পেৰিছ, ১০ ছেপ্টেম্বৰ (হি.স.)। নেপালৰ পিছত এতিয়া ফ্ৰান্সতো চৰকাৰ বিৰোধী প্ৰতিবাদ আৰম্ভ হৈছে। বুধবাৰে দেশৰ প্ৰায় প্ৰতিখন ডাঙৰ চহৰতে বাজেট কৰ্তনৰ বিৰুদ্ধে ৰাজপথলৈ ওলাই আহি ৰাষ্ট্ৰপতি ইমানুৱেল মেক্ৰনৰ পদত্যাগৰ দাবী জনায়। প্ৰতিবাদকাৰীসকলে পথ অৱৰোধ কৰি জাবৰৰ দমত জুই লগাই বহু ঠাইত আৰক্ষীৰ সৈতে সংঘৰ্ষত লিপ্ত হয়। এই প্ৰতিবাদৰ মাজতে চেবাষ্টিয়ান লেকৰ্ণুৱেও প্ৰধানমন্ত্ৰী হিচাপে শপত গ্ৰহণ কৰে। মাত্ৰ দুদিন পূৰ্বে ৰাষ্ট্ৰপতি মেক্ৰনে লেকৰ্ণুক নতুন প্ৰধানমন্ত্ৰী হিচাপে ঘোষণা কৰিছিল।
গৃহমন্ত্ৰী বি ৰাটেলোৱে সংবাদ মাধ্যমৰ আগত কয় যে ৰেনেছ চহৰত প্ৰতিবাদকাৰীয়ে এখন বাছত জুই লগাই দিয়ে। দক্ষিণ-পশ্চিম অঞ্চলত এটা বিদ্যুৎ পৰিবাহী তাঁৰ ক্ষতিগ্ৰস্ত হোৱাৰ পিছতে ৰে’ল সেৱা বন্ধ হৈ পৰে। তেওঁ কয় যে চৰকাৰে ৮০ হাজাৰ আৰক্ষী নিয়োগ কৰিছে, ইয়াৰে ৬০০০জন পেৰিছত আছে। সমগ্ৰ দেশতে এই পৰ্যন্ত ২০০ৰো অধিক দুষ্কৃতিকাৰীক গ্ৰেপ্তাৰ কৰা হৈছে। নন্টেছ চহৰত আৰক্ষীয়ে প্ৰতিবাদকাৰীৰ ওপৰত কন্দুৱা গেছৰ গুলীচালনা কৰে। মণ্টপেলিয়াৰত আৰক্ষী আৰু প্ৰতিবাদকাৰীৰ মাজতো সংঘৰ্ষ সংঘটিত হয়। টুলুজত ৰে’লপথ ভাঙি পেলোৱা হয়।
সংবাদ মাধ্যমৰ বাতৰি অনুসৰি এই প্ৰতিবাদৰ নাম দিয়া হৈছে ‘ব্লক এভৰিথিং’ (Block Everything), যাৰ নেতৃত্বত আছে এটা বাওঁপন্থী গোট। অৱশ্যে আন্দোলনৰ কোনো মুখ নাই। কিছু মাহ পূৰ্বে ছ’চিয়েল মিডিয়াত ইয়াৰ ভেটি স্থাপন কৰা হৈছিল। প্ৰধানমন্ত্ৰীৰ পদৰ পৰা পদত্যাগ কৰা ফ্ৰান্সোৱা বায়ৰ’ৰ বাজেট নীতিৰ প্ৰতিবাদত এই প্ৰতিবাদ আৰম্ভ হৈছিল। বায়ৰৌৱে ৰাজহুৱা ব্যয়ত বৃহৎ কৰ্তন কৰিছিল। প্ৰতিবাদকাৰীসকলে কয় যে দেশৰ বৰ্তমানৰ ৰাজনৈতিক ব্যৱস্থা জনসাধাৰণৰ স্বাৰ্থত নহয়।
মাত্ৰ দুদিন পূৰ্বে ফ্ৰান্সোৱাই সংসদত আস্থা ভোট হেৰুৱাইছিল, যাৰ বাবে তেওঁ প্ৰধানমন্ত্ৰীৰ পদ এৰিবলগীয়া হৈছিল। ৫৭৭ জনীয়া ৰাষ্ট্ৰীয় বিধানসভাত অনুষ্ঠিত ভোটদানত ৩৬৪ জন প্ৰতিনিধিয়ে চৰকাৰৰ প্ৰতি অনাস্থা প্ৰকাশ কৰাৰ বিপৰীতে মাত্ৰ ১৯৪ জন প্ৰতিনিধিয়েহে চৰকাৰৰ সপক্ষে ভোটদান কৰে। ইয়াৰ পিছতে মেক্ৰনে লেকৰ্ণুক প্ৰধানমন্ত্ৰী হিচাপে নিযুক্তি দিয়ে, যিয়ে আজি শপত গ্ৰহণ কৰে। লেকৰ্ণু বিগত এবছৰত ফ্ৰান্সৰ চতুৰ্থ প্ৰধানমন্ত্ৰী হিচাপে পৰিগণিত হৈছে। উল্লেখযোগ্য যে ২০২৭ চনত ফ্ৰান্সৰ সংসদৰ কাৰ্যকাল শেষ হ’বলগীয়া আছিল যদিও মেক্ৰনে মধ্যকালীন নিৰ্বাচনৰ কথা ঘোষণা কৰিছিল। ইয়াৰ পিছত অনুষ্ঠিত ৰাষ্ট্ৰীয় বিধানসভাৰ নিৰ্বাচনত কোনো দলে সংখ্যাগৰিষ্ঠতা নাপালে। তেওঁ সংখ্যালঘু চৰকাৰৰ নেতৃত্ব দি আছে।
হিন্দুস্থান সমাচাৰ / মনোজ কুমাৰ শইকীয়া
