જયપુર, નવી દિલ્હી, 16 નવેમ્બર (હિ.સ.) રાજસ્થાન કોંગ્રેસનું ચિત્ર આજે બદલાયું હતું. ગુરુવારે પૂર્વ રાષ્ટ્રીય અધ્યક્ષ અને વાયનાડ સાંસદ રાહુલ ગાંધીની ચૂંટણી રેલીઓ પહેલા પાર્ટીના ટોચના નેતાઓમાં એકતા જોવા મળી હતી. જ્યારે જયપુર એરપોર્ટ પર મુખ્યમંત્રી અશોક ગેહલોત અને પૂર્વ નાયબ મુખ્યમંત્રી સચિન પાયલટ બંને સાથે જોવા મળ્યા, ત્યારે રાહુલ ગાંધીએ સ્પષ્ટ કર્યું કે, તેઓ માત્ર સાથે જ જોવા મળતા નથી, તેઓ સાથે છે અને સાથે જ રહેશે. કોંગ્રેસ પક્ષ અહીં સફાયો કરીને ચૂંટણી જીતશે.
રાજસ્થાનમાં ગુરુવારે પૂર્વ રાષ્ટ્રીય અધ્યક્ષ રાહુલ ગાંધી તારાનગર (ચુરુ), નોહર (હનુમાનગઢ) અને સાદુલશહર (શ્રીગંગાનગર)માં ત્રણ જાહેરસભાઓને સંબોધિત કરશે. જયપુર એરપોર્ટ પર તેમનું સ્વાગત કરવા માટે મુખ્યમંત્રી અશોક ગેહલોત, પૂર્વ નાયબ મુખ્યમંત્રી સચિન પાયલટ અને પ્રદેશ અધ્યક્ષ ગોવિંદ સિંહ ડોટાસરા સાથે જોવા મળ્યા હતા. ત્રણેય નેતાઓ દ્વારા રાહુલનું ઉષ્માભર્યું સ્વાગત કરવામાં આવ્યું હતું, તો રાહુલે ત્રણેય નેતાઓને પણ ખૂબ જ ઉત્સાહ સાથે મળ્યા હતા. લાંબા સમય પછી કોંગ્રેસની એકતાની આ તસવીર જોઈને પત્રકારોએ રાહુલને સવાલ કર્યો. તેમણે કહ્યું કે, રાજસ્થાનમાં કોંગ્રેસના નેતાઓ માત્ર એક સાથે જોવા મળતા નથી, તેઓ સાથે છે અને સાથે રહેશે. કોંગ્રેસ પક્ષ અહીં સફાયો કરીને ચૂંટણી જીતશે.
રાહુલ ગાંધી રાજસ્થાનમાં ત્રણ-ચાર દિવસ સતત જનસભાને સંબોધશે. તેઓ 16, 17, 19 અને 22 નવેમ્બરે રાજસ્થાનમાં વિવિધ સ્થળોએ જાહેર સભાઓ અને રોડ શો કરશે. રાજધાની જયપુરમાં 19મી નવેમ્બરે રોડ શોનું પણ પ્રસ્તાવ છે. આ સિવાય બાડમેર, પિલાની, ઉદયપુર શહેર, મુંડાવર અને અલવર ગ્રામીણમાં પણ જાહેર સભાઓ પ્રસ્તાવિત છે.
હિન્દુસ્થાન સમાચાર/સંદીપ/સુનીત / ડો. હિતેશ
