– গ্ৰীণ ক্ৰেডিট ইনিচিয়েটিভৰ পদক্ষেপৰ আহ্বান প্ৰধানমন্ত্ৰী মোদীৰ
– ২০২৮ চনত ভাৰতত ক’প-৩৩ আয়োজন কৰাৰ প্ৰস্তাৱ
নতুন দিল্লী, ০১ ডিছেম্বৰ (হি.স.)। শুকুৰবাৰে ডুবাইত অনুষ্ঠিত ক’প-২৮ বিশ্ব জলবায়ু কাৰ্যকৰী শীৰ্ষ সন্মিলন (ৱৰ্ল্ড ক্লাইমেট একচন ছামিট)ত প্ৰধানমন্ত্ৰী নৰেন্দ্ৰ মোদীয়ে কয় যে ভাৰতে পৰিৱেশ আৰু অৰ্থনীতিৰ মাজত ভাৰসাম্যৰ নিদৰ্শন দাঙি ধৰিছে। বিশ্বৰ জনসংখ্যাৰ ১৭ শতাংশ ভাৰতৰ। ইয়াৰ পিছতো বিশ্বৰ কাৰ্বন নিৰ্গমনত ভাৰতৰ অৱদান ৪ শতাংশতকৈও কম।
প্ৰধানমন্ত্ৰীয়ে কয় যে এনডিচিৰ লক্ষ্য পূৰণৰ পথত থকা বিশ্বৰ কেইখনমান অৰ্থনীতিৰ ভিতৰত ভাৰত অন্যতম। মোদীয়ে বিশ্বব্যাপী মঞ্চৰ পৰা ‘গ্ৰীণ ক্ৰেডিট ইনিচিয়েটিভ’ নামৰ গ্ৰহ সমৰ্থক, সক্ৰিয় আৰু ইতিবাচক পদক্ষেপৰ আহ্বান জনায়। ইয়াৰ লগতে তেওঁ ২০২৮ চনত ভাৰতত ক’প-৩৩ আয়োজন কৰাৰ প্ৰস্তাৱ আগবঢ়ায়।
প্ৰধানমন্ত্ৰীয়ে ১৪০ কোটি ভাৰতীয়ৰ হৈ শুভেচ্ছা জনাই ভাষণৰ আৰম্ভণি কৰে। তেওঁ জলবায়ু ন্যায়, জলবায়ু বিত্ত আৰু সেউজ ঋণৰ দৰে বিষয়সমূহৰ প্ৰতি অবিৰত সমৰ্থনৰ বাবে চি অ’ পিৰ নেতাসকলক কৃতজ্ঞতা প্ৰকাশ কৰে। তেওঁ কয়, “আমাৰ সকলোৰে প্ৰচেষ্টাই বিশ্ব কল্যাণৰ বাবে সকলোৰে স্বাৰ্থৰ সুৰক্ষা আৰু সকলোৰে অংশগ্ৰহণ প্ৰয়োজনীয় বুলি বিশ্বাস বৃদ্ধি কৰিছে।”
প্ৰধানমন্ত্ৰীয়ে কয় যে পৰিৱেশ আৰু অৰ্থনীতিৰ মাজত এক নিখুঁত ভাৰসাম্য ৰক্ষা কৰি ভাৰতে বিশ্বৰ আগত উন্নয়নৰ আৰ্হি দাঙি ধৰিছে। ভাৰতত বিশ্বৰ ১৭ শতাংশ জনসংখ্যা থকাৰ পাছতো বিশ্বৰ কাৰ্বন নিৰ্গমনত আমাৰ অংশ ৪ শতাংশতকৈও কম। এনডিচিৰ লক্ষ্য পূৰণৰ পথত আগবাঢ়িছে বিশ্বৰ কেইখনমান অৰ্থনীতিৰ ভিতৰত ভাৰত অন্যতম। ইতিমধ্যে আমি ১১ বছৰ পূৰ্বে নিৰ্গমনৰ তীব্ৰতাৰ লক্ষ্যত উপনীত হ’লোঁ। অজীৱাশ্ম ইন্ধনৰ লক্ষ্যও নিৰ্ধাৰিত সময়ৰ আগতেই পূৰণ কৰা হৈছে।
