গোলাঘাট, ১১ জুলাই (হি.স.): মেৰাপানী ড্ৰাগছ বিৰুদ্ধে যুদ্ধংদেহী ৰূপত অৱতীৰ্ণ হৈছে আৰক্ষী। মেৰাপানী আৰক্ষীয়ে চিআৰপিএফৰ সহযোগত দৈনিক অভিযান চলাই জব্দ কৰিবলৈ সক্ষম হৈছে কিলোৱে কিলোৱে ড্ৰাগছ। বৃহস্পতিবাৰ বিয়লি গোপন তথ্যৰ ভিত্তিত মেৰাপানী টাউনৰ এটা বাসগৃহত অতৰ্কিতে অভিযান চলাই আৰক্ষীৰ দলে জব্দ কৰে বুজন পৰিমাণৰ নিচাযুক্ত কেপচুল।
লুটে গুৰুং নামৰ ড্ৰাগছ ব্যৱসায়ীটোৰ বাসগৃহত চলোৱা অভিযানকালত আৰক্ষীয়ে জব্দ কৰে ৩৫৬৭টা নিষিদ্ধ চিমপেক্স প্লাচ কেপচুল। ইফালে আৰক্ষীৰ আগমনৰ উমান পাই ড্ৰাগছ ব্যৱসায়ী লুটে গুৰুং পলায়ন কৰিবলৈ চেষ্টা চলাইছিল যদিও আৰক্ষীয়ে তৎপৰতাৰে কৰায়ত্ত কৰে।
ড্ৰাগছ বিৰোধী অভিযানটোৰ নেতৃত্ব দিয়ে মেৰাপানী আৰক্ষী থানাৰ ভাৰপ্ৰাপ্ত বিষয়া প্ৰাঞ্জল প্ৰকাশ চক্ৰৱৰ্তী আৰু ১৪২ নং চিআৰপিএফ বাহিনীৰ চেক্টৰ কামাণ্ডাৰ অমিত কুমাৰ গুপ্তাই। ড্ৰাগছৰ ৰম্যভূমিত পৰিণত হোৱা মেৰাপানীত আৰক্ষীৰ এনে তৎপৰতাত সন্তুষ্টি প্ৰকাশ কৰিছে মেৰাপানীবাসীয়ে।
হিন্দুস্থান সমাচাৰ / কিশোৰ মিশ্ৰ
