपमेंट सोन्या थॉम्पसन म्हणाल्या, या बहुप्रारूप मालिकेतून खेळाडूंना आंतरराष्ट्रीय क्रिकेटचा अनुभव आणि त्यांच्या कौशल्यांना नवी कसोटी मिळेल, यासाठी आम्ही उत्सुक आहोत. अंडर-19 विश्वचषकाच्या आमच्या तयारीत ही मालिका महत्त्वाचा टप्पा आहे.
त्या पुढे म्हणाल्या, टिम नील्सन यांच्या अनुभवाचा आमच्या युवा संघाला मोठा फायदा होईल आणि त्यांचे नेतृत्व पुढील पिढीतील खेळाडूंना दिशा देईल.
ऑस्ट्रेलिया अंडर-19 संघ (भारताविरुद्ध मालिकेसाठी):
सायमन बज, अॅलेक्स टर्नर, स्टीव्ह होगन, विल मलाझचुक, यश देशमुख, टॉम होगन, आर्यन शर्मा, जॉन जेम्स, हेडन शिलर, चार्ल्स लॅकमुंड, बेन गॉर्डन, विल बायरम, केसी बार्टन, अॅलेक्स ली यंग, जेडन ड्रेपर.
रिजर्व खेळाडू: जेड होलिक, टॉम पॅडिंग्टन, जूलियन ऑस्बॉर्न.
—————
हिंदुस्थान समाचार / हर्षदा गावकर
