নতুন দিল্লী, ০১ ছেপ্টেম্বৰ (হি.স.)। চীনৰ টিয়ানজিনত অনুষ্ঠিত হোৱা চাংহাই সহযোগিতা সংস্থাৰ শীৰ্ষ সন্মিলনৰ সময়ত প্ৰধানমন্ত্ৰী নৰেন্দ্ৰ মোডী, ৰাছিয়াৰ ৰাষ্ট্ৰপতি ভ্লাদিমিৰ পুটিন আৰু চীনৰ ৰাষ্ট্ৰপতি ছি জিনপিঙৰ মাজত অনানুষ্ঠানিক আলোচনা আৰু লঘু হৃদয়ৰ ঠাট্টা-মস্কৰাৰ বহু ছবি ছ’চিয়েল মিডিয়াত শ্বেয়াৰ কৰা হৈছে।
এই ছবিবোৰত তিনিওজন নেতাই আৰামদায়ক পৰিৱেশত কথা পাতি থকা দেখা যায়। সন্মিলনৰ আনুষ্ঠানিক অধিবেশনৰ উপৰিও এই দৃশ্যটোক বিশ্ব আৰু আঞ্চলিক প্ৰত্যাহ্বানৰ মাজত পাৰস্পৰিক বুজাবুজি আৰু আলোচনাক গুৰুত্ব দিয়াৰ ইংগিত হিচাপে বিবেচনা কৰা হৈছে।
এছ চি অ’ শীৰ্ষ সন্মিলনৰ উপৰি মোডী আৰু পুটিনেও দ্বিপাক্ষিক বৈঠক অনুষ্ঠিত কৰে। এই সভাত অংশগ্ৰহণ কৰিবলৈ দুয়োজন নেতা একেখন গাড়ীতে উপস্থিত হৈছিল। এক্সত এখন ছবি শ্বেয়াৰ কৰি মোদীয়ে লিখিছে, ‘এছ চি অ’ শীৰ্ষ সন্মিলন স্থানত চলি থকা কাৰ্য্যসূচীৰ পিছত ৰাষ্ট্ৰপতি পুটিন আৰু মই একেলগে দ্বিপাক্ষিক বৈঠকৰ স্থানলৈ গৈছিলো। তেওঁৰ সৈতে হোৱা কথা-বতৰাবোৰ সদায় জ্ঞানদায়ক।’
কূটনৈতিক মহলত এই ছবিবোৰক ইতিবাচক বাৰ্তা দিয়া বুলি অভিহিত কৰা হৈছে। বিশেষজ্ঞসকলৰ মতে এনে স্বতঃস্ফূৰ্ত কথা-বতৰাবোৰে বহুপক্ষীয় মঞ্চৰ উপযোগিতাৰ ওপৰত আলোকপাত কৰাই নহয়, ইয়াৰ পৰাও বুজা যায় যে মতানৈক্যৰ মাজতো আলোচনা আৰু সহযোগিতাৰ সম্ভাৱনা সদায় থাকে।
চৰকাৰী সূত্ৰৰ মতে, শীৰ্ষ সন্মিলনত আঞ্চলিক নিৰাপত্তা, অৰ্থনৈতিক সহযোগিতা আৰু বিশ্ব উন্নয়নৰ বিষয়সমূহৰ ওপৰত গুৰুতৰ আলোচনাৰ সমান্তৰালভাৱে নেতাসকলৰ মাজত এই অনানুষ্ঠানিক সংযোগেও সহযোগিতাৰ পথত মানৱীয় আৰু ব্যক্তিগত সম্পৰ্কইও গুৰুত্বপূৰ্ণ ভূমিকা গ্ৰহণ কৰাৰ এক গুৰুত্বপূৰ্ণ ইংগিত।
हिन्दुस्थान समाचार / মনোজ কুমাৰ শইকীয়া
