حیدرآباد، 21 اکتوبر (ہ س)۔ حیدرآباد کرکٹ ایسوسی ایشن (ایچ سی اے) کے چھ عہدوں کے لیے جمعہ کو ہونے والے انتخابات کے بعد – صدر، نائب صدر، سکریٹری، جوائنٹ سکریٹری، خزانچی اور کونسلر کے لیے جمعہ کو ہوئے انتخابات کے بعد جگن موہن راو کو ایچ سی اے کا نیا صدر منتخب کیا گیا ہے۔
اس دوران دلجیت سنگھ نے نائب صدر کا عہدہ جیت لیا، دیوراج نئے سکریٹری بنے اور بسوراجو ایچ سی اے کے جوائنٹ سکریٹری کے طور پر منتخب ہوئے۔ سی جے شرینواس راؤ نے خزانچی کے عہدے پر اور سنیل اگروال نے کونسلر کے عہدے پر کامیابی حاصل کی ہے۔
نتائج کا اعلان ہونے کے فوراً بعد لوگوں نے پٹاخے پھوڑ کر اور پتیاں نچھاور کر کے نئے ممبران کے گروپ کا جشن منانا شروع کر دیا۔ ایچ سی اے کے انتخابات میں 170 سے زائد افراد نے اپنا حق رائے دہی استعمال کیا۔ ووٹنگ جمعہ کو سہ پہر 3 بجے ختم ہوئی تھی۔
ہندوستانی کرکٹ ٹیم کے سابق کپتان اور ایچ سی اے کے سابق صدر محمد اظہر الدین سمیت کئی معروف شخصیات نے اپنے حق رائے دہی کا استعمال کیا۔
ایچ سی اے کے انتخابات ستمبر 2022 میں ہونے والے تھے، تاہم، اس کے سابق صدر اظہر الدین کی طرف سے بے ضابطگیوں اور بدعنوانی کے الزامات کے بعد انہیں ملتوی کر دیا گیا تھا۔
یہ معاملہ سپریم کورٹ میں گیا اور ملک کی اعلیٰ ترین عدالت نے اس معاملے کو دیکھنے کے لیے جسٹس (ریٹائرڈ) لاوناگیشورا راو کی سربراہی میں ایک رکنی کمیٹی مقرر کی۔
اس ماہ کے شروع میں، ہندوستانی کرکٹ ٹیم کے سابق کپتان کو قواعد کی خلاف ورزی کرتے ہوئے بیک وقت دو عہدوں پر فائز رہنے کا قصوروار پائے جانے کے بعد نااہل قرار دے دیا گیا تھا۔ وہ بیک وقت ایچ سی اے اور ڈیکن بلیو کرکٹ کلب دونوں کے صدر تھے۔
قبل ازیں، اظہر الدین اور ایچ سی اے کے کچھ سابق عہدیداروں کے خلاف حیدرآباد کے اپل پولیس اسٹیشن میں ایچ سی اے کے فنڈز کے غلط استعمال کے الزام میں مقدمہ درج کیا گیا تھا۔
ہندوستھان سماچار//سلام
