– দক্ষিণ গাজাত বিমান আক্ৰমণত ২৮ জন পেলেষ্টাইনী নিহত
জেৰুজালেম, ২০ ডিছেম্বৰ (হি.স.। ইজৰাইল আৰু হামাছৰ মাজত চলি থকা যুদ্ধৰ মাজতে ইজৰাইল সেনাৰ অনুৰোধত গুগলে লাইভ ট্ৰেফিক ফিচাৰ বন্ধ কৰি দিছে, যাৰ বাবেই গুগল নেভিগেচন এপ ব্যৱহাৰ কৰাত লোকসকলে সমস্যাৰ সন্মুখীন হৈছে। ইজৰাইলত গুগলে বন্ধ কৰি দিছে লাইভ ট্ৰেফিক কণ্ডিচন ফিচাৰ।
ইজৰাইলৰ সৈন্যই কয় যে গুগল মেপৰ দৰে গুগল নেভিগেচন এপৰ জৰিয়তে ইজৰাইলী সেনাৰ গতিবিধি আৰু কাৰ্য্যকলাপ অনুসৰণ কৰিব পাৰি। যুদ্ধবিৰতিৰ দাবীৰ মাজতে গাজাপট্টীত ইজৰাইলৰ আক্ৰমণ অব্যাহত আছে। ইজৰাইলৰ বাহিনীয়ে মঙলবাৰে দক্ষিণ গাজাত বিমান আক্ৰমণ চলাই কমেও ২৮ জন পেলেষ্টাইনী লোকৰ মৃত্যু হয়। ইয়াৰ লগতে উত্তৰ গাজাৰ শেষৰখন কাৰ্যক্ষম চিকিৎসালয়ৰ ভিতৰত এখনো আক্ৰমণ কৰা হয়। আনহাতে, হামাছৰ পক্ষৰ য়েমেনৰ ইৰাণ সমৰ্থিত হাউথী বিদ্ৰোহীয়ে লোহিত সাগৰত আক্ৰমণ অব্যাহত ৰখাৰ প্ৰতিশ্ৰুতি দিছে। ইয়াৰ ফলত আন্তঃৰাষ্ট্ৰীয় বাণিজ্যত অধিক প্ৰভাৱ পৰাৰ সম্ভাৱনা আছে।
ইজৰাইলৰ ৰাষ্ট্ৰপতি আইজাক হাৰ্জগে মঙলবাৰে কয় যে যদি হামাছৰ পণবন্দীসকলক ঘূৰাই অনাৰ বাবে যুদ্ধবিৰতিৰ প্ৰয়োজন হয় তেন্তে আমি তেনে কৰিবলৈ সাজু।
উল্লেখ্য যে ইজৰাইল আৰু হামাছৰ মাজত যুদ্ধবিৰতিৰ বাবে আলোচনা চলি আছে। সোমবাৰে চিআইএৰ মুৰব্বীগৰাকীয়ে ইজৰাইল আৰু কাটাৰৰ বিষয়াৰ সৈতে আলোচনাৰ বাবে ইউৰোপত উপস্থিত হয়। হামাছৰ বিৰুদ্ধে বৃহৎ যুদ্ধ অভিযান হ্ৰাস কৰাৰ বাবে ইজৰাইলৰ সামৰিক নেতাসকলৰ সৈতে আমেৰিকাৰ প্ৰতিৰক্ষা সচিব লয়ডে আলোচনা কৰাৰ সময়তে গাজাত পণবন্দীসকলক মুকলি কৰি দিয়াৰ ক্ষেত্ৰত নতুন যুদ্ধবিৰতি আৰু চুক্তি উত্থাপন কৰা হৈছে।
ইজৰাইলৰ একাংশ মিত্ৰ দেশ ফ্ৰান্স, ব্ৰিটেইন আৰু জাৰ্মানেও যুদ্ধবিৰতিৰ হেঁচা বৃদ্ধি কৰিছে। আনহাতে আমেৰিকাই সাধাৰণ নাগৰিকৰ মৃত্যুক লৈ অহৰহ উদ্বেগ প্ৰকাশ কৰি আছে আৰু ইজৰাইলক উপযুক্ত ব্যৱস্থা ল’বলৈ কৈছে। একে সময়তে ইজৰাইলৰ প্ৰধানমন্ত্ৰী বেঞ্জামিন নেতানিয়াহুৱে কৈছে যে হামাছে বাকী ১২৯ জন পণবন্দীক মুকলি কৰি নিদিয়ালৈকে যুদ্ধ বন্ধ হ’ব নোৱাৰে।
হিন্দুস্থান সমাচাৰ/ অজিত/মনোজ
