আংকাৰা, । দুটা দশকৰো অধিক সময় তুৰস্কত ক্ষমতাত থকা ৰেচেপ টৈয়প এৰ্দোগানে ভয়ংকৰ বিপৰ্যয়ৰ সন্মুখীন হৈছে। দেওবাৰে সমগ্ৰ দেশত অনুষ্ঠিত মেয়ৰৰ নিৰ্বাচনত তেওঁৰ দল এ কে পি বিপুল পৰাজয়ৰ সন্মুখীন হৈছে। তুৰস্কৰ মূল বিৰোধী দলটোৱে ৰাজধানী আংকাৰা, ইস্তানবুল আৰু ইজমিৰকে ধৰি ৫খন ডাঙৰ চহৰত জয়লাভ কৰিছে।
তুৰস্কৰ ৰাষ্ট্ৰপতি হিচাপে তৃতীয়বাৰৰ বাবে জয়ী হোৱাৰ এবছৰৰ ভিতৰতে বৃহৎ চহৰসমূহৰ মেয়ৰৰ নিৰ্বাচনত এই পৰাজয়ে ৭০ বছৰীয়া এৰ্দোগানৰ শাসনক জোকাৰি গৈছে। আনকি ৰাজনৈতিক বিশ্লেষকসকলেও তেওঁৰ দলৰ এই পৰাজয়ত আচৰিত হৈছে। ৰাষ্ট্ৰপতি নিৰ্বাচনত জয়ী হোৱাৰ পিছত চহৰৰ ৰাজনৈতিক নেতৃত্বৰ ওপৰত নিজৰ আধিপত্যৰ বিষয়ে আত্মবিশ্বাসী আছিল যদিও স্থানীয় সংস্থাৰ নিৰ্বাচনত তেওঁৰ দলৰ প্ৰাৰ্থীৰ পৰাজয়ে তেওঁক দাপোন দেখুৱাইছে।
বিশেষ কথাটো হ’ল এৰ্দোগানে নিজেই ইস্তানবুলত প্ৰচাৰ চলাইছিল যদিও ইয়াত ধৰ্মনিৰপেক্ষ বিৰোধী দল চি এইচ পিৰ একৰাম ইমামোগ্লুৱে নিৰ্বাচনত জয়লাভ কৰিছিল। নিৰ্বাচনী প্ৰচাৰৰ সময়ত এৰ্দোগানে ইস্তানবুলত নতুন যুগৰ সূচনা কৰাৰ প্ৰতিশ্ৰুতি দিছিল যদিও ১ কোটি ৬০ লাখ জনসংখ্যাৰ চহৰখনে বিৰোধী দলটোৰ ওপৰত আস্থা প্ৰকাশ কৰিছিল। একেদৰে ৰাজধানী আংকাৰাত এৰ্দোগানৰ দলটোৱে এক লজ্জাজনক পৰিস্থিতিৰ সন্মুখীন হৈছে। বিৰোধী দলৰ মেয়ৰ মনছুৰ ইয়াভাছে নিজৰ প্ৰতিদ্বন্দ্বীতকৈ ইমানেই আগবাঢ়িছিল যে আধাতকৈ অধিক ভোট গণনা হোৱাৰ পূৰ্বেই তেওঁ জয়ৰ ঘোষণা কৰিছিল।
স্থানীয় নিৰ্বাচনত হোৱা দুৰ্বল প্ৰদৰ্শনক স্বীকাৰ কৰি এৰ্দোগানে কয় যে তেওঁ আশা কৰা ধৰণে নহয়। তুৰ্কীৰ টেলিভিছনত মাজনিশা দিয়া ভাষণত এৰদোগানে পৰাজয় স্বীকাৰ কৰি কয় যে তেওঁৰ চৰকাৰে জনসাধাৰণৰ ইচ্ছাক সন্মান কৰিব। আমি ৰাইজৰ ইচ্ছাক সন্মান জনাই আমাৰ ভুলৰ মূল্যায়ন কৰিম।
ইস্তানবুলৰ পৰাই এৰ্দোগানে ৰাজনৈতিক জীৱন আৰম্ভ কৰিছিল। ১৯৯৪ চনত এৰ্দোগানে তুৰ্কীৰ প্ৰাক্তন প্ৰধানমন্ত্ৰী নেজমেটিন এৰবাকানৰ কল্যাণমূলক দলৰ প্ৰাৰ্থী হিচাপে ইস্তানবুলৰ মেয়ৰ নিৰ্বাচিত হয় আৰু ১৯৯৮ চনলৈকে এই পদত থাকে। ইয়াৰ পিছত ২০০৩ চনত প্ৰধানমন্ত্ৰী হোৱাৰ পিছত এই পদত তিনিটা কাৰ্যকাল কটোৱাৰ পিছত ২০১৪ চনত তেওঁ দেশৰ ৰাষ্ট্ৰপতি হয়।
শেহতীয়া পৰাজয়ৰ ফলত এৰ্দোগানৰ ৰাজনৈতিক দখল দুৰ্বল হ’বলৈ আৰম্ভ কৰিছে। তেওঁ বহুবাৰ কৈছে যে যিয়ে ইস্তানবুল জয় কৰে, তেওঁ তুৰস্ক জয় কৰে।
