लातूर, 26 फेब्रुवारी, (हिं.स.)। जिल्ह्यात गुन्हेगारीवर प्रभावी आळा घालण्यासाठी पोलीस प्रशासन सातत्याने सतर्क असून प्रत्येक गुन्ह्यात तात्काळ कारवाई करण्यावर विशेष भर दिला जात आहे. त्याच अनुषंगाने देवणी पोलीस ठाणे येथील पोलिसांनी अल्पवयीन मुलीस फूस लावून पळवून नेणाऱ्या तिघा आरोपींना अवघ्या एका तासाच्या आत ताब्यात घेऊन उल्लेखनीय कामगिरी केली आहे.
दिनांक २५ फेब्रुवारी २०२६ रोजी फिर्यादीने दिलेल्या तक्रारीवरून देवणी पोलीस ठाण्यात गुरनं. ४४/२०२६ अन्वये कलम १३७(२), ३(५) भारतीय न्याय संहिता अंतर्गत गुन्हा दाखल करण्यात आला. अल्पवयीन मुलीस फूस लावून पळवून नेल्याची माहिती मिळताच वरिष्ठांच्या मार्गदर्शनाखाली तात्काळ तपास पथक नियुक्त करण्यात आले.
पोलीस अधीक्षक अमोल तांबे यांच्या मार्गदर्शनाखाली तसेच अपर पोलीस अधीक्षक मंगेश चव्हाण व उपविभागीय पोलीस अधिकारी विशाल ढुमे यांच्या सूचनांनुसार आरोपींचा शोध घेण्यासाठी जलद गतीने तपास सुरू करण्यात आला. तपासादरम्यान गुप्त माहितीच्या आधारे खालील आरोपींची नावे निष्पन्न झाली :
1. कलीम हाकानी शेख (वय २० वर्षे)
2. अशपाक करीम शेख (वय २० वर्षे)
3. बिलाल खालेद कुरेशी (वय २५ वर्षे)
सर्व रा. उदगीर, ता. उदगीर
सदर आरोपींनी पीडित अल्पवयीन मुलीस त्यांच्या ताब्यातील स्काय ब्ल्यू रंगाच्या इटॉस चारचाकी वाहनातून छत्रपती संभाजीनगर दिशेने नेल्याची माहिती मिळाली. त्यानुसार तात्काळ बीड, छत्रपती संभाजीनगर तसेच महामार्ग पोलीस यंत्रणांशी संपर्क साधण्यात आला. बीड–छत्रपती संभाजीनगर महामार्गावरील पाचोड टोलनाका येथे नाकाबंदी करण्याबाबत संबंधित अधिकाऱ्यांना सूचित करण्यात आले.
दरम्यान महामार्ग सुरक्षा पथक, बीड येथील सहाय्यक पोलीस निरीक्षक मुंढे यांनी संपर्क साधून आरोपी व पीडित मुलगी यांना गेवराई येथे ताब्यात घेतल्याची माहिती दिली.
यानंतर देवणी पोलीस ठाण्याचे तपासी अधिकारी पोउपनि व-हाडे, सफौ सय्यद व महिला पोलीस अंमलदार गोपे यांना तात्काळ गेवराई येथे पाठविण्यात आले. त्यांनी आरोपी, त्यांचे वाहन व पीडित मुलगी यांना ताब्यात घेऊन पुढील कायदेशीर कारवाईसाठी देवणी येथे आणले.
ही संपूर्ण कारवाई देवणी पोलीस ठाण्याचे सपोनि बी. एस. गायकवाड, पोउपनि व-हाडे, सफौ सय्यद व महिला पोलीस अंमलदार गोपे यांनी वरिष्ठांच्या मार्गदर्शनाखाली समन्वयाने पार पाडली. गुन्ह्याचा पुढील तपास पोउपनि व-हाडे करीत आहेत..
—————
हिंदुस्थान समाचार / Mahesh Madanrao Chitnis
