মস্কো, ০৮ অক্টোবৰ (হি.স.)। ৰাছিয়াৰ প্ৰতিৰক্ষা মন্ত্ৰালয়ে দাবী কৰিছে যে শেহতীয়াকৈ ইউক্ৰেইনত এক বিশেষ সামৰিক অভিযানৰ সময়ত তেওঁলোকৰ সৈন্যই ডনেস্ক পিপলছ ৰিপাব্লিক আৰু জাপোৰ’ঝেই অঞ্চলৰ দুখন গাঁও মুক্ত কৰিছে। ইফালে, জ্যেষ্ঠ সামৰিক বিষয়াসকলৰ বৈঠকত প্ৰকাশ পাইছে যে এই বছৰ যুদ্ধত ৰাছিয়াই ইউক্ৰেইনৰ ভূখণ্ডৰ বৃহৎ অঞ্চল নিয়ন্ত্ৰণ কৰিছে। তদুপৰি কালি যুদ্ধক্ষেত্ৰত ১৩৫৫ৰো অধিক ইউক্ৰেইনৰ সৈন্য নিহত হয়।
ৰাছিয়াৰ চৰকাৰী সংবাদ সংস্থা টাছ আৰু আৰব নিউজৰ এক প্ৰতিবেদন অনুসৰি মঙলবাৰে প্ৰতিৰক্ষা মন্ত্ৰালয়ে প্ৰকাশ কৰিছে যে ইউক্ৰেইনত বিশেষ সামৰিক অভিযানৰ সময়ত ৰাছিয়াৰ সৈন্যই ডনেটস্ক পিপলছ ৰিপাব্লিক আৰু জাপোৰ’ঝেই অঞ্চলৰ দুখন গাঁও মুক্ত কৰে। মন্ত্ৰালয়ে এক বিবৃতিত কয় যে বেটল গ্ৰুপ চাউথৰ ইউনিটসমূহে সক্ৰিয় অভিযানৰ জৰিয়তে ডনেস্ক পিপলছ ৰিপাব্লিকৰ ফ্যোড’ৰভকাৰ বসতি মুক্ত কৰে আৰু বেটল গ্ৰুপ ইষ্টৰ ইউনিটসমূহে জাপ’ৰ’ঝেই অঞ্চলৰ ন’ভ’ভাচিলেভস্কোয়ে বসতি মুক্ত কৰে।
ৰাষ্ট্ৰপতি ভ্লাদিমিৰ পুটিনে কয় যে এই বছৰ সেনাই ইউক্ৰেইনৰ প্ৰায় ৫ হাজাৰ বৰ্গ কিলোমিটাৰ ভূখণ্ড পুনৰ দখল কৰিছে আৰু যুদ্ধক্ষেত্ৰৰ সম্পূৰ্ণ কৌশলগত নিয়ন্ত্ৰণ বজাই ৰাখিছে। ৰাছিয়াৰ শীৰ্ষ সামৰিক সেনাধ্যক্ষৰ বৈঠকত পুটিনে কয় যে ইউক্ৰেইনৰ বাহিনীয়ে ফ্ৰণ্টৰ সকলো খণ্ডৰ পৰা পিছুৱাই গৈছে। তেওঁ কয় যে কিয়েভে ৰাছিয়াৰ ভূখণ্ডত ব্যাপক আক্ৰমণৰ চেষ্টা চলাইছে যদিও ইয়াৰ দ্বাৰা সাড়ে তিনি বছৰতকৈ অধিক পুৰণি যুদ্ধৰ পৰিস্থিতি সলনি কৰাত সহায় নহ’ব। পুটিনে লগতে কয় যে এই বছৰ তেওঁলোকে প্ৰায় ২১২টা বসতিও মুক্ত কৰিছে।
ৰাছিয়াৰ সশস্ত্ৰ বাহিনীৰ জেনেৰেল ষ্টাফৰ মুৰব্বী জেনেৰেল ভেলেৰী গেৰাচিমোভে শীৰ্ষ বিষয়াসকলৰ বৈঠকত কয় যে ৰাছিয়াৰ সৈন্যই সকলো দিশতে আগবাঢ়িছে। ইফালে ইউক্ৰেইনত সংঘটিত সামৰিক অভিযানৰ সন্দৰ্ভত প্ৰকাশ পোৱা শেহতীয়া তথ্য অনুসৰি বিগত ২৪ ঘণ্টাত ইউক্ৰেইনৰ সেনাই ৰাছিয়াৰ বাহিনীৰ সৈতে হোৱা যুদ্ধত ১৩৫৫ জনতকৈ অধিক জোৱান হেৰুৱাইছে। ইয়াৰ উপৰিও বৃহৎ সংখ্যক ইউক্ৰেইনৰ টেংক, সাজসজ্জিত যুঁজাৰু বাহন, জামিং ষ্টেচন, ৰেজিমেণ্ট, মেকানাইজড ব্ৰিগেড, পদাতিক ব্ৰিগেড, আৰ্টিলাৰী, আঠটা ডিপো, এছাল্ট ব্ৰিগেড, নেচনেল গাৰ্ড ব্ৰিগেড আদি ক্ষতিগ্ৰস্ত হৈছে। ৰাছিয়াৰ সেনাই ইউক্ৰেইনৰ যথেষ্ট ক্ষতিসাধন কৰিছে।
हिन्दुस्थान समाचार / মনোজ কুমাৰ শইকীয়া