মোদীয়ে কয় যে ভাৰতে ২০৩০ চনৰ ভিতৰত নিজৰ জিডিপিৰ নিৰ্গমনৰ তীব্ৰতা ৪৫ শতাংশ হ্ৰাস কৰাৰ লক্ষ্য লৈছে। আমি অজীৱাশ্ম ইন্ধনৰ অংশ ৫০ শতাংশলৈ বৃদ্ধি কৰাৰ সিদ্ধান্ত লৈছো। ভাৰতে ২০৭০ চনৰ ভিতৰত ‘নিকা শূন্য নিৰ্গমন’ৰ দিশত আগবাঢ়ি যোৱাৰ সিদ্ধান্ত লৈছে। জি-২০ৰ সভাপতিত্বৰ সময়ছোৱাত ভাৰতে বহনক্ষম উন্নয়নৰ ওপৰত ব্যাপক গুৰুত্ব আৰোপ কৰিছিল। বিকল্প ইন্ধনৰ বাবে ভাৰতে হাইড্ৰজেনক ইন্ধন হিচাপে ব্যৱহাৰৰ প্ৰচাৰ কৰি গোলকীয় জৈৱ ইন্ধন মৰ্চা (গ্ল’বেল বায়’ফুৱেলছ এলায়েন্স) আৰম্ভ কৰিছে।
প্ৰধানমন্ত্ৰীয়ে কয়, ‘গ্লাছগোত মই আপোনালোক সকলোৰে সন্মুখত মিছন লাইফ (পৰিৱেশৰ বাবে জীৱনশৈলী)ৰ দৃষ্টিভংগী দাঙি ধৰিছিলোঁ। আন্তঃৰাষ্ট্ৰীয় শক্তি সংস্থাৰ এক অধ্যয়নত কোৱা হৈছে যে লাইফ মিছনৰ জৰিয়তে আমি ২০৩০ চনৰ ভিতৰত প্ৰতি বছৰে ২ বিলিয়ন টন কাৰ্বন নিৰ্গমন হ্ৰাস কৰিব পাৰো। আজি এই মঞ্চৰ পৰা মই আন এটা গ্ৰহ সমৰ্থক, সক্ৰিয় আৰু ইতিবাচক পদক্ষেপ ‘গ্ৰীণ ক্ৰেডিট ইনিচিয়েটিভ’ৰ আহ্বান জনাইছো। কাৰ্বন ক্ৰেডিটৰ বাণিজ্যিক মানসিকতাৰ বাহিৰলৈ গৈ জনসাধাৰণৰ অংশগ্ৰহণেৰে কাৰ্বন ছিঙ্ক সৃষ্টিৰ বাবে এই অভিযান।
প্ৰধানমন্ত্ৰীয়ে কয় যে জলবায়ু পৰিৱৰ্তন প্ৰক্ৰিয়াৰ বাবে ভাৰত এক যৌথ কাঠামোৰ প্ৰতি দায়বদ্ধ। গতিকে আজি এই মঞ্চৰ পৰা ২০২৮ চনত ভাৰতত ক’প-৩৩ সন্মিলন আয়োজন কৰাৰ প্ৰস্তাৱো আগবঢ়াইছো। মোদীয়ে কয় যে বিগত শতিকাবোৰৰ ভুলবোৰ শুধৰাবলৈ আমাৰ হাতত বিশেষ সময় বাকী নাই। প্ৰাকৃতিক সম্পদৰ নিৰ্বিচাৰ ব্যৱহাৰ আৰু শোষণৰ পৰিণতি সকলোৱে ভোগ কৰিবলগীয়া হৈছে, বিশেষকৈ গ্ল’বেল চাউথৰ বাসিন্দাসকলে।
হিন্দুস্থান সমাচাৰ/সুশীল/মনোজ/অৰবিন্দ
