চণ্ডীগড়, ১৬ নৱেম্বৰ (হি.স.)। পঞ্জাৱৰ ফিৰোজপুৰত অজ্ঞাত মুখা পিন্ধা আক্ৰমণকাৰীয়ে ৰাষ্ট্ৰীয় স্বয়ংসেৱক সংঘ (আৰ এছ এছ)ৰ এজন কৰ্মীক গুলীয়াই হত্যা কৰে । শনিবাৰে গভীৰ নিশা আৰ এছ এছৰ কৰ্মী নবীন অৰোৰা নিজৰ দোকানৰ পৰা ঘৰলৈ উভতি অহাৰ সময়তে সংঘটিত হয় এই ঘটনা। সংকটজনক অৱস্থাত তেওঁক চিকিৎসালয়লৈ প্ৰেৰণ কৰা হয় যদিও বচাব পৰা নগ’ল।
পঞ্জাৱৰ সীমান্ত অঞ্চলত দশক দশক ধৰি আৰ এছ এছৰ সৈতে জড়িত বলদেৱ ৰাজ অৰোৰাৰ পুত্ৰ নবীন অৰোৰাৰ ফিৰোজপুৰৰ মূল বজাৰত এখন গেলামালৰ দোকান আছিল। সচৰাচৰৰ দৰে শনিবাৰে নিশা দোকান বন্ধ কৰি ঘৰলৈ উভতি আহোঁতে অচিনাকি যুৱকে তেওঁক এম্বুছ কৰি গুলীয়াই হত্যা কৰে। গুলীটোৱে নবীনৰ মূৰত খুন্দা মাৰিলে। দৰ্শকে তেওঁক ততাতৈয়াকৈ ফিৰোজপুৰৰ এখন ব্যক্তিগত চিকিৎসালয়লৈ লৈ যায় যদিও চিকিৎসাৰ সময়ত তেওঁৰ মৃত্যু হয়।
ঘটনা সন্দৰ্ভত তথ্য লাভ কৰাৰ লগে লগে আৰক্ষীয়ে ঘটনাস্থলীত উপস্থিত হৈ ব্যৱস্থা গ্ৰহণ কৰে। আজি পুৱা এছ এছ পি ভূপেন্দ্ৰ সিং আৰু বিধায়ক ৰণবীৰ সিঙেও ঘটনাস্থলীত উপস্থিত হৈ মৃতকৰ পৰিয়ালৰ সৈতে বাৰ্তালাপ কৰে। আৰক্ষীয়ে সমগ্ৰ অঞ্চলটোৰ চিচিটিভিৰ ফুটেজ জব্দ কৰি আক্ৰমণকাৰীক চিনাক্ত কৰি থকা বুলি উল্লেখ কৰে এছএছপিয়ে। শীঘ্ৰে গ্ৰেপ্তাৰ হ’ব অভিযুক্তক। প্ৰাথমিক তদন্তই ইংগিত দিয়ে যে এই গোচৰটো অৰাজকতাক উচটনি দিয়াৰ প্ৰয়াস যেন লাগে। আক্ৰমণকাৰীক গ্ৰেপ্তাৰ কৰিবলৈ একাধিক আৰক্ষীৰ দলে কাম কৰি আছে।
মৃত যুৱকজন নবীন অৰোৰাৰ দাদা প্ৰয়াত দিননাথ অৰোৰা আছিল পঞ্জাৱৰ অন্যতম বিশিষ্ট আৰ এছ এছ কৰ্মী। স্বাধীনতাৰ সময়ত তেওঁ পঞ্জাৱৰ সীমান্ত জিলাসমূহত শখাৰ অভিযান আৰম্ভ কৰিছিল।
हिन्दुस्थान समाचार / অৰৱিন্দ
