নতুন দিল্লী, ০৮ ছেপ্টেম্বৰ (হি স)। বিচনা উদ্যোগৰ বাবে বিশেষ কাপোৰ প্ৰস্তুত কৰা কোম্পানী ৰচিত প্ৰিন্টছৰ শ্বেয়াৰ আজি ব্যাপক হ্ৰাসৰ সৈতে শ্বেয়াৰ বজাৰত প্ৰৱেশ কৰি আই পি অ’ বিনিয়োগকাৰীক হতাশ কৰে।
আই পি অ’ৰ অধীনত কোম্পানীটোৰ শ্বেয়াৰৰ মূল্য ১৪৯ টকা ধাৰ্য্য কৰে। আজি বিএছইৰ ক্ষুদ্ৰ আৰু মজলীয়া উদ্যোগত ২০ শতাংশ ৰেহাইত ১১৯.২০ টকাত তালিকাভুক্ত হয়। দুৰ্বল তালিকাৰ পিছত বিক্ৰী আৰম্ভ হোৱাৰ লগে লগে কোম্পানীটোৰ শ্বেয়াৰৰ মূল্য আৰু অধিক হ্ৰাস পায়। প্ৰথম এঘণ্টাৰ ব্যৱসায়ৰ অন্তত পুৱা ১০:১৫ বজাত কোম্পানীটোৰ শ্বেয়াৰ ১১৪ টকাৰ স্তৰত আছিল। এইদৰে কোম্পানীটোৰ আই পি অ’ বিনিয়োগকাৰীসকলে এই পৰ্যন্ত ব্যৱসায়ত ২৩.৪৯ শতাংশ লোকচানৰ সন্মুখীন হৈছে।
ৰচিত প্ৰিন্টছৰ ১৯.৫০ কোটি টকাৰ আই পি অ’ ১ ছেপ্টেম্বৰৰ পৰা ৩ ছেপ্টেম্বৰৰ ভিতৰত চাবস্ক্ৰিপচনৰ বাবে মুকলি আছিল। এই আই পি অ’ই বিনিয়োগকাৰীৰ পৰা গড় সঁহাৰি লাভ কৰিছিল, যাৰ বাবে ইয়াক সামগ্ৰিকভাৱে ১.৯৭ গুণ চাবস্ক্ৰাইব কৰা হৈছিল। ইয়াত যোগ্য প্ৰতিষ্ঠানিক ক্ৰেতা (কিউআইবি)ৰ বাবে সংৰক্ষিত অংশ ১.০১ বাৰ চাবস্ক্ৰাইব কৰা হৈছিল। একেদৰে অপ্ৰতিষ্ঠানিক বিনিয়োগকাৰীৰ বাবে সংৰক্ষিত অংশই (এন আই আই) ১.২৫ গুণ চাবস্ক্ৰিপচন লাভ কৰে। ইয়াৰ উপৰিও খুচুৰা বিনিয়োগকাৰীৰ বাবে সংৰক্ষিত অংশ ২.৭৪ বাৰ চাবস্ক্ৰাইব কৰা হৈছিল। এই আই পি অ’ৰ অধীনত ১০ টকাৰ মুদ্ৰা মূল্যৰ ১৩.০৯ লাখ নতুন শ্বেয়াৰ জাৰি কৰা হৈছে।
আই পি অ’ৰ জৰিয়তে সংগ্ৰহ কৰা ধন কোম্পানীটোৱে উদ্যোগ আৰু যন্ত্ৰপাতি ক্ৰয়, পুৰণি ঋণ হ্ৰাস, কাৰ্য্যকৰী মূলধনৰ প্ৰয়োজনীয়তা পূৰণ আৰু সাধাৰণ কৰ্পৰেট উদ্দেশ্যত ব্যৱহাৰ কৰিব।
কোম্পানীটোৰ আৰ্থিক অৱস্থাৰ কথা ক’বলৈ গ’লে প্ৰস্পেক্টচত কৰা দাবী অনুসৰি ইয়াৰ আৰ্থিক স্বাস্থ্য অহৰহ শক্তিশালী হৈ আহিছে। ২০২২-২৩ বিত্তীয় বৰ্ষত কোম্পানীটোৰ নিকা লাভ ৩২ লাখ টকা, যিটো পৰৱৰ্তী বিত্তীয় বৰ্ষ ২০২৩-২৪ত ২.০৩ কোটি টকালৈ বৃদ্ধি পাই ২০২৪-২৫ চনত ৪.৫৬ কোটি টকালৈ জপিয়াই পৰে। এই সময়ছোৱাত কোম্পানীটোৰ ৰাজহ বছৰি ১২ শতাংশতকৈ অধিক চক্রবৃদ্ধিৰ হাৰত বৃদ্ধি পাই ৪১.৭৮ কোটি টকা হৈছে৷ এই সময়ছোৱাত কোম্পানীটোৰ ঋণৰ উঠা-নমা হৈ থাকিল। ২০২২-২৩ বিত্তীয় বৰ্ষৰ শেষত কোম্পানীটোৰ ঋণ আছিল ১৪.৭৯ কোটি টকা, যিটো ২০২৩-২৪ বিত্তীয় বৰ্ষৰ শেষত ৬.৩৮ কোটি টকালৈ হ্ৰাস পাইছিল। কিন্তু ২০২৪-২৫ বিত্তীয় বৰ্ষৰ শেষত পুনৰবাৰ কোম্পানীটোৰ ঋণ ৯.২৩ কোটি টকালৈ বৃদ্ধি পায়।
हिन्दुस्थान समाचार / অৰৱিন্দ
