मुंबई, 31 जानेवारी, (हिं.स.)। अभिनेत्री राणी मुखर्जी हिच्या बहुप्रतिक्षित ‘मर्दानी 3’ चित्रपटाने अखेर सिनेमागृहांत प्रवेश केला आहे. बॉक्स ऑफिसवर आधीपासूनच मजबूत पकड असलेल्या बॉर्डर – २ या चित्रपटाकडून ‘मर्दानी 3’ला टक्कर मिळत आहे. मर्यादित स्क्रीन्स आणि मोठ्या प्रतिस्पर्धेमध्येही चित्रपटाने पहिल्याच दिवशी समाधानकारक सुरुवात केली आहे. राणी मुखर्जीच्या दमदार भूमिकेबाबत प्रेक्षकांमध्ये उत्सुकता स्पष्टपणे दिसून येत आहे.
ट्रेड रिपोर्ट्सनुसार, ‘मर्दानी 3’ने ओपनिंग डे ला सुमारे ३.८० कोटी रुपये इतकी कमाई केली आहे. विशेष म्हणजे ही कमाई ‘मर्दानी 2’च्या पहिल्या दिवसाच्या कलेक्शनइतकीच असून, 2014 मध्ये प्रदर्शित झालेल्या ‘मर्दानी’च्या (३.४६ कोटी) ओपनिंग डे कलेक्शनला मागे टाकणारी आहे. यामुळेच ‘मर्दानी 3’ राणी मुखर्जीच्या करिअरमधील सर्वाधिक ओपनिंग घेणाऱ्या चित्रपटांच्या टॉप यादीत स्थान मिळवण्यात यशस्वी ठरली आहे.
यशराज फिल्म्स च्या बॅनरखाली तयार झालेल्या या फ्रँचायझीची ओळख नेहमीच सामाजिक विषयांवर आधारित सशक्त कथानकांमुळे राहिली आहे. पहिल्या भागात मानवी तस्करी, दुसऱ्या भागात एका धोकादायक गुन्हेगाराची मानसिकता, तर तिसऱ्या भागात समाजातील आणखी एका कडव्या वास्तवावर प्रकाश टाकण्याचा प्रयत्न करण्यात आला आहे. त्यामुळे चित्रपटाबाबत प्रेक्षकांसह समीक्षकांमध्येही जोरदार चर्चा रंगताना दिसत आहे.
दरम्यान, दुसरीकडे सनी देवोल स्टारर ‘बॉर्डर 2’ बॉक्स ऑफिसवर आपली घोडदौड कायम ठेवून आहे. आठव्या दिवशीही दोन अंकी कमाई करत या चित्रपटाने भारतात २५७ कोटी रुपयांचा टप्पा पार केला आहे. अशा परिस्थितीत येत्या दिवसांत ‘मर्दानी 3’ ही या तीव्र स्पर्धेत किती लांब पल्ला गाठते, याकडे सर्वांचे लक्ष लागून राहिले आहे.
—————
हिंदुस्थान समाचार / हर्षदा गावकर
