ল’জান, ২৩ অক্টোবৰ (হি. স.)। আন্তঃৰাষ্ট্ৰীয় অলিম্পিক কমিটী (আই অ’ চি)য়ে বুধবাৰে ইণ্ডোনেছিয়াক ভৎৰ্সনা কৰি কয় যে ইজৰাইলী খেলুৱৈসকলক ভিছা প্ৰদান নকৰাৰ বাবে ইণ্ডোনেছিয়াক আৰু ভৱিষ্যতে অলিম্পিক গেমছ বা আনুষংগিক অনুষ্ঠান আয়োজনৰ বাবে বিবেচনা কৰা নহ’ব।
আচলতে ইজৰাইলী খেলুৱৈসকলক জাকাৰ্টাত চলি থকা বিশ্ব কলা জিমনাষ্টিক চেম্পিয়নশ্বিপত (১৯-২৫ অক্টোবৰ) অংশগ্ৰহণৰ বাবে ভিছাৰ পৰা বঞ্চিত কৰা হৈছিল। ইজৰাইল জিমনাষ্টিক ফেডাৰেচনে ক’ৰ্ট অৱ আৰ্বিট্ৰেচন ফৰ স্প’ৰ্টছ (চিএএছ)ৰ ওচৰত আবেদন জনায় যদিও চিএএছে এই আবেদন নাকচ কৰি ইজৰাইলী খেলুৱৈসকলে অংশগ্ৰহণ কৰাত বাধা দিয়ে।
আই অ’ চিৰ কাৰ্যবাহী ব’ৰ্ডে কয় যে, “সকলো যোগ্য খেলুৱৈ, দল, আৰু ক্ৰীড়া বিষয়াই যাতে বৈষম্যহীনভাৱে আন্তঃৰাষ্ট্ৰীয় ক্ৰীড়া প্ৰতিযোগিতাত অংশগ্ৰহণ কৰিব পাৰে, সেয়া নিশ্চিত কৰাটো আয়োজক দেশখনৰ দায়িত্ব।”
এক আনুষ্ঠানিক বিবৃতিত আই অ’ চিয়ে ভৱিষ্যতে এনে ঘটনাৰ পৰা হাত সাৰিবলৈ এক বৃহৎ পদক্ষেপ গ্ৰহণ কৰি ঘোষণা কৰে যে “অলিম্পিক গেমছ, যুৱ অলিম্পিক, বা ভৱিষ্যতে কোনো অলিম্পিক অনুষ্ঠান বা সন্মিলন আয়োজনৰ সন্দৰ্ভত ইণ্ডোনেছিয়াৰ ৰাষ্ট্ৰীয় অলিম্পিক কমিটীৰ সৈতে কোনো আলোচনা নহ’ব যদিহে ইণ্ডোনেছিয়া চৰকাৰে নিশ্চিত নকৰে যে সকলো দেশৰ খেলুৱৈ আৰু বিষয়াক প্ৰৱেশৰ অনুমতি দিব।”
চৰকাৰে প্ৰয়োজনীয় নিশ্চয়তা প্ৰদান নকৰালৈকে সকলো আন্তঃৰাষ্ট্ৰীয় ক্ৰীড়া ফেডাৰেচনে ইণ্ডোনেছিয়াত কোনো ধৰণৰ ক্ৰীড়া অনুষ্ঠান বা বৈঠক আয়োজন কৰাৰ পৰা বিৰত থাকিবলৈও পৰামৰ্শ দিয়ে।
ইণ্ডোনেছিয়াৰ এন অ’ চি আৰু আন্তঃৰাষ্ট্ৰীয় জিমনাষ্টিক ফেডাৰেচনকো ল’জানত থকা মুখ্য কাৰ্যালয়লৈ মাতি আনি এই বিষয়ে চৰ্চা কৰিছে।
ইজৰাইলৰ সৈতে জড়িত অনুষ্ঠানসমূহত পূৰ্বৰ প্ৰতিবাদ
ইণ্ডোনেছিয়া চৰকাৰে পেলেষ্টাইনৰ সমৰ্থনত ইজৰাইলী জিমনাষ্টক ভিছা প্ৰদানৰ পৰা বঞ্চিত কৰা বুলি উল্লেখ কৰিছে।
২০২৩ চনৰ জুলাই মাহত ইজৰাইলৰ অংশগ্ৰহণক লৈ বিতৰ্কৰ বাবে ইণ্ডোনেছিয়াই বিশ্ব বিচ গেমছ আয়োজনৰ পৰা আঁতৰি যায়।
২০২৩ চনৰ মাৰ্চ মাহত দুজন প্ৰাদেশিক গৱৰ্ণৰৰ প্ৰতিবাদৰ পিছত ইণ্ডোনেছিয়াইৰ পৰা ফিফা ২০ বছৰ অনুৰ্ধ বিশ্বকাপৰ আয়োজনৰ অধিকাৰ কাঢ়ি লোৱা হৈছিল।
এই দুয়োটা কাণ্ড গাজাত ইজৰাইল আৰু হামাছৰ মাজত যুদ্ধ আৰম্ভ হোৱাৰ আগতেই সংঘটিত হৈছিল। বৰ্তমান তাত যুদ্ধবিৰতিৰ ব্যৱস্থা কৰা হৈছে।
हिन्दुस्थान समाचार / অৰৱিন্দ
